Оросод аюулаас хамгаалахын сургууль төгсөн, Хятадад дорно дахины судлалд мэргэшин төгссөн байдаг. Эндээс нь харахад яах аргагүй л хий зайгүй. Мөн хятад, орос хэлд нэвтэрсэн, Бээжин, Москвагийнхаа “хэл хий”-г ойлгочихсон товариш л даа. Эхэндээ ч чамбай нь аргагүй л гишүүн явлаа.
Нийслэлийн Иргэдийн хуралд удаа дараа суучихсан, сонгогдогчийн меритийн үүднээс үзвэл, яалт ч үгүй л дэвших шатаараа явсан. Намынхаа нэг, хоёрдугаар хүмүүстэй ойр дотно, ялангуяа нутгийн чигийн нь нэг залуу дарга Д.Амарбаясгалан байнга намын бодлогыг атгаж явав, түүнтэйгээ нэн дотно явж ирэв.
Миеэгомбын Энхболдыг Ерөнхийлөгчид нэр дэвшээд, нэвтрүүлгийн бэлтгэл хийхэд,мөн Ерөнхийлөгчид дэвшигч босоо Ганбаагийн дүрд тоглоод л, ер нь үе үеийнхээ дарга нартай тун элэгсэг ойр явсан. За тэгээд, Миеэгомбын Энхболдыгоо түлхэх улс төрийн үйл явц дунд У.Хүрэлсүхийгээ налаад, дэмжээд цоглог л давхисан.
Тэдэнтэй ялалцсан. Удалгүй сайд ч болсон. Зам тээврийн. Дарханы замын бантангийн эзнээр цоллогдож, багагүй зэм шүүмжлэл их хүртсэн. Энэхүү сайдад хүрсэн суудлаас л үүдсэн мөшгөл эдүгээ хүртэл түүнийг даган яллагдагчийн хэмжээнд авчраад, эдүгээ шүүх хурал хэдэнтээ хойшлоод л үргэлжилж байх шиг.
Өөрийгөө хэрэгт орооцолдох, тэр тусмаа хий зайгүйн мөн нэгэн туйл сөрөг намын З.Энхболдтой хөтлөлцөөд, хэрэгтэн болж шүүгдэх дээрээ тултал явах чинээндээ тулна гэж тэр бодоогүй байх. Тиймдээ ч намаас нь, нөхдөөс нь үүтгэлтэй жавар, гадуурхал энд авчрав, тэр тусмаа нэн дотносож явсан нөхөд, нөхрөөс нь салхийг үүтгэснийг ойлгож бухимдаад л яваа бололтой юм билээ л дээ.
Аргагүй биз. Говь-Алтайн хоёр гишүүн хоёулаа ийм яваа. Хоёулаа энэ хорин дөрвөн оны сонгуульд мацах боломжгүй болчихсон байна. Шүүхээс ямар шийдвэр гарах нь бүү мэд. Хоригдохдоо тулах заалттай л яллагаа яваад байх шиг.
"Мишээл” гэж худалдааны маш том төвд, цогцолборт Б.Энх-Амгалан олон жилийн өмнөөс хамааралтай, эд хөрөнгөний өмчлөл хувьтай байх. УИХ-д найман жил суух энэ хугацаандаа тийм дорой гишүүн байгаагүй. Хэлэхээ хэлээд, ярихаа яриад явдаг л гишүүн байсан, байгаа. Цаашид гишүүн байх, эс байхаас үл хамааран Б.Энх-Амгаланд нэг чухал асуудал сургамж болж үлдэж байх шиг байна.
Хэнд итгэх вэ, улс төрд найз нөхөд, ойр дотно гэж бодсон нь эргүүлээд чулуу шиддэг энэ тэрд л илүү их дүгнэлт хийх, хүн таних замууд түүний дараа дараачийн нүүдэлд ихээхэн сургамж, бодомжийг авчрах учиртай байх.
Тэр дахин улс төрд орж ирэх үгүйг нь эс мэдэх. Б.Энх-Амгалан улс төр дэх хар хорын тухай, эрх мэдэлтэй хүмүүс ИХ хурлын гишүүнийг ямар шалтгааны үүднээс яагаад хэрэгт холбодог, яаж ажилладаг, яагаад шахах болдог талаар, биеэрээ мэдэрч яваан тухайтад ч, “чекист” хүний хувьд ч маш сайхан бичиж үлдээх хэрэгтэй.
Нэн ялангуяа өөр рүү нь чулуу шидэж, мөс мөргүүлж байгаа хүмүүс хэн байв гэдгийг илчлэн таниулж, тэдний аяг төрх, арга башрыг, өөдгүй зан байдлыг тод томруун харуулж, дараа дараачийн улс төрчдөд дэлгэцлэн үлдээх нь үнэтэй сургамж таниулга болно доо.
Б.ДОРНО
Amlalt.mn
