Төрийн эрх барих дээд байгууллагын дарга Г.Занданшатар хоёргүй утгаар хэлжээ. Тэрбээр, Монгол банк, Төрийн банк, Хөгжлийн банканд байршсан, Банк бус санхүүгийн байгууллагын эзэн дарга нарт, эсвэл банк бусын ажлаа хий, эс бөгөөс албаны банкны ажлаа хий, нэгийг нь л хий гэж өгөөмрөөр сануулжээ.
Ингэж сануулаад удаж байгаа. Ерөнхий сайд эхлээд хэлсэн байх. Төрийн бодлогын банкуудад сэнтий сандаалчихаад, мэдээлэлд ойрын утгаар шавчихаад, иргэдэд үнэтэй зээл хүүлж суух бол, угаасаа ёс зүйтэй, иргэншиж, хөгжсөн оронд бол огтоос зөвшөөрөмгүй.
Тийм орнуудад ингэж хоёрдмол алба хаших хэнээтэн ч үгүй юм л даа. Тиймээс банк бусын эзэн атлаа төрийн эрх мэдэл бүхий банкинд суугсад шалавхан нэг ажлаа хийж, нийгэмд зөв үлгэрийг нэн даруй үзүүлэх хэрэгтэй байна.
Банк бусын эзэд гэснээс өчигдөр АТГ мэдээлэл хийлээ. Тэр мэдээлэл дотор Төрийн өмчит аж ахуйн нэгжийн албан тушаалтан байсан, шалгагдаж байгаа нөхдүүд банк бусаар мөнгөө угаасан, хөрвүүлсэн гэсэн мэдээллийг чих дэлдийлгэн хэлж байна лээ.
АТГ-ын дарга өчигдөр нийтийн сүлжээнд албан тушаалд томилогдсоноосоо хойш улсын орлого болгосон мөнгөний дүнгүүдээ өөрийнхөө зурагтай зэрэгцүүлэн тавьж “гангарав”.
Ихэнх нь төрийн өмчит голдуу компанийн шамшигдууллаас улсдаа буцаан олгож төвлөрүүлсэн хэдэн их тэрбумын тоо харагдана билээ. Зөв л дөө. Харахад болхи боловч З.Дашдаваа гэдэг хүн ажлаа хийж байгааг харж болохоор байна. Түүний албатуудын мэдээлсэнээр, Эрдэнэс Таван толгойн дарга байсан Б.Ганхуягийн боолхой шиг билээ дээ, өчнөөн тэрбумыг улсад хяналтад авсан байна. Өндөр өндөр байшин, хаус болгож. Спорт ордон болгож. Өндөр байшингуудаа бас түрээслэж тэрбумаар мөнгө олж.
Манай авлигачид төгсөрчээ. Лондонгоос хүртэл арван хэдэн тэрбумын хаус хурааж. Эзний нь нэрийг харин хэлэхгүй байна. Найз нартаа, хамаарал бүхий компанийн захирлуудад хөрс хуулалт, тээврийн боломжийг шударга бусаар олгон хахуул авдаг байсныг урьдчилсан байдлаар тогтоож чадсанаа АТГ-ын албан тушаалтнууд өчигдөр мэдээллээ.
Нийтийн олны сүлжээгээр дроноор авсан зураглалыг нээлттэй олон нийтэд харууллаа. Ер нь ингээд, нийтийн баялагийг хуссан, хулгайлсан нөхдийн хулгайн зам юу босгосныг яралзтал харуулаад баймаар байна. Мөнгө мөртэй гэж Хөгжлийн банкны захирал Н.Мандуул хэлээд байгаа шүү дээ. Мандуулын ч үг биш байх, шударга ёс, нийтийн хэмжээ, ёс зүй эрт тогтсон иргэншсэн орнуудаас импортлогдсон үг байх. Гэхдээ их үнэн үг байна.
Хан-Уул дүүрэгт балгас байгаад одоо ордон болсон байшинд “Транс банк” байрладаг, энд Сангийн сайд Б.Жавхлангийн хамаарал, хамсаатнуудын нь хамаарал байна уу гээд л “дорондоод” байх хэрэгтэй, АТГ-ын шударга мөрдөгчид. З.Дашдаваа дарга арга зүй, удирдлагаар залан хангаад байх хэрэгтэй.
Яагаад ингэж “мөчлөн жиргэж” үзүүл гээд байна гэхээр, баримт, мөрдлөгийг нь хийгээд өгсөн хэргийг ШҮҮХ, ПРОКУРОР дээр удаагаад, “утаад”, юу ч биш болгодог байдал даамжирч, үүнээс үүдээд шударга ёс алдагдан, хулгайчид хуулиас мултраад байдаг шүү дээ. Тийм учраас л ШҮҮХ, ПОРКУРОРЫНХОНД баримтыг нь палайтал, баригдтал үзүүлээд, асуудлыг шийдэхийг нийгэм, олон нийт хүлээгээд, хүсээд байх хэрэгтэй байгаа юм.
Санах ойгоо байнга давтамжтай байлгах хэрэгтэй, ард түмэн. Дээд шүүхийн дарга Д.Ганзоригийг улс төртэй холбоотой асуудлаар АТГ асууж шалгаж байгаа юм гэв үү дээ. Улс төртэй холбоотой асуудлаар ээрэгдэх завдал өгөлгүй л, Ерөнхий прокурор Б.Жаргалсайхантайгаа онь холбоод л барим тавим хэргүүдийг шийдээд ажиллачихмаар байгаа юм.
Тээвэр ложистикийн хэрэг, Нүүрсний хэрэг, Хөгжлийн банкны хэрэг, Төмөр замын хэрэг гээд шил шилээ даран хүлээж байна шүү дээ. Дөчин их наядын хулгайтай. Ерөнхий сайд Л.Оюун-Эрдэнийн шүүхийг харж байна гэдэг үүнийг л дамжуулж хэлээд байгаа юм. Иргэдийнхээ үгийг дамжуулж байгаа юм. Иргэд тэгэж хэлэхээр нь төрдөө итгэмээр байгаа юм.
З. БАЯРАА
Амлалт.мн
