Өчигдөр, уржигдархан нэгэн эх “Эмч нарын буруугаас болж хүү минь хохирлоо, амьдралаараа тоглууллаа” хэмээн олон нийтэд мэдээлэл хийж, уйлж, учирлаж суугаа харагдсан. Өмнө нь ч бас өөр нэгэн эцэг ижил асуудал ярьж, мэлмэрч байсан нь тодхон санагдах. Эвий минь гэж. Энэ мэтээр Эрүүл мэндийн салбарынхантай холбоотой элдэв факт тасрахаа байлаа.
Эсэн бусын л юм дуулдах. Эцэс нь ер дэнслэгдэхгүй. Иргэдийн буруу, хохь болж дуусах нь л элбэг. Чухамдаа овоо босгоогүй бол шаазгай хаана суух вэ гэдэг. Асуудал бодитоор бий болоод л ард нь ийн аргаа барж, эрүүл мэндийн салбарынхандаа гомдож суугаа. Гарцаагүй. Тиймээс салбарын сайдад нэгийг бодож, нэлээдийг тунгаах шаардлага эрхгүй үүсч байна. Чинзо ноёнтон санаачлах, өөрчлөх. Анхаарал хандуулах. Сачий нь хүрэхгүй бол суудлаа “зайдлах”.
Уг нь Эрүүл мэндийн сайдын нүдэн дээр нь үйл явдлууд өрнөөд байгаа. Асуудлууд ундраад байгаа. Сайдаар томилогдсон анхны өдөр нь л “албатууд” нь арваад хүнд сүрьеэгийн вакцин андуурч тарьсан хэрэг гарч, мань хүн “пайнагтаж”, гацаж түгдрэн барин мэдэгдэл хийж байсан. Саяхан. Түүнээс хойш гурван сар өнгөрлөө. Эл гурван сард Эрүүл мэндийн салбарынхантай холбоотой эерэг мэдээ лав дуулдсангүй. Ховор. Бүрхэг нь л их. Халаглам. Гонсойм.
Мэдээж уулын мод урттай богинотойн үлгэрээр бүх эмч нар муу биш ээ. Сайн нь бий. Сэтгэлтэй нь бий. Гэвч саар хэдийнхээ хомрогонд сайхан чиг “нүдүүлэм” бололтой юм. Харамсалтай.
Ямартай ч эл салбарын нэр хүнд шалдаа буугаад шаварт хөлбөрөв. Иргэд “Эмч нарт итгэх итгэлээ алдаж байна даа” гээд толгой сэгсрэх. Эд чинь эмнэгчид бус “алуурчид” биш үү гээд зарим нь гутрах. Энэ л нэг зүйлийг хэлээд байна. Өгүүлээд байна. Нотлоод байна. Сайдын чих рүү хатгаад байна. Гэвч сайд маань таг дуугүй. Бараа сураггүй. Дүлий дүмбэ. Яалтай.
Салбарт шинэчлэл хэрэгтэй. Салбарын ажилчдын мэдлэг боловсрол, ухамсарт анхаарах шаардлагатай. Сэтгэлдээ хөтлөгдөн ажиллагсдыг олшрууулах хэрэгтэй. Чухал нь л энэ.
Хамгийн гэгээн салбар хамгийн бараан нэрэнд “хөлбөрөх” ёсгүйг саная. Сайхан цаг ирнэ гэдэгт бултаараа итгэе...
Г.Дамдин
Amlalt.mn
