С.Ганбаатар Засгийн өмнөөс сэтэлгээ хийв
Нүүрсний хулгай гаарлаа гэсэн Засгийн газар, түүний Ерөнхий сайд Л.Оюун-Эрдэнэ өчигдөр ч дүлэгнэн, энэ талаараа юу ч ярьсангүй. Харин үдээс өмнө босоо С.Ганбаатар үг хэлж гурван хүнийг нэрлэв. Ж. Оджаргал, П. Батсайхан, Д.Баясгалан нарыг нүүрсний хулгайн авторууд гэлээ. Үнэн ч биз, бас тайлбартай ч биз. Юутай ч нүүрсний хулгайг эрх мэдэл, ямба гувш нь төгсөрсөн Засгийн газраас өмнө босоо хэмээх С.Ганбаатар босоогоороо үг хэлж, юу ярихаа мэдэхээ байсан, нүүрсчдээс айсан Засгийн газраас өрсөж дуугаран, нийгэмд сэдвийн сэтэлгээ хийсэн нь үнэн. Энэ бол С.Ганбаатарын гавьяа. Аливаа анхдагчид бүх үнэ цэн ирдэг жамтай. Босоо Ганбаагийн мэдээллийг дагаад Засгийн газраас мэдэгдэл хийж, нүүрсний хулгайчдыг зарлав. Харин тэр зарлал нь С.Ганбаатарын хэлсэн гурван хүнийг нэрлээгүй, магад тэдний оронд өөр хүмүүсийг тавьж зарласнаараа хачин байлаа.
Д.Амарбаясгалан нарын зарласан хүмүүс анд найз нар нь байв
Үдээс өмнө үг хэлж, нийгэмд сэдэв өрнүүлсэн С.Ганбаатарын араас нилээд аажуу, сүүл унан Ч. Хүрэлбаатар, Д.Амарбаясгалан нар Н.Учралыг ардаан зогсоон нүүрсний хулгайчдыг зарлав. Гэвч энэ зарласан хүмүүс нь үнэндээ "жараахайнууд" байлаа. Ард түмэн эчнээ мэдээд, нэр устай нь бичээд байгаа нүүрсний олигархиудаас хэнийг нь ч нэрлэсэнгүй. Харин Ардын намынхаа залуус болох, төмөр зам барьж, Таван толгойг төгөлдөржүүлсэн гэх хөдөлмөрийн баатар Н.Удаанжаргал, аж үйлдвэрийн гавьяат Б.Ганхуяг нараа нүүрсний хулгайн арай томхон жараахайгаар зарлав. Энэ хоёр залуу бол Засгийн газрын хэрэг эрхлэх газрын дарга Д.Амарбаясгалангийн анд хам, журмын нөхдүүд билээ л. Нийт нэр хэлж зарласан хүмүүсээс илүү тод нь энэ хоёр л байв. Бусад нь гуя дагаж хүзүү гэгчийн үлгэрийг санагдуулсан. Засгийн газрын дарга нарын өгүүлж байгаагаар бол эдгээр балчир төрх, бага албатай хэсэг хүмүүс нүүрсний хулгайчид юм байна.
Т.Доржханд Засгийн газрын жижигдэж байгааг, дийлэхгүйг ил тод зарлав
С.Ганбаатарын мэдэгдлийн араас Т.Доржханд мэдэгдэл мөн хийв. Тэрбээр Засгийн газар нүүрсний хулгайг үнэхээр дийлэхгүй юм байна аа гэж шууд хэлэв. Энэ бол Оюук, Амраак болон Засгийн газрын сайдуудыг үнэндээ арчаагүй байгааг, юу ч хийж чадахгүй “амьтас” болохыг яруу тод өгүүлсэн хэрэг болов. Түүнийхээр одоо нүүрсний асуудлыг УИХ, чухамдаа Г.Занданшатар базаж шийдвэрлэж, сонсгол, хэлэлцүүлэг, олон нийттэй хамжиж шийдэх учиртай гэж сануулав. Ингэснээр Засгийн газар парламентад ганц суудалтай намд жаран дөрөвтэй УИХ-аа, өөрсдийгөө онигоо болгон харагдуулж байгааг ард түмэн харж, инээх бус уурлаж байна.
