УИХ-ын чуулган завсарлаж, эрхэм гишүүдийн “төрхөмдөө анхаардаг” давалгаа эхэлж. Эхнээсээ тойргийнхноо “тойглож” байна. Тор дүүрэн дүүрэн бэлэг гардуулж байна, “Тайлан” гэсэн автортай, нүүр дүүрэн өөрийнхөө зурагтай сэтгүүл дагалдуулсан харагдах. Сар шинэ дөхсөний нотолгоо энэ. Дасал болсон л дүр зураг даа...
Манайхан ч яахав авах дуртай. Авсаныхаа дараа ойгүй саймширна. Өнөө хэдэн гишүүнээ хэсэгтээ л магтана. Хир халдаахгүй. Мань улс төрчид ч иргэдийнхээ энэ зан дээр “тоглолт хийгээд” сурчихсан. Баяр ёслол дөхөхөөр л “ясны өглөгч” зан гаргана. Бэлгээр “бөмбөгдөнө”. “Би ингэлээ” гэж хойно нь хэсэг “попроно”.
УИХ-ын гишүүн гэгдэж, ард түмнээ төлөөлөн, төрд ажиллаж байгаагийн хувьд жилийн эцэст ажлаа тайлагнах нь зүйн хэрэг. Том баннер, толигор сэтгүүлийг нь ингэж зөвтгөе. Харин тор дүүрэн бэлгийг бол яагаад ч дэмжихгүй ээ. Уг нь тэдний ажил бэлэг тараах биш. Улс орноо өнгөтэй, өөдтэй авч явах нь л гол. Тэр хэрэг нь бүтэмжтэй бол ийн “пялдагадахын” шалтгаан ч үгүй. Ядаж үнэхээр өгмөөр байгаа бол мэдрэмжтэй хандах хэрэгтэй шүү дээ.
Үгүй ядаж элдэв бусын амттан, шимттэн, чихэр, жигнэмэгээс татгалзаж хүнд хэрэгтэй зүйл бэлэглэдэг баймаар. Ялангуяа архийг бол бүр хойш тавьбал зохино. Гишүүнийхээ бэлэглэсэн архинд халамцсан нэг нөхөр гэр бүлээ хүчирхийлбэл хэн хариуцлагыг нь хүлээх вэ? Хойтох үр дагаврыг нь боддог байя. Тэр нь зөв. Тиймгүй л бол нэг нь өгсөн нэр зүүж, нөгөөх нь авсан нэр зүүх хуурмаглалыг өөгшүүлэх шаардлагагүй.
“Оргилын” гэгддэг Ж.Ганбаатар гишүүний бэлгийн богцноос гэхэд л хугацаа нь дуусах дөхсөн компот, ундаа гарсан байна билээ. “Удахгүй хугацаа нь дуусаж устгалд оруулах” ёстой бараануудаа “зориуд” бэлэг нэрээр тойргийнхондоо “шахчихаа юу л” гэлтэй. Баярлуулах бус "балаг" тарьж, баахан хүн хордох вий дээ.
Гэтэл О.Цогтгэрэл хажууд нь овоо дориун юм хийж яваа үзэгдэх. Тойргийнхоо хүүхдүүдийг таблеттай болгох гэнэ. Эхнээс нь гардуулж байна билээ. Энэ харин зүйтэй ээ. Улсын ирээдүй болсон хүүхэд, багачууд технологийн дэвшилтэй танилцаж, тасралтгүй шинэчлэгдэж буй цаг үетэйгээ уралдан хөгжих боломж бүрдэж байгаа юм. Мөн Увс аймгийн сумдад түргэн тусламжийн автомашин ч гардуулж өгсөн байна.
Жишээ татахад л ийм. Тэрнээс үнэтэй, цайтайдаа гол нь биш. Хэрэгтэй юмыг нь өгнө гэдэг чинь энэ. Мэдрэнэ гэдэг нь энэ. Хий дэмий архи, амттан, хугацаа нь дуусах дөхсөн тэргүүтнээс л хавь илүү шүү дээ.
Өгвөл өгсөн шиг хүнд хэрэгтэй зүйл өгье. Эс бөгөөс өгөхөө болъё...
Д.Дамдин
Amlalt.mn
