Сонгуулийн үр дүнгээр Улсын Их Хуралд дийлэнх олонхыг бүрдүүлсэн нам Монгол төрийн жолоог атгаж, улс орныг улстөр, эдийн засгийн хувьд тогтвортой, ард иргэдийн нийтлэг эрх ашгийг хамгаалж, амьдралын чанарыг сайжруулах чиглэлээр сонгуульд ялсан мөрийн хөтөлбөрөө хэрэгжүүлэн ажилладаг.

Эрх баригч нам ингэж ажиллана гэдгээ сонгуулийн үеэр мөрийн хөтөлбөрөөрөө дамжуулж иргэдэд амлаж, бодит бодлогоор, хэмжигдэхүйц үр дүнтэй ажиллах үүрэг, хариуцлага хүлээсэн, бас амласан.

Амлалт гэдэг төгсөх ангийн дурсгалын дэвтэр дээрх сэтгэл уярам үг биш. Ялангуяа мөрийн хөтөлбөрийн амлалт гэдэг бол УИХ-ын сонгуулийн үеэр ард иргэд, эрх баригч хоёрын хооронд хийсэн гэрээний төсөл батлагдсан гэсэн үг.

Төрийн эрхэнд гарсан нам олонхийн засаглалаа бүрдүүлсэн нөхцөлд бултах, нуугдах боломж үлдэхгүй батлагдсан төслөө гүйцэтгэх ёстой.

Монгол Улсад 2000 оноос хойших бүх сонгуулийн мөрийн хөтөлбөрийг сөхөж харвал төстэй агуулга давамгайлаад байна. Эдийн засгийн өсөлт, авлигын эсрэг тэмцэл, төр, нийгмийн салбарын шинэчлэл, дундаж давхаргын орлогыг нэмэгдүүлэх амлалт гэх мэт.

Сонгуулийн ийм амлалтын давтамж нэмэгдэх тусам биелэлтийг хянах, үнэлэх соёлд ард иргэдийг уриалах шаардлага параллелаар өсөн нэмэгдсээр байна гэсэн үг. Өнөөдрийн нийгэмд иргэдийн хяналтын гол суурь нь сошиал орчин, хэвлэл мэдээллийн хэрэгслийн өгөгдөл, судалгааны байгууллагуудын суурьтай тайлан, мөн төрийн үйлчилгээний ил тод байдал юм.

Энэ бүгдээс иргэд, нийгмийн бүлгүүд мэдээлэл авч эрх баригчдын амлалтыг сануулаад зогсох биш үр дүнг хэмжих боломжтой болсон.

Тиймээс манай амлалт.мн сайт 2024 оны УИХ-ын сонгуульд мөрийн хөтөлбөрөө дэвшүүлж, олонхийн суудал авсан, эрх баригч МАН-ын 2024-2028 онд хийж хэрэгжүүлэхээр амласан амлалт, мөрийн хөтөлбөрийг өглөө бүхэн сануулж, бодит үр дүн, хэрэгжилтийг 2028 оны сонгууль хүртэл нэхэн шаардах болно.

AMLALT.MN