Охид, эмэгтэйчүүдийн манлайлал, бизнес эрхлэлт болон санхүүгийн боловсролыг дээшлүүлэх, эрүүл мэндийн боловсрол олгох, урьдчилан сэргийлэх, сэтгэл зүйн болон нийгмийн дэмжлэг үзүүлэх зорилготой “Эмэгтэйчүүд ба тэгш эрх” сангийн албан ёсны нээлтийн үйл ажиллагаа өнөөдөр /2025.10.24/ зохион байгуулагдлаа.

“Эмэгтэйчүүд ба тэгш эрх” сангийн нээлтийн үйл ажиллагаанд “Эмэгтэйчүүд ба тэгш эрх” сангийн үүсгэн байгуулагч Э.Аззаяа, З.Сарантуяа, сангийн Удирдах зөвлөлийн гишүүн П.Содгэрэл, Удирдах зөвлөлийн гишүүн, Гүйцэтгэх захирал С.Тэргэл, Хяналтын зөвлөлийн гишүүн Б.Хонхонцэцэг, Б.Цолмон, УИХ-ын гишүүн Ц.Туваан, УИХ-ын гишүүн, Хүний эрхийн дэд хорооны дарга С.Эрдэнэболд болон эрүүл мэнд, бизнес, боловсролын салбарт амжилттай ажиллаж буй эмэгтэйчүүдийн төлөөлөл оролцов.

“Эмэгтэйчүүд ба тэгш эрх” сан нь эмэгтэйчүүдийн тэгш эрхийг хангах, ялгаварлан гадуурхалтыг арилгах, эмэгтэйчүүдийн шийдвэр гаргах түвшний оролцоог нэмэгдүүлэх, тэдний дуу хоолойг олон нийтэд хүргэх, бодлого боловсруулах түвшинд оролцоог нэмэгдүүлэх, охид, эмэгтэйчүүдийг оюуны хөгжлийн хөтөлбөр, манлайллын сургалтад хамруулах, олон улсын болон үндэсний байгууллагуудтай хамтран ажиллаж, эмэгтэйчүүдийн хөгжлийг дэмжих хамтын ажиллагааны сүлжээ бий болгох зорилгоор үүсгэн байгуулагдсан гэдгийг сангийн гишүүд онцлон хэлсэн юм.

“Эмэгтэйчүүд ба тэгш эрх” сангийн Үүсгэн байгуулагч, Удирдах зөвлөлийн дарга Э.Аззаяа:“Сангаа “Эмэгтэйчүүд ба тэгш эрх” хэмээн нэрлэсэн шалтгаан гэвэл эмэгтэйчүүд өнөөдөр ТЭГШ ЭРХ гэж юу вэ?, эрхээ хэрхэн хамгаалах талаар мэдлэг мэдээлэл хомс байна. Тиймээс охид, эмэгтэйчүүдээ хөгжүүлэх хөтөлбөр боловсруулж бодлогын түвшинд эмэгтэйчүүдийнхээ төлөө ажиллая гэсэн санаачилгаар салбар бүрийн төлөөлөл болсон 8 эмэгтэй нэгдээд санг байгуулсан.

Манай сангийн эхний зохион байгуулах хамгийн гол ажил бол “Эмэгтэйчүүд ба тэгш эрх” сэдвийн хүрээнд үндэсний хэмжээнд эмэгтэйчүүдийн чуулгыг ирэх арваннэгдүгээр сард зохион байгуулахаар төлөвлөн ажиллаж байна.

“Эмэгтэйчүүд ба тэгш эрх” сангийн Удирдах зөвлөлийн гишүүн П.Содгэрэл:Нийгмийн бүхий л талын ялангуяа бизнес, эрүүл мэнд, боловсрол, байгаль орчин чиглэлийн эмэгтэйчүүд санаа нэгдээд санг байгуулсан.

Миний хувьд бол байгаль орчин, хөдөө аж, ахуйн салбарын мэргэжилтэй учраас энэ чиглэлийн үйл ажиллагааг хариуцан ажиллахаар Удирдах зөвлөлийн гишүүнээр сонгогдон ажиллаж байна.

Бид ирэх 2026 онд байгаль орчин, хөдөө аж, ахуйн чиглэлээр нийгэмд чиглэсэн “Ногоон гэр бүл” уралдаан, видео контент, мод тарих хөдөлгөөн зэрэг манлайллын ажлуудыг хийхээр төлөвлөн ажлын төлөвлөгөөгөө баталсан. Мөн ээжүүдэд зориулсан үр хүүхдэдээ ногоон органик хүнсийг хэрхэн бэлдэх талаар зөвлөгөө мэдээлэл хүргэхээр зорьж ажиллаж байна.