Хорин оны сонгуулийн санал хураалт болохоос хоёр гурван хоногийн өмнө санагдана. Уухилсан Б.Бат-Эрдэнийг хажуудаа суулгаад Л.Оюун-Эрдэнэ ярьсан, Хэнтийд.
Юу гэж ярьсан бэ гэхээр, онолын хувьд манай нам одоо ялчихсан байна гээд сууж байсан. Онол нь ч үнэн хэлсэн үү, Оюун-Эрдэнэ нь ч үнэн хэлсэн үү, үнэн байсан, ялсан, бүр үнэмлэхүй ялсан. Оюун-Эрдэнийн тэр хэлээд байдаг онолын хувьд асуумаар зүйлүүд мөн их байх юм аа.
Одоо манай улс нэг хүнд ноогдох өрийн үзүүлэлтээрээ дэлхийд ихээхэн дээгүүрт яваа байх. Төрж буй хүүхэд л шууд өрийн бичигтэй ирж байгаа. Онолын хувьд энэ улсын иргэний хувьд энэ нь ялалт мөн үү, ялагдал мөн үү. Ерөнхий сайд хариулах ёстой.
Одоо манай улсын Засгийн газар олигархиудаар дүүрчээ. Концесс, Хөгжлийн банк, Тендер, ЖДҮ гээд манай улсын шударга бусын завхралын домог жишээнд гүн даамай шигдэгсэд Л.Оюун-Эрдэнийн Засгийн газрын сайдууд. Улсаасаа баян хүмүүс шивээлж хуягласан, Засагт. Онолын хувьд энэ нь манай орны, манай ард түмний эрх ашигт нийцэж байна уу, тэдний хүсэл мөн үү. Ерөнхий сайд хариулах ёстой.
Одоо манай улсын чухал гарц нүүрсний хулгайчдыг цээрлүүлэхэд байна. Тэднийг хэрхэн ялахаа Ерөнхий сайдаа харуулахыг хүсэж байна. УИХ, Засгийн газрын гишүүд нь үлэмж холбоотойг олон нийт хэлээд байна. Засаг, нам өөрсдөө ч нэг хэсгийгээ нэрлэчихсэн. Онолын хувьд ийм хүмүүс төр барьж, Засаг захирч болдог юм уу. Та тэднийг дийлэх нь үү. Ерөнхий сайд хариулах ёстой.
Одоо манай ард түмэн таныг ихэд ажиглаж байна. Таныг үнэхээр улс төрч мөн үү, хэлсэндээ хүрэх үү гэдгийг тод харж ажиглаж байна. Сөөмөөр ялах уу, алхмаар давших уу, Оюун-Эрдэнэ хэн бэ гэдгийг. Онолын хувьд та улс төрч мөн үү. Өнөө маргаашаа аргалагч уу. Ерөнхий сайд хариулах ёстой.
Одоо манай Ардчилсан нам эв нэгдлийг хангах ажлын хэсэг байгуулжээ. Сөрөг хүчин гэж байх хэрэгтэй юү, үгүй юү, эрх баригч намын даргын үг маш чухал. Ардчилсан намыг Ардын нам булшилсаан гэж ард түмэн яриад удлаа. Онолын хувьд сөрөг хүчингүй эрх баригчид чухам ямар шидэнд хүрдгийг нүүрсний хулгайн дөчин их наяд харуулж байна гэж олон түмэн ярьж байна, жигшиж байна. Онолын хувьд эрх баригч намын дарга сөрөг хүчний намаа хэрхэн дэмжих ёстой юм бол. Ерөнхий сайд хариулах ёстой.
Одоо манай улс өмчүүдээ нэг хэсгийг нь хурааж байна. Эрдэнэт, Дархан, Хөтөлийн үйлдвэрүүд. Хулгай завхрал байсан бол аргагүй. Нөгөө талд, хувьчилнаа гэж их ярих. Засаг төрийн индрээс. Өмч дээр тулгуурласан эдийн засаг хөгжсөн нийгмийг бүтээдэг гэж дэлхий ярих. Онолын хувьд манай улс өмчтэй иргэн байж болох улс мөн үү, үгүй юү. Ерөнхий сайд хариулах ёстой.
Одоо манай улсын хүчний байгууллагын дарга нар бүгд Хэнтийнх байна. Хүчийг ингэж нэгтгэдэг юм уу. АТГ, ЦЕГ, Хууль зүйн яам. Хэнтийнхэн пиг. Хүчний бус ч байгууллагаар дүүрэн Хэнтий нутгийнхан шивээллээ. Онолын хувьд энэ зөв үзэгдэл үү. Ерөнхий сайд хариулах ёстой.
Одоо манай улсын төсвийн хөрөнгө оруулалтын маш их хувь Хэнтий аймагт ноогдож байна. Энэ нь зөвхөн барилга байгууламжийн жагсаалтаас харж тооцоолоход Хэнтий аймгийн нэг хүнд ноогдох хөрөнгө оруулалтын үзүүлэлт улсын дундажаас 4,5 дахин их ажээ. Онолын хувьд Монгол Улсын Ерөнхий сайдын аймаг ийм хөрөнгө оруулалтай, бусдаасаа цойлсон илүү байх нь шударга уу. Ерөнхий сайд хариулах ёстой.
Одоо манай улсыг Ардын нам засаглаж байна. Одоо энэ дээр өгүүлсэн болгон Ардын намын засаглалын өнгөн дээр явагдаж байгаа жишээнүүд. Ардын нам хүчээ нэгтгэнэ гэж хорин онд хэлсэн. Ард түмэн хүчээ нэгтгэн жагсаж Ардын намыг үгүйрүүллээ гэж хэлж байна. Хориод хоног ингэж хэлэн жагсаад тараагдав. Онолын хувьд танай нам ирэх сонгуульд ялах болов уу. Ерөнхий сайд хариулах ёстой.
Энэ мэтээр асууж, хариулт авах зүйл цаашаа ярьвал, үгүй ээ мөн их ярихаар байна. Цаашаа ярьвал, цаашаа ярих юм уу, яах юм, гэдгээс хандахад Б.Хурц гэж хүний эхнэр, нөхрөө хэлмэгдүүлэн залхааж байгаа хүнээр Ерөнхий сайд, Хуулийн сайд хоёрыг ХЕРОтой нэрлээд байх юм. Ах дүү улс бүүрэлхэж, ардыг дээрэлхээд байгаа юм биш биз. Онол ярилгүй, үүнд ч гэсэн Ерөнхий сайд хариулчих л хэрэгтэй.
З.БАЯРАА
Амлалт.мн
