Дашдондогийн Ганбат үе үехэн сонихон мэдэгдлүүд хийнэ. Ихэнхдээ худалгүй юм хэлээд байдаг. Өнгөрөгч долоо хоногт Сонгуулийн хууль хэлэлцэх үеэр хэлсэн бололтой. Мань эр юу гэж хэлсэн гэхээр, одоогийн энэ УИХ-ын танхимд өөр шиг нь нэр цэвэр хүн маш цөөхөн байна гэж хэлж. Өөрийгөө бол цэврийн манлай нь аятай үг хэлж. Хэтийдсэн зүйл алга шиг байна. Нөхөр Ганбат идлэг уулга, эрх мэдлээ ашиглан цөлмөхөөс харин ч жаахан ангидуу явдаг нь үнэн шиг байдаг. Болохгүй, шударга бустай холбогдоод байх нь тун гайгүй харагддаг.
Гарьдхүүгийн Баярсайхантай ихэр юм шиг явж, ганц нэг хундага далбисхийлгэхийг эс тооцвол харьцангуй нэр цэвэр нь цэвэр шүү. Бүлгийн дарга гэгдэж нэг үе явлаа. Гэгдэж гэдэг нь бүлэг дөнгөж шахуу цөөхөн гишүүд Д.Ганбатыгаа бүлгийн дарга гэж харагдуулахгүй ирцтэй байлгаад байснаас үүдэлтэй. Намын дарга ч болоотохлоо гээд л мэдээлсэн.
С.Эрдэнэ хавиас өргөмжлөөд. Гэвч бас жинхэнэ дарга биш л байв. Иймэрхүү шог гэмээр гараанд тоглочихоод байдаг нь үнэн. Манай Баянхонгорын хүүхнүүдээс гэргий сонго гэдэг алдарт үгийг бас л хэлж байв.
Ажилтай, анхиатай, ер нь гэрийг гийгүүлсэн шиг гийгүүлнэ гээд л “авч” өгч байв. Удаа дараа бидон дээр дүрсээ наан, сонгуулийн “бэлэг” болгож өгсөнөөс эдүгээ “Бидон” гэдэг тодотголыг эгнэгт өөртөө шошголжээ.
Дашдондогийн Ганбатад нэг сайн чанар байдаг. Туйлбартай. С.Эрдэнэ нартай анхнаасаа л явсан. Тэрийгээ хадгалаад байдаг. Сайн ч бай, муу ч бай, туйлбар гэдэг их чухал үзүүлэлт.
Д.Ганбатын өөр нэг сайн чанар бол хувийн өмч, чөлөөт эдийн засгийн чиглэлээр маш тууштай хамгаалагч, чигч үзэл санаатай нь юм. Энэ бол магтах ёстой ололт нь шүү. Тиймээс ч тэрээр эдүгээн наяад оны эрх баригчдад, наяад он руу ухарч болохгүй тухайг сануулаад байдаг. Тэр бол өөрийн гэсэн зоригтой, зүрхтэй эр. Намын журмын нөхөд нь хэлэх юм билээ. Кобра харцтай нэг лут аварга бий шүү дээ. Саяхан Б.Хурц арван долоон оноос хойш нэг хүн их самарлаа гээд байсан даа.
Тэр Хурцын хэлсэн арван долоон оноос хойш самарсан, кобра харц руу чигч хараад, би чөлөөт өрсөлдөөн, ардчиллын үнэт зүйл, өмчийн эрх чөлөөнөөс хэзээ ч ухарч чадахгүй гэж хэлээд хаяад гарч оддог гэж хүндэтгэгдсэн аяс Д.Ганбатад хамаардаг юм билээ. Тэрхүү Д.Ганбатын хаяаж гарч одсон мөнөөх эрхэм ч мань “Бидон”-ыг даруухан, хичээнгүй, их сайн залуу гээд цагтаа магтаж л байв.
Д.Ганбат арван зургаан оны Арчилсан намын ялагдлын дараа, гишүүд тангараг өргөхийн өмнө сонгуулийн дүнг зөвшөөрөхгүй гээд, Хууль зүйн байнгын хороог хуралдуулна гээд зэгсэн хөлчүү , ширээ сандал тар нярхийлгэн байсан нэгэн төрх тодхон санагдах. Ялагдлыг үл зөвшөөрөх, ялагдахгүй байх эрмэлзлээс нь үүдэлтэй байсан байх. Гэвч тиймэрхүү, хөлчөнги, тоогүй хандлагаар төр улсад авирламааргүй байгаа юм. О. Цогтгэрэлтэй ордонд, Б. Пүрэвдоржийн өрөөнд “барилдаад” ойчиж байгаа л дуулдсан. Хэрэггүй юм байгаа юм.
Зүгээр л эрүүл саруул бодлого, улс төрийн мэтгэлцээний чөлөөт өрсөлдөөнд л ухаан төгс “барилдах” нь ононо. Зах зээлээ, чөлөөт өрсөлдөөнөө яриад. Д.Ганбат шударга хүн. Одоо энэ төрөөр нүүрлэсэн хулгайн асуудалд маш идэвхтэй хэлж, ярьж, мэтгэх хүн бол тэр байх ёстой.
Идэж уусан, эргэж барьцаалагдах юм өөрийн нь хэлснээр “Над шиг цэвэр хүн алга”-аар тодорхойлогдож байна шүү дээ. Нийгэм ч тэгж үзэж байгаа байх.
Дашдондогийн Ганбат гишүүн ээ, та одоо эрх баригчдаас тэр Алтанширээгийн газрын тосны үйлдвэрийг нэх, Хөгжлийн банкны тонуулд хэн хэн буруутайг маш тодорхой хэлж ярь, буруутныг гэсгээлц, мухар төмөр зам барьж хилд тулгасан нөхдөд эдийн засгийг хэдэн арван жилээр алдагдуулсаны нь төлөө хариуцлага тооцуул.
Үйлдвэр технологийн парк бариулж арьс ширээ боловсруул, станци барьж эрчим хүчээ тэнцүүл, тэл гээд чөлөөт өрсөлдөөн, зах зээл ярьдаг Д.Ганбатад хийж хэрэгжүүлэх ажил үй түм байна. Ядарсан намаа засаглалцахад тодорхой оролц, яаж ийгээд хамтраад засаг барих боломжоор хангахын төлөө ажилла.
Яриад, цэцэрхээд сууж байхаар, эрчим хүч, үгүйдээ хөдөө аж ахуйн яам толгойлж үз. Улс орондоо яригдаж хэлэгдэж, дуурсаж байхаар нэг “юм” хийгээч ээ. Тэгвэл бидон дээр бус, түүхийн хуудаснаа нэр төр чинь жинхэнэ хүндэтээр үлдэх болно. Бидон бол Баянхонгортоо л үлдэнэ, бодит үйлс харин эх оронд л үлдэнэ.
З.БАЯРАА
АМЛАЛТ.МН
