УИХ-ын гишүүн Өргөдлийн байнгын хорооны дарга О.Номинчимэг, УИХ-ын гишүүн Г.Лувсанжамц нар “Орон сууц захиалах, худалдан авах харилцааг зохицуулж байгаа хууль тогтоомжийн биелэлт”-ийн талаар мэдээлэл сонсох уулзалтыг өчигдөр зохион байгууллаа.

Тус хороонд өнгөрсөн 8 сарын хугацаанд ирсэн гомдол санал хүсэлтэд дүн шинжилгээ хийхэд дийлэнх хувийг орон сууцны захиалгын залилангийн асуудал байна.

Өнөөдрийн байдлаар 32 гомдол ирсэн бөгөөд үүний цаана олон мянган хүн, олон зуун тэрбум төгрөгөөр хохирсон, залилуулсан, сэтгэл зүйн гүн дарамтад орсон ноцтой хэргүүд байна. Нийгмийн үзэгдэл болтлоо хавтгайрч байгаа орон сууцны захиалгатай холбоотой луйвар, залилангийн асуудлыг дахин гарахаас сэргийлэх, эрх зүйн хүрээнд шийдэх, төрийн байгууллагуудын ажлын уялдаа холбоог сайжруулж хяналт, хариуцлагыг чангатгах, нээлттэй мэдээллийн тогтолцоог төгөлдөржүүлэх зэрэг зохицуулалтыг цаг алдалгүй хэрэгжүүлж, ирээдүйд олон хүнийг эд хөрөнгө, цаг, сэтгэл зүйгээр хохирохоос хамгаалах шаардлагатай байна гэж байнгын хорооны гишүүд үзэж байна. Тус уулзалтад Хот байгуулалт, барилга, орон сууцжуулалтын яам, Нийслэлийн орон сууцны бодлогын газар, Хот байгуулалт, хот стандартын газар, Нийслэлийн хяналт шалгалтын газар зэрэг салбарын бүрэлдэхүүн хамтдаа гарц шийдлийг хайж хэлэлцлээ.

Оролцогчдын зүгээс барилга эхлэх үеэс орон сууц, талбай бүр тодорхой дугаар, байршилтай байх, хаягжилтыг тодорхой болгож, улсын бүртгэлийн мэдээллийн санд бүртгэх, хөндлөнгийн хяналтын этгээдийн үүрэг оролцоо, дуусаагүй барилгын бүртгэл үнэн зөв нийтэд ил тод байх, орон сууц худалдан авагч иргэдийн өмчлөх эрхийн баталгаа бодитоор хангагдах эрх зүйн орчин бүрдүүлэх, хэрэглэгчийн эрхийг хамгаалах зохицуулалт, төрийн байгууллагуудын тус тусдаа байгаа мэдээллийн санг нэгтгэх, олон улсад туршигдаж үр дүнгээ өгч байгаа аргачлалыг хэрэгжүүлэх гээд олон санал, санаачилга гаргасан байна