Даатгалын байгууллагуудаас нийслэлд өнгөрсөн амралтын өдөр болсон үерт автсан айл өрх, урссан автомашины хохирлыг тооцон үнэлж эхэллээ.
Тухайлбал, даатгалын “Миг” компани гэхэд энэ удаагийн үерээр 8 автомашин урсаж, 2 автомашин бүрэн эвдэрч хохирсон талаарх дуудлагыг хүлээн аваад байна. Хохирлыг барагдуулах тал дээр бүрэн эвдэрч сүйдсэн 2 автомашины хувьд шинийг авч өгөх, урссан гэх бусад автомашины хувьд эд, ангийг зориулалтын дагуу хатааж ээлжит засвар хийснээр хэвийн болох боломжтойг мэдээллээ. Эдгээрийг үзлэгт хамруулж, үнэлэх, хохирлыг тогтоохоор ажиллаж байна.
Хохирлын болон нөхөн олгох төлбөрийн хэмжээ тухайн тээврийн хэрэгслийг хэдэн төгрөгөөр даатгуулснаар хамаарах аж. Жишээ нь, “Приус” маркийн автомашиныг 15 сая төгрөгөөр даатгуулсан нөхцөлд тэр хэмжээний мөнгийг шууд олгох юм уу адилхан, он ижил загварын автомашинаар сольж өгөх байдлаар хохирлыг барагдуулна. Нийтдээ 250 сая төгрөгnийн нөхөн төлбөрийг олгохоор ажиллаж байгааг “Миг” компаниас мэдэгдэж байна.
Үерт автсан нэг автомашины хохирлын хэмжээг дунджаар 15 сая төгрөгөөр тооцож байна.
Даатгалын байгууллагуудын мэдээллээр энэ зун нийслэлд болсон 3 удаагийн үерт нийтдээ 250 автомашин өртжээ. Үерт урссан, эвдэрсэн машинуудыг дуудлагын ачилтын машин хөлслөн зориулалтын зогсоол болон гараашд аваачиж, хатаан зохих заавар зөвлөгөөг өгөн ажиллаж байна. Иргэд, тээврийн хэрэгслийн эзэмшигч нарт учирч болзошгүй эрсдлийг тооцох, хохирлын үнэлгээг тогтоох, энэ талын мэдээлэл, хандлагыг өгч төлөвшүүлэх нь чухал байгааг даатгалын байгууллагын ажилтан, мэргэжилтнүүд хэлж байна.
Тээврийн хэрэгслийн болон эд хөрөнгийн даатгалд хамрагдан хураамж төлж, даатгуулсан иргэд нөхөн төлбөрөө авах боломжтой байна.
Зарим даатгалын байгууллага хохирол учирсан харилцагч нартаа нөхөн төлбөрийн урьдчилгаа хэмээн нэг сая хүртэлх хэмжээний мөнгийг шууд олгож байна. Гэхдээ дээрх хэмжээний мөнгийг ослын дуудлагын дараа үзлэг хийсэн нөхцөлд өгч байна. Энэ мөнгийг үерт өртөж автсан иргэд, айл өрх яаралтай тусламжийн үед анхдагч хэрэгцээ болох ус, ундаа авах, гэр байшин, автомашиндаа анхны засвар хийхэд зарцуулах аж.
Гэр орон, эд хөрөнгө, автомашин, тээврийн хэрэгслээ даатгуулсан иргэд, айл өрхөд даатгалын нөхөн төлбөр олгохоор ажиллаж байна. Нэг айлын гэрийг 5 сая төгрөгөөр тооцон бодоход нэг тэрбум гаруй төгрөгийн хохирлыг барагдуулах боломжтой аж.
Эх сурвалж: Монцамэ
