Уг нь жинхэнэ хууль тогтоогчийн хувьд шалгармал байхаар оюун санааны мэдлэг боловсролтой хүн л дээ. Намбарын Энхбаярыг Ерөнхийлөгч нь байхад хуулийн зөвлөхөөр нь ажиллаж, улс төрд орж ирсэн.
Тун чамбай, цэвэрхэн залуу үзэгддэг байв. Арван зургаан онд гишүүн болоод ороод ирсэн. Т.Бадамжунай зэрэг Ардын намын асран хүмүүжүүлэгчдийн ивээмж ямар нэг байдлаар байх шиг л байснаар ойлгогддог.
Хууль тогтооход анхнаасаа догь, мэтгэлцэл төгс гишүүн байсан. Үндэслэлээ ярих, үгээ хэлэх энэ тэр нь даацтай, бататгал төгөлдөр байсан. Хууль зүйн сайд хиймээр хүн гэлцээд л, Хууль зүйн байнгын хороон дарга ч хийсэн.
Гэтэл таагүй зүйлүүдэд нэр хавсраад гараад эхэлсэн. Оймсны гэх авлигын хэрэгтэнтэй холбоод л, мань гишүүнийг тэр хахуульчийн цаадах маягтай байдлаар бичиж нийтэлсээр, тэгж ойлгогдуулаад нийгэмд хадсан. Зэрэгцээд л өнөө гоё нэр сэвтээд эхэлсэн, харамсмаар байсан даа.
За тэгж байтал, нүүрсний хэрэгт хүртэл хутгалдсан болж таарлаа. Эрх баригчид анх нүүрсний хэрэгт холбогдуулан таван гишүүн зарлахад нэг нь Ш.Раднаасэд байв. Өөрөө гарч ирээд хэлсэн, намаас нүүрсний хэрэгт хутгалдуулах учиртай бодлоготойн тул хутгалдуулав гэж бухимдан хэлж байсан.
Тэр нь ортойгоос ортой байх. Ер нь бол Говь-Алтай аймгаас сонгогдсон Ш.Раднаасэд, Б.Энх-Амгалан нарыг ямар нэг байдлаар мэрж сэмлэх үйл ажиллагаа анхнаасаа зохион байгуулалттай өрнөж байгаа нь улс төр ойлгохтойгоо хэнд ч анзаарагдам л байсан. Эхлээд Ш.Раднаасэдийг "муулаад" байсан.
Б.Энх-Амгалан нь үүнийг анзаараагүй байхад нь л араас залгуулаад хэрэг түвэгт хутгаад, өөрсдийн нь зарим алдаа дөрөөлөх, дөрөөлүүлэх үндэслэл болсон нь нэн тодорхой. Үүнийг хэн хийв гэдгийг тэд өөрсдөө сайн мэдэж л байгаа л даа. Намын нь орой хавиас, нутаг чигийн нь улс л хийснийг намыг тойрон бүчигсэд ярьцгаагаад л.
Говь-Алтайг суллах, сулруулах бодлого явсан. Одоо Ш.Раднаасэд, Б.Энх-Амгалан хоёр хоёулаа яллагдагч болон, шүүх дээр дэнслүүлж байгаа. Ирэх сонгууль бол тэдний хувьд нэгэнт азнахаас аргагүй болжээ. Нэр хүнд тэг дээр ирсэн дээ.
Ш.Раднаасэд Их хурлын гишүүн болсон найман жилд хамгийн их “шархтсан” гишүүний нэг гарцаагүй мөн. Үүнийг намынхан нь л хийсэн. Тэндээс л түүнийг жиндээсэн. Тийм их хүнд олзлогдомтгой хүн юм уу, зөөлөн хүн юм уу. Хонгыг нь их урлаа даа, энэ жилүүдэд.
Уг нь Ш.Раднаасэд шиг л мэдлэг боловсролтой, мэтгэлцэх жинтэй, хууль тогтоохоо мэддэг гишүүд УИХ-д ноёлж байх ёстой юм.
Монголын улс төрд дэвэхгүй, шалихгүй нар нь л үеийн үед түгээмэл шавах юм даа, хөөрхий. Шатарбалын Раднаасэд одоо шүүхээр асуудлаа дэнслүүлчхээд, Их хурлын гишүүн хэн байх, ямар энтэй байх талаар нийгэмд үлгэрлэн ярих л чухал болж дээ.
Б.ДОРНО
Amlalt.mn
