Өчигдөр Нийслэлийн Засаг дарга бөгөөд Улаанбаатар хотын Захирагчаар УИХ-ын гишүүн асан Х.Нямбаатар томилогдлоо. Тэрбээр НИТХ-ын 78,5 хувиар дэмжигдэж, Ерөнхий сайд батламжилснаар үүрэгт ажлаа хүлээн авлаа.

МАН-ын дарга, Ерөнхий сайд Л.Оюун-Эрдэнэ төдийгүй нийслэлчүүд түүнд итгэж, нийслэлд нүүрлэсэн авлига албан тушаалын хэргийг нааштай шийдвэрлэнэ гэсэн хүлээлтэй байгаа нь нууц биш. Тэрбээр үүрэгт ажлаа хүлээн аваад хэлсэн үгэндээ АВЛИГАГҮЙ УЛААНБААТАРЫН ШИНЭ СЭРГЭЛТИЙГ эрчимжүүлж, нийслэлийн хөгжлийг шинэ шатанд гаргахыг зорино гэдгээ илэрхийллээ. Мөн Нийслэлийн Засаг даргын үйл ажиллагааны хөтөлбөрийн хэрэгжилтийг ханган ажиллахын зэрэгцээ капитал ногоон автобустай холбогдуулан “Тендер, худалдан авах ажиллагаанд гарсан алдаа, дутагдлыг засаж, цаашид ил тодоор хууль тогтоомжид нийцүүлэх зохион байгуулна. Өнөөдөр үүсээд байгаа автобусны худалдан авалттай холбоотой асуудлыг нягтлан шалгаж, холбогдох арга хэмжээг хуулийн хүрээнд шуурхай авах болно” хэмээн хэллээ.

Нийслэлийн шинэ Засаг дарга юуны өмнө “ногоон автобус”-тай холбоотой авлигын хэрэг, булхай луйврыг ил болгох хэрэгтэй. Үүний тулд магадгүй тэр намын журмын нөхөдтэйгөө, найзуудтайгаа ч ам мурийх, үл ойлголцох хэрэг гарна байх. Гэхдээ тэр нийтийн эрх ашгийн төлөө, шударга ёсны төлөө үүнийг хийхээс өөр аргагүй. Ингэж гэмээнэ түүнд нийслэлчүүд, иргэд итгэх итгэл нэмэгдэнэ.

Таныг НИТХ-ын хуралдаанд оролцон, төлөөлөгчдийн асуултад хариулж байхад зүүн гар талд чинь ирээд суучихсан, хачиг шиг наалдчихсан нийслэл Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжийн дарга Д.Батзоригийг үүрэгт ажлаас нь нэн даруй чөлөөлж, АТГ, ЭЦГ-т өгч шалгуулах хэрэгтэй. Д.Батзориг тэнд очиж түгжрэлийг бууруулах төсвийн мөнгийг хуулийн зөвлөх үйлчилгээнд 500-600 саяар нь зарцуулснаа тайлбарлана биз ээ.

Мөн нийслэлийн худалдан авах ажиллагааны газар, нийтийн тээвэр, өмчийн харилцааны газар, нийслэлийн төслийн удирдлагын багийг солих хэрэгтэй.

Ц.Мөнх

Amlalt.mn