Монгол Улс анхдугаар Үндсэн хуулиа баталж, Бүгд найрамдах улсаа тунхагласан өдрийг угтан Төрийн аудитын байгууллагын албан хаагчийн тангараг өргөх ёслолын ажиллагааг Төрийн жинхэнэ албан хаагчийн тангараг өргөх журмын дагуу зохион байгуулдаг уламжлалтай.
Төрийн жинхэнэ албан хаагчийн шалгуурыг хангаж, Төрийн аудитын байгууллагын чиг үүргийг хэрэгжүүлэхэд шаардлагатай мэдлэг, ур чадварын тусгай шалгалт өгч томилогдсон албан хаагчдын тангараг өргөх ёслолын ажиллагааг Монгол Улсын Ерөнхий аудиторын тушаалаар зохион байгуулдаг. Өнөөдөр /2025.11.25/ дээрх шалгуурыг хангаж томилогдсон Үндэсний аудитын газар болон аймаг, нийслэл дэх Төрийн аудитын газрын албан хаагчид тангаргаа өргөлөө.
Энэ үеэр Монгол Улсын Ерөнхий аудитор С.Магнайсүрэн тангараг өргөсөн албан хаагчдад хандан хөндлөнгийн аливаа нөлөөнд үл автан, гагцхүү хуульд захирагдан үйл ажиллагаагаа явуулж, төрийн аудитын байгууллагын албан хаагчийн ёс зүйн хэм хэмжээг чанд сахиж, албан үүргээ үнэнч шударгаар биелүүлэх тангаргийн үнэ цэнэ, хариуцлагыг сануулж хэлсэн үгэндээ “…Өдөр бүр өргөсөн тангаргаа сахиж, албаны нэр хүндээ эрхэмлэн ажиллахыг та бүхнээс хүсье. Та нар төрийн жинхэнэ албан хаагчийн нийтлэг шаардлагыг хангаад зогсохгүй, төрийн тусгай албан хаагчийн чиг үүргийг хэрэгжүүлэх давхар үүрэгтэй, хос тангарагтай албан хаагчид. Тиймээс өдөр бүрийн үйл хэрэг тань Төрийн аудитын байгууллагын нэр хүндийг өргөж, Монгол Улсын хөгжлийн зорилтуудыг хэрэгжүүлэхэд хувь нэмрээ оруулна гэдэгт итгэлтэй байна гэлээ.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!