Улсын Их Хурлын гишүүн, Байгаль орчин, хүнс, хөдөө аж ахуйн байнгын хорооны дарга М.Мандхай өнөөдөр (2026.11.03) “Нээлттэй парламент” уулзалтын танхимд ажиллаж, иргэдийн санал хүсэлтийг сонслоо.
Уулзалтад нийт 18 иргэн оролцож, нийгэм, эдийн засаг, амьжиргааны нөхцөл байдал, нийгмийн халамжийн бодлого, төрийн үйлчилгээний хүртээмж, хууль тогтоомжийн хэрэгжилт, байгалийн баялгийн үр өгөөжийн хуваарилалт зэрэг асуудлаар санал бодлоо илэрхийлэв.
Мөн иргэд хүнс, бараа бүтээгдэхүүний үнийн өсөлт, малын эрүүл мэнд, махны нөөцийн хангамж, хүнс, хөдөө аж ахуйн салбарын бодлого, төрөөс олгож буй дэмжлэг, урамшууллын хүртээмжтэй холбоотой санал хүсэлтээ уламжиллаа. Тухайлбал, хөдөө аж ахуйн салбарт олгож буй дэмжлэг, урамшууллыг барьцаа хөрөнгийн боломж хязгаарлагдмал малчид, тариаланчдад хүртээмжтэй хүргэх, дотоодын хүнсний үйлдвэрлэл болон жижиг, дунд бизнес эрхлэгчдийг бодлогоор дэмжих шаардлагатай байгааг онцолсон юм.
Уулзалтын үеэр Улсын Их Хурлын гишүүн М.Мандхай хууль тогтоомжийн хэрэгжилтийг хангах, эрх зүйн орчныг боловсронгуй болгох, газар тариалан, хүнс, мал аж ахуйн салбарын тогтвортой хөгжлийг дэмжих чиглэлээр Байгаль орчин, хүнс, хөдөө аж ахуйн байнгын хорооноос авч хэрэгжүүлж буй арга хэмжээний талаар мэдээлэл өглөө.
Тэрбээр, аливаа бодлого, шийдвэр боловсруулахдаа зөвхөн тайлан, мэдээлэлд хязгаарлагдах бус, иргэд, үйлдвэрлэгчид, мэргэжлийн холбоодын санал бодлыг сонсож, оролцоог хангахыг чухалчилдаг гэв. Мөн өнгөрөгч есдүгээр сард зохион байгуулсан Ерөнхий хяналтын сонсголын үр дүнтэй холбоотойгоор хүнс, хөдөө аж ахуйн салбарт олгож буй дэмжлэг, урамшуулал, зээл, татаасны үр ашиг, ил тод байдлыг сайжруулах чиглэлээр боловсруулсан “Засгийн газарт чиглэл өгөх тухай” Улсын Их Хурлын тогтоолын төслийн талаар танилцуулсан юм.
Түүнчлэн иргэдийн дуу хоолойг төрийн бодлого, хууль тогтоомжид тусгах нь парламентын үйл ажиллагааны нэг хэсэг болохыг онцлоод “Нээлттэй парламент” нь шийдвэр гаргах үйл явцад иргэдийн оролцоог нэмэгдүүлэхэд чиглэсэн чухал санаачилга болсныг тэмдэглэв.
Улсын Их Хурлын гишүүн М.Мандхай уулзалтын үеэр хөндөгдсөн асуудлууд, иргэдийн санал хүсэлтийг холбогдох байгууллагуудад уламжлахын зэрэгцээ хууль тогтоох болон хянан шалгах чиг үүргийн хүрээнд шаардлагатай арга хэмжээг авч, эргэх холбоотой ажиллахаа илэрхийллээ хэмээн Улсын Их Хурлын Нээлттэй парламентын газраас мэдээлэв.
Эх сурвалж: parliament.mn
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!