Олон улсын валютын сан, Эдийн засгийн хамтын ажиллагаа, хөгжлийн байгууллага, Нэгдсэн Үндэстний Байгууллага болон Дэлхийн банк-наас хамтран санаачилсан Татварын хамтын ажиллагааны платформын “Татвар ба хөгжил” олон улсын бага хурал 2026 оны гуравдугаар сарын 2–3-ны өдрүүдэд Япон Улсын Токио хотноо амжилттай зохион байгуулагдаж байна.

Энэхүү бага хуралд дэлхийн 90 гаруй улсын сангийн сайд, дэд сайд нар болон төрийн өндөр түвшний албан тушаалтнууд, олон улсын хөгжлийн түншүүд, судалгааны байгууллагуудын 250 гаруй төлөөлөгч оролцож, хөгжилд чиглэсэн татварын тогтолцоог бэхжүүлэхэд тулгарч буй сорилт, татварын бодлогын шинэчлэл, олон улсын татварын зохицуулалтын асуудлаар санал солилцож байна.

Сангийн дэд сайд Б.Хулан “Өгөгдөл, нотолгоонд суурилсан татварын бодлого” сэдэвт салбар хуралдаанд илтгэгчээр оролцож, Монгол Улсад хэрэгжүүлж буй нэмэгдсэн өртгийн албан татварын урамшууллын системийн талаар танилцууллаа.

Тэрбээр өгөгдөлд суурилсан дүн шинжилгээний үр дүнд татварын бааз суурийг өргөжүүлэх, далд эдийн засгийг бууруулах, татварын тогтолцооны ил тод, шударга байдлыг бэхжүүлэх чиглэлээр хэрэгжүүлсэн арга хэмжээ, гарсан үр дүнгийн талаар мэдээлэл өгч, Монгол Улсын туршлагаас хуваалцан, санал солилцов.

Мөн олон улсын байгууллагуудаас олгодог хөгжлийн албан ёсны тусламж буурч буй өнөөгийн нөхцөлд хөгжиж буй орнууд татварын тогтолцоогоо улам боловсронгуй болгож, дотоодын нөөц бололцоогоо нэмэгдүүлэх замаар нийгмийн суурь үйлчилгээ, хөгжлийн хөтөлбөрүүдийг тогтвортой санхүүжүүлэх шаардлага нэмэгдэж байгааг онцоллоо.

Тус бага хурал нь татварын бодлогын чиглэлээр улс орнууд харилцан туршлага солилцох, төсвийн орлогын тогтвортой эх үүсвэрийг бэхжүүлэх, хөгжлийн зорилтыг санхүүжүүлэх механизмын үр ашгийг дээшлүүлэхэд чиглэсэн олон улсын хамтын ажиллагааны чухал талбар болж байна.

Түүнчлэн хөгжлийн түнш байгууллагуудын судалгааны төв, бодлогын судалгааны хүрээлэнгүүдийн гаргасан судалгааны үр дүн, цаашдын чиг хандлагыг тодорхойлоход ач холбогдол бүхий арга хэмжээ болж буйгаараа онцлог юм.

amlalt.mn