Монгол банк, Төрийн банкын эрхтнүүдийн банк бусыг Засгийн газар удахгүй зарлана гэсэн. Үүнийг нэн даруй хийх хэрэгтэй. Ерөнхий сайдын шударга бустай тэмцэж байгаа үйл хэргийг ард түмэн сайшааж байна. Буруушааж байна.
Яаж буруушааж байна гэхээр удаан байна, үр дүнг түргэн гаргах хэрэгтэй гэж байна. Хэцүү л дээ. Ийм аймаар үндэстэй, ийм хэцүү торыг хамх цохих мэдээж өөрийн нь хэлдгээр амаргүй. Гэхдээ яана гэх вэ.
Амаргүйг давж амрыг тогтоодог зүй тогтолтойгоос хойш. Нэг жишээ татъя. Нэг хүн нүүрсний мөргөцөг хулгайлаагүй гээд байсан. “Ажнай” л даа. Тэгсэн, үнэн гүйцэгдэх шиг боллоо. Тэр авсанаа зөвшөөрөөд, буцаагаад төлбөрийг нь хийж байна гэж бүгд ярьж байна. Энэ асуудлыг УИХ-ын гишүүн Л.Энхболд гэдэг хүн анх ярьсан.
Түүнийг худал ярилаа, юу яриад байгаа юм энэ тэр гэдэг асуудал их удаан үргэлжилсэн. Тэр Энхболд УИХ- аас унах болтлоо л тэр асуудалтай зууралдах шиг болсон. Эргээд харахад тэр нөхөр үнэн л яриад байсан бололтой. Л.Энхболдын яриад байсан үнэнг, худлаа болгохын тулд их олон хүн ажилласан.
Шүүх, прокурор, АТГ, өөр ч олон байгууллагын идэвхтэнгүүд, нийгмийн эсрэг үзэл санаатнууд ажилласан нь ойлгомжтой. Тийм учраас тэр хэрэг одоо л олон нийт, ард түмний цухал, үнэмлэхүй олонхтой УИХ, үнэн тэмцэж байгаа Ерөнхий сайдын өнгөн дээр үнэнд нүйцэгдэж байгаа бололтой.
“Ажнай”-гаас өөр УИХ дахь хулгайчдын зам балархааргүй. Гэхдээ баллуурдахаас, баллахаас аргагүй. Ингэж байж, шударга ёс тогтоно. Үнэн мөн дийлнэ. Нийгмээрээ тэгш, нэг боломж дээр амьдрах ёстой шүү дээ.
Энэ үүднээс аваад хэлэхэд, одоо энэ УИХ, Засгийн газарт ажиллаж байгаа хязгааргүй эрх мэдэлтнүүдээ, та нараас нэг нь ч гэсэн үнэнд гэрэл нэмж, үгүйрсэн ард түмнийхээ сэтгэлд итгэл өгч, наад сэнтийгээсээ татгалзаач ээ.
Ийм шударга бус төрд ажиллаж чадахгүй нь, ингэж түмэн олноо, төр улсаа үгүйсгэж чадахгүй нь гээд ажлаа өг. Бусдыгаа ичээтэл үлгэрлээд өгөөч. Баттөмөрийн Энхбаяраас эхлээд, чадна даа. Батболд бол чадахгүй байж мэднэ. Чадаж ч мэдэх, цаадах чинь.
Энэ удаа бол “Ажнай” эхэлсэн нь зөв байх. Энэ нүүрсний хэргийн эхний шахуу их “үйлстэний” хувьд “Ажнай”-гаар эхлүүлье. Тэр чадах нь шиг байна. Яагаад гэхээр одоогоор үйлдлээ ойлгоод, мөргөцөг туучихсанаа зөвшөөрөөд, төлбөр мөнгөө барагдуулаад явж байгаа хүн гэж түмэн олон, төр ч хэлээд байх шиг байна.
Төр төлбөр тооцооны нь хуулгыг харуулаад, төрсөн бие, үг үйлдлээрээ энэ хүн ард түмэн, эх орондоо шударга ёсны “баатар” болж, араасаа олон олон “баатрыг төрүүлж”, төр улсдаа түмэнтээ гавьяа байгуулах хэрэгтэй байна.
Үүний тулд бүгдээрээ, бултаараа “Ажнай”-гаа дэмжье. Асуудлаа шийдэж, үнэний эрэгт оччихоод, энэ их шударга бусд баатар болоод Хонконгт байдаг гэх усны хөлөгтөө эх орны үнэнч иргэний хувиар итгэл төгс хүрдийг нь эргүүлж, эрх чөлөөтэй яваач гэж шахацгаая, шаардацгаая. Чадаж ч мэдэх, цаадах чинь.
З.БАЯРАА
