Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн тахианы махны хэрэгцээ, өсөлтийн талаар мэдээлэл өглөө.
Тэрбээр “Манай улсын тахианы махны хэрэглээ жил бүр 20 хувиар өсч байна. Тухайлбал, 2023 онд гадаадаас 50-60 сая ам.доллароор 22 мянга гаруй тонн тахианы махыг худалдан авсан. Ирэх таван жилд тахианы махны хэрэглээг дотоодоос бүрэн хангана. “Хүнсний хангамж, аюулгүй байдал” үндэсний хөдөлгөөний хүрээнд аж ахуйн нэгжүүдэд бүх төрлийн дэмжлэг үзүүлж байна.” гэж амлан хэллээ.
Хүнсний Инженер О. Гал-Очир фейсбүүктээ тахианы махтай холбоотой мэдээлэл бичжээ. Тахианы махны шимт чанарыг үхрийн махтай зарим талаар харьцуулж үзье. 100 гр үхрийн мах 250 ккал байхад тахианы мах 230 ккал буюу арай бага байдаг. Энэ нь өөх тос багатай байдагтай холбоотой. Үхрийн махыг бодвол тахианы маханд агуулагдах өөх нь ханасан тосны хүчил өндөртэй, идэш тэжээлээс шалтгаалж А, Е, К аминдэм өндөр хэмжээнд агуулдаг, В1, В3, В5-ийн төрлийн аминдэмээр баялаг байдаг бөгөөд үхрийн мах нь B12 аминдэмээр маш баялаг байдаг. Сонирхолтой нь 100 гр үхрийн мах 26 гр уураг агуулдаг, бусад нь тос, чийгийн агууламжаас бүрдэж байхад тахианы мах 100 гр-даа 44 гр уураг агуулдаг өндөр уурагт маханд тооцогддог.
Б.БАЯРМАА
