Халтмаагийн Хүрэлсүх гэж хэлээд сууж байсан Гомбожавын Занданшатар дарга аа, та ажлаа хийсэн шиг хий л дээ. Та төрийн Эрх барих дээд байгууллагын их эх индэр дээрээс бүх гишүүдийг овог нэртэй нь дуудаж, төрийн их сүр, утга жанлавыг оршоон хурлаа удирддаг. Тэгэхдээ нэг удаа төрийн тэргүүнээ тангараг өргүүлэхдээ овгийг нь бууж яваа хүний овгоор дуудсан л даа. Хэл халтирна гэж бий. Гэхдээ тэгэж хальтирч болохгүй. Тэр яая гэхэв, түүхийн тоосонд үлджээ. Үлдмээргүй, үлдээмээргүй юм байна аа.
Та, төрийн тогтолцоогоо ярих Зөвлөлдөх зөвлөл гэгчээ зөв зохион байгуул л даа. Ж.Мөнхбат, Л.Өлзийсайхан та гурвын сүртэй нь аргагүй зар тавьж, шүүн тунгаасан тэр Зөвлөлдөхийн нэр дэвшигчид чинь ердөө оносонгүй. Хүнийг нь голсонгүй. Хүйс, нийгмийн тэгш байдал гээд өчнөөн төлөөлөл орхигджээ.
Хөгжлийн бэрхшээлтэй иргэд, малчин тариаланч, оюунтан залуус, эмэгтэйчүүд, барилгачин, өрлөгчин, гагнуурчин, сэхээтэн, зохиолчид, нийгмийн оюун санаатнууд гээд өчнөөн төлөөллөө өнөөдрийн олигархи төрдөө оруулсангүй явж ирлээ шүү дээ гээд наад намын чинь дарга Лувсаннамсрайн Оюун-Эрдэнэ чинь гаслан хэлээд байгаа шүү дээ. Яагаад түүний үгийг тоохгүй байна. Яагаад тэгээд наад Гүйцэтгэх засаглалынхаа тэргүүний үгийг ул руу шидээд байгаа юм.
Ж.Мөнхбат Боомтын сайд өгсөнгүй гээд хашигнаад, тунирхаад байгаа юм уу. Боль л доо, эх орны өмнө хүлээсэн үүргээ биелүүл. Санжбэгзийн Төмөр-Очир багштайгаа салам яриад олигтойхон ажлаа хий л дээ. Л.Өлзийсайхан аятайхан хуульч, зарчимтай эмэгтэй. Гэхдээ энэ Зөвлөлдөхийг зохицуулж, зохион байгуулж байгаа чинь үнэндээ өөрийгөө доош нь хийсэн явдал боллоо, Өлзийсайхан аа.
Өөртэй тань адил хүйстэй ард түмэн эх орны иргэдийн тавиас илүү хувь байна. Ядаж тэднээсээ ганц төлөөлөл оруулчих эрх зүйч, жендерч, эх хүн, ухаант хүүхний сийрэг сэхээ мэдрэмж алга уу. Арай ч дээ, Өлзийсайхан аа, хуулиа мэддэг шиг, хувиа хичээлгүй, Төрийн энэ том ажлыг үнэн зөв, зарчимтай хий л дээ.
Г.Занданшатар даргын энэ хийн хэрэгжүүлэх гэж байгаа санал асуулгын Зөвлөлдөх зөвлөлийг судлаач Д.Ганхуяг балай, завхарсан юм гэсэн байна лээ. Боль гэсэн байна лээ. Үгүй л дээ. Энэ байх ёстой зүйл. Зарчмын зүйл.
Гэхдээ судлаач Ганаагийн хэлсэн балай завхарсан юм битгий болго л доо. Улс орон чинь улдаж балбаж гүйцээд, ард түмэн чинь туйлдаж навсайгаад ухаантай төртэй болъё гээд байна шүү дээ. Намынхаа Генсекийг тавьдаггүй, улсын татварыг улайдсан ч тавихгүй гэчихээд зүйл бүрээр нэмээд, нүүр ширлэн суугаа Засгийн хэрэг эрхлэхийн, Ардын намын аугаа хүчний Генсек Дашзэвэгийн Амарбаясгалан дарга минь энэ ажилд анхаарлаа хандуулаач ээ.
Л.Оюун-Эрдэнэтэйгээ үнэхээр л нэг байгаа юм бол түүнтэйгээ хамт зүтгэ л дээ. А.Ариунзаяаг тордож байгаа шиг ээ. Жендерийн төлөөллөө энэ Зөвлөлдөхөд шингээж, зөв зарчмыг ханга л даа. “Улаан бал”-д орж нэг уналаа. Залруулга хийгээд л. Одоо залруулагагүй, баараггүй, зөв, унахгүйгээр Зөвлөлдөхийн зөвлөлөө тунгалаг хийгээд өг л дөө, эх орон, ард түмэндээ, төр улсдаа.
Та нар нүүрсний хулгайгаа шийдэж, эзнийг нь олж чадахгүй юм бол хүн төрөлхтний бүтээчихсэн төрийн зөвийн дээд болсон ардчиллын суурь сонгуулийн тогтолцоо, хүйсийн тэгш байдлыг хангаад ард түмэн маниусынхаа дээр таахалз л даа. Тэгвэл хамаагүй мөргөөд л сууцгаая л даа. Тийм боломжийг олгоод өгөөч. Хоёр шил архи барьчихаад л энд тэнд аргацаагаад нэгнээ хуураад явах юм. Архинд бүү хүн шах гээд Гомбожавын Занданшатар дарга хууль гаргачихсан. Архи яахав ээ, хүний л хэрэгцээ, тааруулах ёстой.
Аа, харин Зөвлөлдөх зөвлөлөөрөө дамжуулж, жинхэнэ зөвийг ярих чинь тод зарчим. Тогмидын Доржханд, олон түмний яриад байгаа шиг Занданшатарыг ойгүй уншсан, мэдлэгийн дээд гээд ярьж байна лээ шүү дээ. Тогмидын Доржхандын хэлээд байгааг харуул, Зандан дарга аа.
Тогмидын Доржханд ч гэсэн дээ, Баатаржавын Мөнхсоёлынхоо нүдийг нь босгоод, энэ зөвлөлдөхөд оруулчихаж болоогүй юм уу. Гомбожавын Занданшатар дарга аа, уулын орой харж, усны эх барьж, ухаантай ажилла аа, аръяабал гэж.
З.БАЯРАА
Амлалт.мн
