“Монполимет”-ын Ц.Гарамжавыг баривчилсан явдал үндэсний үйлдвэрлэгч, хувийн хэвшлийнхэнд, олон нийтэд цочирдом явдал болж байна.
Нийтийн сүлжээ, цахим орчинд иргэд, олон нийт энэ баривчилгааг буруутган, асар өргөн хэлэлцүүлэг өрнөж байгаа нь ил.
Энэ эмэгтэй цементийн үйлдвэр барьсан, ингэхдээ ихээхэн хэмжээний зээлийг Хөгжлийн банкнаас авч санхүүжүүлсэн. Буцаагаад, хүүний хамт авсан зээлээ бараг нугалаад төллөө гэж мэдэгдэж байв. Энэ нь ч үнэн байх.
Цементийн үйлдвэрийг барьснаар монголчууд импортын цементийн гачаал, үнийн дарангуйлаас басхүү чөлөөлөгдсөн нь үнэн. Гэтэл энэхүү чухал үйлдвэрийг байгуулагч Ц.Гарамжавыг мөнгө угаасан байж болзошгүй, зээлээ зориулалтын бусаар зарцуулсан байж болзошгүй зэрэг үндэслэлээр шалгаж байгааг холбогдох байгууллагынхан мэдэгдлээ. Хэрэв ийм явдал болсон бол хуулийн байгууллагаас шалгах нь зүйн хэрэг.
Гэхдээ Ц.Гарамжавыг заавал хорьж цагдан шалгах учир байсан уу гэдэгт олон нийт үгүйсгэх хандлага илт ажиглагдаж байна.
Ц.Гарамжав нь улс төрд орохгүй гэдгээ мэдэгдэж байсан. Нөгөөтэйгүүр энэ хүн бол аравдугаар Богдын эмээ юм. Улс төрийн болон өөр бусармаг явдлын золиос бүү болоосой гэдэг үнэмшлийг иргэдийн байр суурь илэрхийлж байгааг анзаарууштай.
Ц.Гарамжавын өнөөдөр, Монголын эдийн засагт үзүүлж байгаа үйлдвэрийн нь сайн нөлөө, эдийн засгийн дэмжлэг, импортыг орлосон бүтээгдэхүүн зэргийг нь үзэхэд, тэрбээр үйлдэл, замналаараа эх оронч, бүтээгч хүний үйлдэлтэй нь худал биш билээ. Тиймээс Ц. Гарамжавыг барьж хорьсон явдлыг хэрхэн үзэх вэ!
Аливаа улс орныг улс төрчдөөс илүүтэй Ц.Гарамжав шиг бүтээн байгуулагчид, үйлдвэр эрхлэгчид, бизнесменүүд авч явдаг гэдгийг эрхбиш иргэд мэддэг болсон цаг даа.
З.ДОРНО
Amlalt.mn
