Ерөнхий сайд Л.Оюун-Эрдэнэ төмөр зам, тээвэр ложистикийн салбарт “тэсэлгээ” хийнэ гэж мэдэгдэхтэй зэрэгцээд, орой нь УБТЗ хувь нийлүүлсэн нийгэмлэгийн нэг нэгжийн орлогчийг баривчлав.
С.Батдөл гэгч тэр хүний орон гэрээс лавтай найман тэрбум, хууль бусаар хөрөнгөжсөний нь илрэл болох дөрөв гаруй, арваад тэрбумыг төр хяналтдаа авчээ. С.Батдөлийн байгууллагын дарга Х.Хэрлэн. Энэ хүн Ашигт малтмал, газрын тосны хэрэг эрхлэхийн даргаар цөөнгүй жил ажилласан. Кадастрын дарга ч байсан. Төрийн өмчийн эрхтэн ч явсан. Олон чухал алба хашсан. Ариун замтай хүн болохоор л ингэж дэвшээд байдаг биз ээ. Харин одоогийн хашиж байгаа ажлын нь, энэ байгууллагын нь хувьд асуудал бугшсан байгааг Батдөлийн явдал хэлээд өглөө.
Яригдаад л байсан л даа. Тээврийн бизнес хийгээд, хэлэх үгээ олж ядсан залуус хаа сайгүй явсан, ийм учиртай нь хэнд ч ойлгомжтой. Монгол улс суулийн жилүүдэд тээврийн салбар, хил гааль зогсоод улсаараа модоо барьж байна шүү дээ. Улсын Ерөнхий сайд нь хүртэл хилийн боомт дээр очоод, хийж байгаа ажлуудыг нь хараад хэлэх үггүй болж байсан.
Зам тээвэр, боомт гаалийн салбарын арчаагүй байдал үндэстнийг үгүйрүүлжээ. Сү.Батбодын дүү гэдэг Б.Асралт гэдэг хүн саяхан ажлаа өгсөн. Тэр хүн гаальд ажиллаад лав гийгүүлсэнгүй. Гааль татвараас бүрдэх ёстой нүүрсний орлого байгаагүй нь ганцхан жишээ нь.
Одоо энэ Х.Хэрлэн гэдэг хүн лав л эртхэн огцрох өөрт нь өлзий болжээ. Би удирдаж чадсангүй ээ, энэ байгууллагын хүмүүс авлигад идэгджээ, би энэ байгууллагаа авлига, хүнд сурталгүй удирдаж чадсангүй гээд өнөөдрөөс ажлаа өгсөн нь дээр. Салбарын яам ч үүнийг нь хийлгэх хэрэгтэй. Шилэн толиноороо, шударгаараа гайхуулдаг Цогоо хүртэл түүнийг томилогчдын Удирдах зөвлөлд байдаг биз дээ.
Зам тээврийн яам, төмөр замын хувь нийлүүлсэн байгууллагын Удирдах зөвлөл, Засгийн газар хаана хаанаа яриад энэ асуудлыг нэг тийш болгоосой. С.Батдөлд арвантэрбум байгаа юм чинь, бусад дээд дарга нарт тэр байтугай зуун тэрбум байгаа биз. Эл байгууллага гучин тэрбумын алдагдалтай ажилладаг гэнэ лээ. Гэтэл нэг жижиг даргын гэрээс арван тэрбум. Яасан эх орон, ард түмнээ боддоггүй галзуурсан дээрэмчид вэ.
Д.Амарбаясгалан дарга ажлын хэсэг гаргаад ажиллах хэрэгтэй. Зам тээврийн салбарын засаггүйдлийг залруулах ажлыг хийх хэрэгтэй. Нэгдүгээр төрөхийг шалгаж байгаа шиг юу ч биш болж болохгүй. Ерөнхий сайд чинь ажиллаад, хана босгоод ажиллаад байна шүү дээ. Монгол банкны дарга нар, Их Хурал, Засгийн эрхтнүүдийн гэр бүлийнхэн Ерөнхий сайдын хэлсэнийг сана.
Нэг бол ажлаа өг. Тэгээд банк бусаа хий. Ирэх зургадугаар сар гэхэд эх орныг цөлмөгч хүмүүсийг ажлаасаа яв гэж Ерөнхий сайд өндөр дээд нинж сэтгэл дэвслээ. Ард түмэн бол арван хоног ч хүлээхийг хүсэхгүй байна. Энэ бол ердийн шударга ёс.
Нэг зүйлийг та бүхэн анзаарав уу, Төмөр замын Батдөлийн 10 тэрбумын "хэргийг" АТГ биш, ЭЦГ илрүүллээ шүү дээ...
З.БАЯРАА
Амлалт.мн
