Засгийн газраас төрийн болон орон нутгийн өмчит компани, байгууллагуудад Онцгой дэглэм тогтоон ЗГ-ын Бүрэн эрхэт төлөөлөгч /БЭТ/ томилон ажиллуулах болсон.
Өмнө нь Эрдэнэт үйлдвэр дээр ийм дэглэм тогтоож байсан бол өнгөрсөн 10 сард Эрдэнэс таван толгой ХК дээр онцгой дэглэм тогтоон Засгийн газрын бүрэн эрхэт төлөөлөгчөөр Сангийн яамны төрийн нарийн бичгийн дарга Ж.Ганбатыг, 2022 оны арванхоёрдугаар сарын 9-ний өдрийн Засгийн газрын ээлжит бус хуралдаанаар орон нутгийн “Тавантолгой” ХК-д зургаан сарын хугацаатай онцгой дэглэм тогтоож, эрх бүхий төлөөлөгчөөр Хууль зүй, дотоод хэргийн яамны Төрийн нарийн бичгийн дарга П.Сайнзоригийг, мөн өдөр засгийн газрын хуралдаанаар "Тавантолгой төмөр зам" ХХК-д зургаан сарын хугацаатай онцгой дэглэм тогтоож, ЗГХЭГ-ын Хууль эрхзүйн газрын дарга Н.Мягмарыг тус тус Засгийн газрыг төлөөлөн ажиллах ажиллах бүрэн эрхт гишүүнээр томилов.
Хамгийн сонирхолтой нь Засгийн газраас төрийн өмчит компани, аж ахуйн нэгжүүдэд Онцгой дэглэм тогтоон, бүрэн эрхт төлөөлөгч томилох хуулийн үндэслэл нь тэртээх 1991 онд буюу одоогоос 31 жилийн өмнө батлагдсан “БНМАУ-ЫН ЗАСГИЙН ГАЗАРТ ЭРХ ОЛГОХ ТУХАЙ” хууль байгаа юм.
Тус хууль батлагдсан цаг хугацаанаас хойш 31 жил өнгөрч, улс орны нийгэм эдийн засгийн байдал бүхлээрээ өөрчлөгдөн, эдийн засаг тогтворжон, өмчийн хэлбэрүүд тодорхой болж, аж ахуйн нэгж, компаниудын үйл ажиллагаа холбогдох хуулийн зохицуулалтаараа хэрэгжээд явж буй энэ цаг үед гэнэтхэн “Улсын эдийн засгийн амьдрал, хүн амын үйлчилгээний хэвийн нөхцөлийг хангахад нэн чухал үүрэг бүхий тодорхой үйлдвэрийн газар, байгууллагад шаардлагатай гэж үзвэл нийтлэг баримталдаг хууль тогтоомжийн заалтыг хэрэглэхгүйгээр 6 сар хүртэл хугацаагаар тусад нь онцгой дэглэм тогтоож, харъяалал харгалзахгүйгээр өөрийн шууд хяналтад авч ажиллуулах эрхийг БНМАУ-ын Засгийн газарт олгосугай” гэсэн хуулийг мөрдлөг болгон БЭТ томилон ажиллаж байгааг юу гэж ойлговол зохилтой вэ?
Цаашлаад тус хуулиас иш татсан дээрх заалтны эхний мөрийн агуулгыг анхааран харвал “тодорхой үйлдвэрийн газар, байгууллагад шаардлагатай гэж үзвэл нийтлэг баримталдаг хууль тогтоомжийн заалтыг хэрэглэхгүйгээр” гэсэн заалт нь төр засаг шаардлагатай гэж үзвэл /ямар тохиолдолд, юуг шаардлагатай гэж үзэх нь тодорхой биш атал/ компанийн тухай болон бусад холбогдох хууль, өмчийн ямарч хэлбэрийг үл харгалзан аливаа байгууллага, аж ахуйн нэгж, хувийн хэвшил, компанийн үйл ажиллагаанд төр онцгой дэглэм тогтоох нэрээр шууд хяналтандаа авч, БЭТ томилдог хувилбар руу шилжихэд бэлэн байна гэсэн үг. Дээрх хуулийг энд дарж уншина уу?
Товчхондоо Засгийн газар дээрх хуулиар, бас улс орны эрх ашиг нэрээр сүр далайлган өнөөдөр төрийн өмчийн компанид онцгой дэглэм тогтоож, 6 сарын хугацаатай БЭТ томилж байгаа бол маргааш хувийн өмчийн аж ахуйн нэгж компанийг мөн энэ аргаар “ДЭЭРЭМДЭЖ” магадгүй гэсэн дүр зураг харагдаж байна.
Аан нээрээ, саяхан УИХ-аар баталсан Орон нутгийн болон төрийн өмчийн компанийн тухай хуульд дээрх БНМАУ-ын Засгийн газарт эрх олгох, Засгийн газраас онцгой дэглэм тогтоох тухай зүйл заалтыг бараг тэр чигээр нь хуулж /копидоод/ оруулаад баталчихсан юм билээ.
Энэ талаар дараагийн нийтлэлдээ тодруулан мэдээлэх болно.
Энэ бүгдээс харвал бид ардчилалын замаас ухраад байна уу, аль асвэл урагшлаад байна уу гэдгийг уншигч та тунгаан бодно бизээ.
А.Галт
Амлалт.мн
