Нусаа хацартаа наана гэгч болж байна даа бид. Монголд хамгийн их байшин барьж, эрчим хүч, дулааны хэрэгцээний орон зайг тэлдэг энэ хоёр сайд ажлаа ер хийхгүй юм. Жамбалын Ганбаатар нь колонкоо хоосруулаад, ард түмнээ ганц хоёрхон өдөр тэсчих гээд ятгаж байна.

Чихрийн наймаа хийж, “Энканто”-ийн барилгаар энэ хотоо дүүргэчхээд, одоо ард түмэн рүүгээ би хөрөнгөө яаж зарахаа мэдье гэж томордог шигээ яагаад, колонкыг шатахуунаар дүүрэн байлгах үүргээ гүйцэтгэхгүй байгаа юм бэ.

Монгол ингэж чурдаж болохгүй дээ. Ж.Ганбаатар Баянгол дүүргийг эзлэн эзэрхийлж МАН-ын хорооны байрыг хүртэл барьж аархдаг байж, өнөөдөр ард түмнээ яагаад ганц хоёр өдөр тэсчих гэдэг дээрээ очдог байна. Энэ хүн ажлаа үнэхээр хийж чадахгүй байна. Газрын тосны үйлдвэрийг ярьж ярьж, одоо “Эрдэнэс Монгол”-руу шилжүүлж амарсан. Сайд болно гэдэг чинь чадна л гэж болсон баймаар.

Одоо чаддаг чаддаггүй нь тов тод харагдаж байна. АН огцруулъя гэсэн байна лээ. Цаагуураа Ж.Ганбаатарын мууг үзэх гэсэн юм биш, Монголынхоо мууг л үзэхгүй гэсэн үзэл санаа байх. Ж.Ганбаатар үүнийгээ ойлгох хэрэгтэй. Ерөнхий сайд ч энэ хүндээ асуудлыг нь хэлж, нэг тийш болгоосой.

Эрчим хүчний Б.Чойжилсүрэн Увсаар дүүрэн бэлэг л тараагаад байх. Хоёр зуун мянга дугтуйлаад, баахан халуун сав өгсөн харагдана лээ. Цаагуураа даарна шүү, халуун савтай бай гэж байгаа юм уу, хаашаа юм. Барилга барьдаг шигээ том байж ер чадахгүй. Өчигдөр хойноос цахилгаан хязгаарлана гэнээ гээд баахан мэдэгдэл хийлээ. Залгуулаад, ойрдоо хязгаарлахгүй боллоо. Ч.Хүрэлбаатар нь энийгээ чадчихаж байгаа юм шиг л үзэгдэхээр болсон.

Үр дүнд нь Б.Чойжилсүрэн аанай л ард түмэн даяар зүхээлгээстэй. Ингэн ингэн сайд хийхийн хэрэггүй баймаар. Хувь хөрөнгөөрөө л станц барьчих бядтай хүн шүү дээ. Гэтэл тэгээд л, хоёр зуун мянгаар нь дугтуйлж тараасаар дөрвөн удаа УИХ-д суулаа. Одоо дахиад суух гээд л мөнгө төгрөгөө тараагаад яваа шиг байна.

Энэ хүндээ Ерөнхий сайд “анхаарлаа” тавьж, барилга барьдаг ажилд нь төвлөрүүлэх нь зөв байх аа. Б.Чойжилсүрэнгийн үед монголчууд эрчим хүчээр үнэхээр цангаж, гундаж байна. Ажлын нь үзүүлэлт, ард түмний үнэлгээгээр Ж.Ганбаатар, Б.Чойжилсүрэн хоёрыг Засгийн газарт ч, УИХ-д ч байлгах ямар ч бололцоогүй болжээ. Холбоод, хөтлөлцүүлээд явуулах хэрэгтэй. Хувийн хэвшилдээ хаанчилж, татвараар улсаа дэмнэцгээг. Энэ хоёрын чадах юм бол тэр.

Б.ДОРНО

Amlalt.mn