УИХ-ын ээлжит сонгууль болж өнгөрөөд жил зургаан сар буюу 525 хоног өнгөрчээ. Энэ хугацаанд Төрийн эрх барихаар ард түмэндээ амлалт өгч, мөрийн хөтөлбөрөө дэвшүүлэн, сонгогчдийн итгэлийг хүлээж парламенттын 126 гишүүнээс 68 гишүүний буюу олонхийн суудал авч Засгийн газраа байгуулан ажиллаж буй МАН өнгөрсөн хугацаанд дотоодын тэмцлээсээ илүү гарсангүй гээд хэлчихэд бараг хэлсдэхгүй биз.

Уг нь Төрийн эрхийг атгасан улстөрийн хүчин сонгуулийн мөрийн хөтөлбөртөө амласан иргэдийнхээ эрүүл, аюулгүй таатай орчинд сэтгэл хангалуун амьдрах бололцоог нээж өгөх бодлого боловсруулан хэрэгжүүлж ажиллах ёстой. УИХ-ын сонгуулийн мөрийн хөтөлбөртөө ч тэд ингэж л амласан.

Тэдний УИХ-ын сонгуульд орохдоо ард иргэддээ танилцуулсан мөрийн хөтөлбөрийн нэгдүгээрт “Эдийн засгийн өсөлтийг өрх бүрд хүргэх хүний хөгжлийн бодлого” гэсэн заалт бий.

Энэ заалтад орсон “Баялагийн сан, Нийгмийн даатгалын сангаар дамжуулан төр хувийн хэвшлийн түншлэлээр иргэдийг орон сууцжуулах эрх зүйн орчинг бүрдүүлнэ” гэдэг зүйл уг нь их боломжийн сэтгэл татам өгүүлбэр.

Энэ зүйл онолын хувьд боломжтой мэт боловч бодит эх үүсвэр бүрдэх боломж өнөөдөр харагдаж байгаа юу. Институцийн бэлтгэл хангагдсан уу, хууль эрх зүйн орчны шинэчлэл хийгдсэн үү гэдэг асуулт хариултаа хүлээсээр.

Лав л ил харагдаж байгаагаар бодит байдал дээр эдийн засаг өсөж буй үр дүн алга. МАН энэ хугацаанд төрийн эрх барихдаа эдийн засгийн суурь үзүүлэлтүүдийг тогтворжуулах, дотоодын үйлдвэрлэлийг дэмжих, иргэдийн амьжиргааг сайжруулах чиглэлд ахиц гаргасан уу. Үгүй л болов уу.

Эсрэгээрээ, инфляц өндөр, бодит цалин өсөөгүй, өрхийн хэрэглээ өдөр ирэх тусам хумигдсаар л байна. “Ард түмэн” гэдэг УИХ, Засгийн газрын хууль ёсны зөвшөөрөл олгогч субьектын хувьд амлалтын биелэлтийг шаардах эрхтэй.

Тэгэхлээр манай амлалт.мн сайтын зүгээс төрийн эрх барьж буй МАН-аас ӨДӨР БҮР сонгуулийн амлалтыг нь нэхэн сануулж, тухайн амлалт ХЭРЭГЖИХ ЭСЭХ, хэрэв хэрэгжих юм бол ХЭЗЭЭ биелэх вэ гэдгийг нь постер хэлбэрээр АСУУЖ, иргэдийн ой санамжийг сэргээн, ЭРХ БАРИГЧИДАД хэлсэн АМЛАЛТЫГ НЬ ХҮРГЭХ болно.

AMLALT.MN