Хуваарь ёсоор долоо хоног бүрийн лхагва гараг бүр Засгийн газар ээлжит хуралдаанаа хийдэг билээ. Өнөөдрийн /2023.02.01/ ээлжит хуралдаанаар 17 асуудлыг хэлэлцсэн байна. Хуралдаанаас гарсан голлох шийдвэрүүдийг сайд нар танилцуулдаг билээ.
Хуралдаанаас гарсан шийдвэрийг БХБ-ын сайд Ц.Даваасүрэн мэдээлэл өглөө.
Тэрбээр "Өнөөдрийн хуралдаанаар Орхоны хөндийд шинэ Хархорум хот байгуулах ажлыг эрчимжүүлэх чиглэлээр хоёр шийдвэр гарлаа.
Нэгдүгээрт, энэ ажлыг удирдаж чиглэл өгөх үндэсний хороо байгуулах шийдвэр гарсан байгаа. Үндэсний хороог би ахлаад, яамдын сайд, дэд сайдууд оролцоно.
Хоёрдугаарт, Шинэ Хархорум хотын бүтээн байгуулалтын захиргааг байгуулж байгаа. Энэ захиргаа мэргэжлийн удирдлага, зохион байгуулалт, менежментээр хангах, төслийн хэрэгжилтийн явцад мониторинг хийх үүрэгтэй. Өнөөдрийн байдлаар бид инженер, геодезийн судалгаа хийж байна. Тодруулан хэлбэл, газрын бүтэц, хөрсийг судалж байна. Мөн ус, цаг уурын, газар хөдлөлтийг судалж байна. Геодезийн судалгаа дууссаны дараа байршлыг тогтооно. Яг шинэ Хархорум хот хаана байрших юм бэ гэдгийг тогтоож өгнө гэсэн үг. Үүний дараа хаана ямар байгууллагуудыг байгуулж, зам тээврээ хэрхэн шийдэхийг төлөвлөнө" хэмээв.
