Ардчилсан нам өнөөдөр /2024.03.24/ 2024 оны УИХ-ын ээлжит сонгуульд оролцох “Бүтэн Монгол, Бүрэн ардчилал 9+90+900” эрчимт хөгжлийн төлөвлөгөө бүхий мөрийн хөтөлбөрөө Үндэсний Аудитын газарт албан ёсоор хүлээлгэн өглөө.
Ардчилсан намын Стратеги бодлого, сургалт судалгааны газрын дарга Г.Дэнзэнгээр ахлуулсан мөрийн хөтөлбөр боловсруулах ажлын хэсэг, Ардчилсан намын Ерөнхий Нарийн бичгийн даргын үүрэг гүйцэтгэгч Э.Одбаяр, УИХ-ын гишүүн, ҮБХ-ны дарга Ж.Батсуурь, УИХ-ын гишүүн Ц.Туваан, УИХ-ын гишүүн Н.Ганибал, Ардчилсан намын Улс төрийн зөвлөлийн гишүүн М.Чимэддорж, Ардчилсан намын Хэрэг Эрхлэх газрын дарга Н.Лхагвадорж тэргүүтэй төлөөллүүд улс орны өнцөг булан бүрээс олон мянган гишүүд, дэмжигчдээсээ авсан саналыг нэгтгэн боловсруулсан мөрийн хөтөлбөрийн бодлогын баримт бичгийг Үндэсний Аудитын газарт хүлээлгэн өгсөн юм.
Энэ үеэр Ардчилсан намын Үндэсний бодлогын хорооны дарга, УИХ-ын гишүүн Ж.Батсуурь “Ардчилсан нам 9 бүлэг, 90 дэд хэсэг, 900 ажлыг багцалсан мөрийн хөтөлбөр боловсруулсан.
Өнгөрсөн хугацаанд Ардчилсан намаас дэвшүүлсэн тавьсан мөрийн хөтөлбөрүүд Хүний эрх, эрх чөлөө, бизнесийн эрх чөлөө, хувийн өмчийг дээдэлсэн бодлого боловсруулж ирсэн нь түүхэнд тэмдэглэгдэн үлдсэн. Харамсалтай нь сүүлийн жилүүдэд Монгол Улс олон улсын судалгаа дүгнэлтээр ардчиллын индексээр удаа дараа ухарсан үзүүлэлттэй гарахаас гадна, авлигын индексээр 40 гаруй байраар ухарсан уналт, ухралтын жил байсныг улс орон даяар хүн бүр харлаа.
Тиймээс Ардчилсан нам Засгийн газраа байгуулбал энэ алдаа завхралыг богино хугацаанд засч, эдийн засгийг сэргээснээр “Монгол хүн өргүй, монгол төрийн дарамтгүй болно ”гэлээ.
