Монголын хууль хүчний байгууллагууд амжилттай ажиллаж байна. Эх оронч, эх орны эрх ашгийн үүднээс дуугарсан болгоныг намнан, залхаан цээрлүүлж, хорьж, ял оноохдоо амжилттай ажиллаж байна гэвэл хилс болох үгүйг Монголын ард түмэн хэлээд өгөх байх. Даваагийн Мөнх-Эрдэнийг амжилттай барьж хорин, шоронд явуулсан. Цоодолын Хуланг мөн барьж хорин амжилттайгаар шүүн, арван жилийн ял өгөөд нийгмээр нэг хэлэлцүүлэг явж байна.
Ихэнх олонх өмөөрөн мэтгэж, өрөвдөн халаглаж байна. Тэдэнд алдаа байсныг үгүйсгэхгүй. Гэхдээ тэднийг үнэмлэхүй зөвтгөх нь эх орон, ард түмэн, шударга бусын төлөө дуу хоолойгоо гарган зүтгэж, тэмцэж байхдаа эндэн, ийнхүү хууль хүчний өмнө хүчин мөхөстөж, шорон гянданд туугдаж байгааг бүх Монголчууд харж байна.
Энэ хоёр хүнийг ял оноохдоо хоёуланд нь хохирол учруулсан мөнгөн хөрөнгийн дүн хэлсэн. Д.Мөнх-Эрдэнэд өчүүхэн мөнгөний шамшигдуулал үүсгэсэн гэж ялласан. Ц.Хуланг хоёр зуу гаруй сая төгрөг шамшигдуулсан асуудалд хэлж, зуун тавин сая төгрөг нөхөн торгох ял оноосноо мөн зарлалаа. Тэгвэл бүх Монголчууд нүүрсний дөчин их наядын хулгайны эзэн холбогдогчийг одоо хүртэл олж тогтоон цээрлүүлж чадаагүй байна. Д.Мөнх-Эрдэнэ, Ц.Хулан нарт өгүүлээд байгаа мөнгөөр торгуулийг тодортол, ялыг ясанд нь тултал үүрүүлж байгаа манай Монголын шүүх, прокурор, АТГ, ТЕГ, ЦЕГ тэгвэл яагаад дөчийн дөчин их наядын хулгайг илрүүлж, хулгайчдад ял оноох ажлыг амжилттай хийхгүй байна вэ.
Үнэнд дуугарсан иргэддээ үнэмлэхүй бяраа гаргаж байгаа юм бол, үүрүүлэх ял нэн тодорхой, улсаас, эх орноосоо дөчийн дөчин их наядыг хулгайлагсдыг яагаад олж цээрлүүлэхгүй байна вэ гэж иргэд олон нийт шүүхэд эгдүүцэж байна. Д.Мөнх-Эрдэнэ, Ц.Хулан нарын хохируулснаас хэдэн их наядын өртөгтэй хулгайг илрүүлж чадахгүй атлаа иргэддээ яасан том, яасан их бяртай, яасан их арслан заан байна вэ.
АТГ гэхэд Ц.Анандбазар, Ц.Сэргэлэн, Б.Баттөмөр нарыг нүүрсний “ялтай” гэж зарлаад хэдхэн хоноод л ялгүй гэж зарладаг биз дээ. Тэр Ц.Сэргэлэн гэдэг хүн гэхэд Хил хамгаалахын даргаар хэдэн он улиран ажилласан юм бол дөчийн дөчин их наядын нүүрсний хулгай гарч, гаарч байхад хаана байсан юм бэ.
Монголын төр засаг хаана байсан юм бэ, хууль хүчин, тагнуул, цагдаа, авлигатай тэмцэх хаана байсан юм бэ. Дөчийн дөчин их наядын нүүрсний хулгайгаа илрүүлж, эзэн холбогдогчийг тогтоож чадахгүй энэ хүрчихээд иргэн Д.Мөнх-Эрдэнэ, Ц.Хулан нарт ямархан бяртайгаар ял оноож байгааг дэлхий харж байна. Үнэлгээ хийж байна. Шинжилж байна.
Эдгээр иргэдэд гаргаж байгаа бяраа, мөшгөлөө нүүрсний дөчин их наядын хулгай хийгсдэдээ гаргаач, Монголын хууль хүчний байгууллагынхан. Нүүрсний хулгайчдаа олооч ээ. Нөгөө Т.Аюурсайхан, Ажнайн Бат-Эрдэнэ, Ж.Мөнхбат нараасаа асуугаад, нотлоод олооч ээ. Эрх баригч Ардын намынхан, Д.Амарбаясгалан, Х.Нямбаатараа, нүүрсний дөчин их наядын хулгайгаа шийдэж, гэмтнийг гэсгээж байж урагшаа алхаарай гэж ард түмэн өдөр шөнөгүй хэлж байна. Д.Мөнх-Эрдэнэ, Ц.Хулан хоёр нүүрс хулгайлаагүй, тэд улс орны баялгаас 40 их наядаар нь идэж уугаагүй.
Б.БАЯР
