Төрийн албан хаагчдыг төрөөсөө илүү “төмөр нүүртэй” нөхөд байдаг мэтээр иргэд хардаг болж. Арга ч үгүй биз. Хаана л асуудал үүснэ, тэнд л “алдар” нь дуулддаг болсоор удсан шүү дээ. Албан тушаалаа урвуулан ашигласан, иргэдийг гадуурхсан, зандарсан, захирч тушаасан л гэнэ. Ялангуяа “авилга” гэх үгний ард төрийн өндөр албан тушаалтнуудын “автор” алгасалгүй бичигддэг болсон. Ер нь л тэдний муйхарлал, “галзууралд” хэмжээ хязгаар үгүй юм байх.
Чухамдаа бол төрийн алба “түмний төлөө мэрийх” алба. Өөрийнхөө төлөө биш. Үүнийг л эл албанд зүтгэгчдийн зарим нь умартдаг бололтой. Санах хэрэгтэй. Ухамсарлах ёстой
Гэхдээ уулын мод урттай богинотой. Болох, бүтэхгүйн дунд сэтгэл, зүтгэлээрээ ялгарч, чин үнэнчээр хөдөлмөрлөж буй хүмүүс ч бий. Тэд зүгээр л “толгой дээрх томчуудынхаа” балгийг хуваалцаж, хар нэр л зүүчихээд байгаа хэрэг. Нэг үхрийн эвэр доргивол мянган үхрийн эвэр доргино гэдэг дээ.
УИХ-аас Төрийн албанд зүтгэгчдийн элдэв санаархлыг хазаарлаж, шат шатанд нь цочроо өгөхийн тулд саяхан Эрүүгийн хуулийн 22.1 болон 22.2 дугаар заалтад нэмэлт өөрчлөлт орууллаа. Улмаар авлигын гэмт хэрэг үйлдсэн төрийн албан хаагчийн нийтийн албанд ажиллах эрхийг бүх насаар нь хасаж, урт хугацаагаар хорих ял оногдуулахаар болсон юм. Алга ташмаар, давхар бас уртаар санаа алдмаар.
Төрийн албыг хялбархнаар “хувийн албаа” болгох бошгыг атгаж суудаг шат шатны дарга, сайдуудад бол энэ хууль “дөнгө” болж мэднэ. Тэгж ч найдаж байна. Төрийн нэрийг гутааж, авилга гэх нэршилтэй “ханьсах” шахуу болсон нэр бүхий нөхдүүд халуун суудалдаа “малийж” суугаа. Тэдний “хүйтэн байр” луу зүглэх цаг нь ойртсон бололтой л гэж баярлах. Бид мартаагүй. Төр ч умартахгүй байх. Молигодоод “тонгорчихгүй” л бол.
Харин төсвийн цалингаасаа илүүг харалгүй, шударгаар ажиллаж, төрийн төлөө мөрөөрөө зүтгэж буй гүйцэтгэх, доод шатны гэмгүй албан тушаалтнуудад л мөнөөх хууль нь тээг болох нь уу гэх хардлага төрөх юм. Тэдэнд өгч, авалцах мэдэл юу байх вэ дээ. Өнөө маргаашаа л аргацаах гэж хичээж яваа хүмүүс. Тийм байтлаа шунал нь дэндсэн хэдэн дарга нарын золиос болчих вий. Үүнээс л эмээж байна.
Төрийн албанд удирдах албан тушаал эрхэлж байгаа “аваргууд” бол нэгнээрээ “туг тахиад”, хорлоод сурчихсан. Нүүрсний хэргээс л үүнийг илхэн харчихаж болохоор. Тэгвэл яг л энэ жишгээрээ мань овгорууд “жаргах замд нь саад болсон” өшөөтэй нэгнийхээ цүнхэнд дугтуйтай мөнгө шургуулчихаад, АТГ-т нульж орхивол яах вэ. Хорлосон нь башийж, хорлогдсон нь хохирч үлдэнэ.
Ийм байдал даамжирвал сүүлдээ бүр төрийн албанд ажиллах хүнгүй болох ч эрсдэл бий. Хэзээ ч “хэлмэгдэж” мэдэх газар, сэтгэлдээ дарамттай ажиллахын учир юусан билээ.
Ямартай ч “дуншин байж” Эрүүгийн хууль шинэчлэгдлээ. Төрийн албаныхан ч дуу дуугаа авалцан мэгдлээ. Сайшаах нь сайшааж, саймшрах нь саймшрах л биз. Хамгийн гол нь шинэ хуулийн хатуу дайрлагад төрийн албанд ажиллаж буй “хорхойд ч хоргүй” олон олон шударгуу нь л битгий “цохигдчихоосой” доо.