Жагсаалыг Б.Ганхуяг нарыг өдөөв, санхүүжүүлэв гэлээ
Ингэж Цагдаагийн газар ч, мань Ерөнхий сайд ч мэдэгдсэн бололтой. Энэ юу хэлж байна гэхээр ойлгомжтой. Ажлаа хийлгэсэн андууд нь Б. Ганхуяг, Н.Удаанжаргал нарыгаа хулгайчаар зарлаж, ид бах болгон ярьж, энэ нь угаас удаан үнэртсэн хиншүү хярвас байсныг тодотгов. Хэрэв үнэхээр дээрх хоёр залуу, Эрдэнэс таван толгойнхон энэ жагсаалыг өрдсөн гэвэл энэ толгойнхон улсаасаа том юм байна, эс бол энэ толгой нэрт компанийнханыг Засаг төр хэлэмэгдүүлж байгаа юм байна гэж ойлгогдохоор байна. Нүүрсний хулгай том нь үнэнг бүгд зөвшөөрсөн. Энэ агуулгаар Таван толгойнхон таагүйн цаадах таагүйд хөл зоогдсон улс нь ойлгомжтой. Гэхдээ энэхүү их бяртай, 64-тэй, данхгар Засаг руу ноцон давшилж байгаа бол хулгайн жинхэнэ эздийг нэрлээгүй, тэднийг хаацайлсан, цөөн бага залуусыг хэлмэгдүүлж мэдэх ахул ийн шуудран сөрсөн байх талтай байна. Ер нь, одоо Б.Ганхуяг, Н.Удаанжаргал нар жиргээний ард, хилийн чинадад нахилзаж суухаар анд нөхдөө, нүүрснийхнээ ил тод нээлттэй ярих хэрэгтэй. Тэгэж байж л өөрсдийгөө аварна. Эх орноо аварна. Эс бөгөөс өөрсдийг нь нэгэнт золин, нүүрсэн хулгайд нэр оноосноо өчигдөр Засгийн газар зарлачихлаа.
Онц байдал зарлах гэсэн УИХ-ын гишүүд ичиг ичиг
Онц байдал зарлахыг УИХ-ын гишүүдийн тодорхой хэсэг нь дэмжжээ. Мөн их айдас аа. Ингэж дэмжсэн гишүүд юунаас нь ингэтлээ айсан бол. Хоёр өдөр залуус жагсахад хоншоор цухуйлган гарч ирсэн нэг ч гишүүн энэ 76 дотор алга байлаа. Хэн нь ч гарч ирээд мэдээлэл өгөөд, хамтраад нүүрсний хулгайг илрүүлэхэд эвлэж болох байлаа. Гэвч нэг нь ч гарч ирээгүй. Ордон дотор олхиогүйтэн суусан нь үнэн биз дээ. Тэгсэн атлаа онц байдал зарлана гэдгийг дэмжинэ сууна гэдэг хэцүүхэн явдал шүү. Хэрэв онц байдал зарласан бол өнөө өглөө хотоор дүүрэн хуягт, буутай цэрэг болох юм байна л даа. Ард түмэн бүр үзэн ядах байсан, бүр хилэгнэх байсан. Яасан арчаагаа алдсан амьтдыг УИХ-д дүүргээ вэ бид, ичиж үхмээр. Гутамшиг.
Төрийн эрхийг хууль бусаар авах гэж үзлээ гэнэ ээ...
Ерөнхий сайд Л.Оюун-Эрдэнэ өчигдөр Үндэсний аюулгүй байдлын зөвлөл дээр ингэж ярьсан бололтой. Сайтуудаар бичигдэж. Төрийн эрхийг хууль бусаар авах бус, нүүрсчдээ ил гарга, хулгайчидаа л зарла гэсэн жагсагчид. Одоо Ерөнхий сайд нүүрсний нууц гэрээнүүдээ ил болго, нүүрсний хулгайн жинхэнэ эздээ ил гарга. Үнэн бодьтой ажилла. Чинийхээ төлөө үхье гэж эх орондоо хэлсэн юм гэж шүлэг байдаг, Энхболдоо гараад ир гэж орилж байгаа бичлэг нь дэлхийгээр нэг гарч л байна. Өчигдөр өөрөө гарч ирсэнгүй, гараад ирээч л гээд жагсагчид нэхээд байна билээ. Өчигдөр ажаад байхад жагсагчид, цагдаа нар хувцсаараа л ялгарч байна билээ. Дотоод итгэл үнэмшил, хүсэл зориг тун адилхан байгаа нь нэвт ажиглагдаж л байна. Дөчин их наядыг туусан эрх мэдэлтнүүдийг хамгаалах хүсэл нэг их өдлөхгүй байх л даа, хэвийн хүнд.
Б.Баяр
Амлалт.мн
