Гишүүний шинж төлөв: Хэн УИХ-ын гишүүн байж чадах вэ! /Цуврал/– Нямаагийн Энхболд
Эс чадах нь иргэдийнхээ дунд орон чадахаа хийж, сонгох эрхээ эдлэн, нийтийн баялагийг бүтээлцэх учиртай
Энэ олон жил УИХ-д суусан танаас ингэж асуух эрх Монголын ард түмэнд зүй ёсоор бий
Үндсэн хуулийн өөрчлөлтийг Намбарын Энхбаяраас илүү Нямаагийн Энхболд хямгадан барьж, эмхлэн удирдаж байх ёстой юм л даа. Зургаа, долоо сонгогдсон, одоо энэ УИХ-д суугаа зоноос хамгийн луугар нь шүү дээ, уг нь.
Нас намба, туршлагын хувьд. Гэвч тэгэхгүй юм. Угаас суумалдуу л эр л дээ, бүх зам нь л нэг тийм “хашигнаа”, гэвч эрх мэдлийн, сонгогчдоос санал авахын тухайтад “хүлэг” байж ирлээ ирлээ. Маргах юм алга. Их хурлын гишүүн хүн иймэрхүү байвал байхаар даа гэх имижийг бүрдүүлсэн. Өч төчнөөн л хууль боловсруулж, өргөн барьж, батлуулж, хууль тогтоосныг үгүйсгэх юм алга.
Гэхдээ аваргаас бас асуух “ял” байгаа л юм. Юун хэмээвээс, өнөөдрийн энэ хэн нь мэдэгдэхгүй олон “усан” гишүүнийг Төрийн эрх барих дээд байгууллагад оруулж ирсэн бэ гэдэгт хариултыг Нямаагийн Энхболдоос асуумаар л болдог.
Намдаа, сонгогчдод Их хурлын гишүүн гэдэг чинь иймэрхүү, үгүй ядаж миний эрэмбийн түвшний хүн байгаамаар байгаа юм шүү дээ гэдгийг бага ойлгуулж ирсэнээрээ “буруудах” л хүн.
Хүршгүй том, эгнэшгүй бядыг эрдэм боловсрол, ухаан тулхаараа үзүүлчихээд, өөрийгөө заан, иймэрхүү хүмүүс Их хуралд орж ирдэг юм аа гээд сууж байхад хэн Н.Энхболдтой заргалдах билээ. Энэ агуулгаар оройлоогүйн буруу бий юу гэвэл том утгаараа буруутай аа.
Түвшин намбатай, цулбуур хамжаарга сайтай, ёс зүйн талаар ч муугүй байж ирсэн гишүүн бас мөн үү гэвэл мөн. УИХ-ын дэд дарга, хоёр гурван удаа Засгийн газрын гишүүн хийв. Бүлгийн дарга ч байв. Эрх мэдлийг бол оройлсоон оройлсон. Хүн арлаараа ч тийм ядруу эр биш байх. Энэ олон сонгогдоход хүн байхуйн утга нь мэдээж шилэгдэж ирээ биз. Үндсэн хуулинд хүнийг нас зүсээр нь ялгаж огт үл болно гээд хуульчилчихсан. Бүгд баримтлах, дээдлэх ёстой.
Гэхдээ одоо Н.Энхболд гишүүний тухайтад, Үндсэн хуулийн энэ цаг үед яриад байгаа өөрчлөлтийг Л.Оюун-Эрдэнэ, Д.Амарбаясгалан нарынхаа яриад байгаачлан, Н.Энхбаяр даргын хэтийдүүлэн “бичсэнийг” эдүгээн нийгмийн хүсээд байгаачлан аятайхан болгож батлуулаад чөлөөндөө суусан нь их ононо.
Энэ нь намын хууль, сонгуулийн тогтолцоо, гишүүдийн тоо гээд асуудлууд. Нямаагийн Энхболд парламентэд “аваргалсанаараа” Хорлоогийн Баянмөнхийн ногоон дэвжээнд дэхээс үл дутах. Төв аймгийнханыхаа, сонгогчдынхоо буян хишигт мөргөм.
Одоо “Гарьд Магнай”-н Сандаг аварга шиг “зодог шуудгаа” тайлаад, хүний өөрийн намын Төв аймгаар дүүрэн “давхидаг” Г.Сурмаа, Д.Доржпүрэв гээд залуухан “Гарьд магнай”-нуудын алган дээр тавьж өлзий буян болох хэрэгтэй.
Нам засгаас нэг айлаас нэг л хүн төрийн дээд албан ажил эрхэл гээд байх шиг байна. Оюук, Амраак дарга нар тэгж хандаад, хууль “явж” байгаа. Хүү, хүргэд нь Төрийн ёслол, дипломатын дарга нар хийж байх шиг байна.
Одоо заавал Ө.Энхтүвшинтэй барьцан “заалдаж” Австралид сууна барина гэхгүй Хустайд янжуур сууж, тахь харж, шатар нүүн, хүрэн дарс балгасхийж суух нь жаргал биш үү дээ гэж хэн хүн хэлмээр УИХ-д удлаа. Нуруугаа амраах хэрэгтэй ээ. Дал ч бараг хүрч байх шиг байна. Ерөнхийдөө бол УИХ-ын гишүүний хэв шинжийн боломжийн сайхан дүр-өвийг үлдээж байгаагаараа хүндлүүштэй.
Одоо харин, энэ олон идэж уудаг, худалч хулгайч дүү гишүүддээ ёс зүй гэж ямар байдаг, төрийн хүн шуналгүй байх ёстой, ямар агуулгаар улсаа тулах гээд олон талаар хичээл заан лекцлэх хэрэгтэй байна.
Төр улс чинь амаргүй байна шүү, Нямаагийн Энхболд гишүүн ээ. УИХ, Засгийн газар яагаад хулгайч луйварчдаар дүүрэв ээ. Энэ олон жил УИХ-д суусан танаас ингэж асуух эрх Монголын ард түмэнд зүй ёсоор бий.
Та энд нэг төгс төгөлдөр хариулаач гэж иргэний хувьд хэлэх байна. Ийм иргэн гурван сая, дөрвөн зуу байна.
З. БАЯРАА
Амлалт.мн
