Ойрын өдрүүдэд эрх мэдэл, албан тушаалын “Ирүүл тулаан”-д Д.Амарбаясгаланг дуудаж “ялсан” Г.Занданшатар, түүний толгойлсон Засгийн газрын “хурц илд” Хуулзүйн сайд Б.Энхбаяр хоёр амлаж хэлсэн бүхнээ мартчихаа юу гэлтэй таг чиг.
Үнэнээс холдсон үгс уран зохиолын төрөл рүүгээ ороод явчихдаг юм л даа. Өнөө маргаашгүй л “Хулгайч” нарын үүдийг нь нээгээд, үүцийг нь задлаад үнсэн товрог болгоод өгнө гээд байсан. Амлалтыг улстөрчид гарын үсэг шигээ л ашигладаг.
Харин амлалтын биелэлт нь оршихуйн баталгаа гэдгийг л мартчихаад байх юм даа. Бор тээгийн уурхайн “Хор тээсэн” асуудлаар Д.Амарбаясгалан гэдэг хүнтэй “Маргаашийн мандахын улаан нарнаар болзоотын бор толгой дээр уулзаж эрэгчин эмэгчнээ үзсүү” гэж байсан.
Ард иргэд бид чинь “Ариун шударга тулаан”-ыг амьд яваа насандаа үзчих санаатай таваарын үнийн хөөрөгдөл, татварын хүнд дарамтыг чимээгүйхэн үүрээд л чивчиртэл гэдсээ татаад л яваад байгаа.
Гэтэл бүр Бор тээгийн хулгай гэдэг байсан эсэх нь мэдэгдэхээ болилоо. Уулыг нурааж, усыг эргүүлчихсэн юм л яриад байсан биз дээ. Хууль зүйн сайд Б.Энхбаяр чухам л өөрөө шэйрлээд, Админерал ХХК-д давуу эрх олгосон албан тушаалтнуудыг шүүхээр шийтгэлээ гээд байсан чинь үнэндээ Өмнөговь аймгийн Цогтцэций сумын Засаг Дарга Г.Бацмаа, Өмнөговь аймгийн Цогтцэций сумын Газрын даамал Ү.Наранбямба нар албан тушаалын байдлаа урвуулан ашиглаж "Админерал” ХХК-д 35 га газрыг үйлдвэр барихад давуу эрхээр олгосныг шүүхээр тогтоон тус бүр 2 жил нийтийн албанд ажиллах эрхийг нь хасаж, тус бүр 25 сая төгрөгөөр торгож, торгуулийн мөнгөө нэг жилийн дотор хуваан төлөх шийдвэрийг шүүх гаргасныг бараг л “Админерал” ХХК-ийн ХАМАГ ТОМ хэрэгтнүүдийг яллачихсан мэт сэвэх нь хоржоонтой юм.
Логикоор нь харвал их инээдтэй. “Үйлдвэр барих гэлээ” гэж шийтгээд байгаа ч юм шиг. Би асуудлыг нь яриагүй шүү. Мань мэт нь өглөө бүр мандахын улаан нарнаар “Болзоотын бор толгой” дээр шударга ёсны хамгаалагч Б.Энхбаяр сайдыг Уйльям Уоллос шиг “Шударга ёс” гэж орилон тэнгэр лүү илдээ чичихийг хүлээгээд л суух. Г.Занданшатар сайдын “Амлалт, сумлалт” хоёр улстөрчийнх нь хувьд ухаалаг алхам биш байж таарлаа.
Тэгэхлээр нүүрсний хулгай, авлигатай нэр холбогдох “Админерал” ХХК-тай холбоотой гэмт хэрэг Цогтцэций сумын Засаг дарга, газрын даамал хоёрыг шүүхээр ялласнаар дуусчихаж байгаа хэрэг үү, харин эхлэж байгаа юм уу, Хууль зүйн сайдаа?
Т.Төмөр
Amlalt.mn
