УИХ-ын өчигдрийн /2022.12.22/ нэгдсэн чуулганы хуралдааны эхэнд хэлэлцэх асуудлын дараалалтай холбогдуулан УИХ-ын гишүүд үг хэллээ.
Энэ үеэр УИХ-ын гишүүн Д.Ганбат: "Өнөөдөр хамгийн богино өдөр, урт шөнө. Ес эхэлж байна. Хөдөө гадаа хүмүүсийн амьдрал хүнд байна. Бидний батлаад байгаа хуулиуд дутуу дулимаг байна. Уул уурхайн биржийн хуулиар 30 хувийг оруулна, өмчийг хувьчлахдаа 30 хувь гээд дандаа дутуу хагас юм хийж байна. Үндсэн хуулийн нэмэлт өөрчлөлтийг бас яаруу хийгээд хэдэн хүн сайд болж салбараасаа баян сайд нар гарч ирсэн. Ёс суртахуун гэж алга. Дарга нар өөрсдөө огцормоор байна. Нүүрсний хулгайг ярьсан залуус эрүүл мэндээ золиосолж, жагсч байна. Эрүүл мэндийг юугаар ч нөхөхгүй. Үр дүнд хүрсэнгүй. Энэ мэдрэмжийг мартагдахгүй байх.
10 жил төмөр замыг вагонтой, ачаатай нь хулгайлсан хүмүүс шийтгэлгүй үлдэж байна. Нээлттэй сонсголыг ямар муухай болгож байна аа. Ард түмний мэдэх эрхэд яаж халдаж байна вэ. Нүүрсний хулгайчдыг өмгөөлөх хурал болж тарлаа. Ард түмний жагсаалыг саармагжууллаа. Эцсийн эцэст нүүрсний хулгайчдыг өмгөөлөх хурал болж дууслаа.
Өнөөдөр нүүрсний жинхэнэ хулгайчид л жаргалтай байна. Хууль хяналтынхан ажиллахгүй байна. Хууль зүй, дотоод хэргийн сайд, Ерөнхий сайд ах дүү хоёр чадлаараа л хичээж ажиллаж байх шиг байна. Бүгдээрээ түдгэлзээд, хариуцлагаа хүлээвэл яадаг юм бэ. Банкны захирлууд төрөөс авлагатай гэж ярьж байна. Мөн гадуур хулгайч нь хулгайчаа шалгадаггүй юм дөө гэж байна. Эрхэмлэж яваарай гэсэн эрх чөлөөнд аюул занал учирч байна" хэмээлээ.
