Улс төрийн Намын тухай хуулиар энэ ондоо багтаж улс төрийн намууд намын их хурлаа хуралдуулж, намын дүрмээ баталж, намын даргаа сонгон Улсын дээд шүүхэд бүртгүүлэх учиртай. Энэ дагуу улс төрийн намуудын дунд намын хурлаа хуралдуулах, дүрмээ шинэчлэн батлах, намын даргаа сонгох үйл ажиллагаа зохион байгуулагдаж байна. УИХ-д дөрвөн суудалтай Иргэний зориг ногоон нам намынхаа хурлыг хийж, намын дүрмээ шинэчлэн батлуулахаар Дээд шүүхэд гурван удаа хандсан ч өнөөдрийг хүртэл бүртгэж аваагүй байгаа аж.
Тэгвэл өчигдөр /2025.10.29/ Иргэний зориг ногоон намын Нийслэлийн намын хорооны гишүүд, тэргүүлэгч, удирдлага нараас бүрдсэн 50 гаруй гишүүд хуралдаж, ИЗНН-ын дүрмийг Улсын дээд шүүхэд бүртгүүлэх ажлыг идэвхийлэх, үүнд манлайлан оролцох шаардлагатай гэдэгт санал нэгдсэн байна.
Тус хурлын үеэр бид ИЗНН-ын Нийслэлийн Намын хорооны дарга М.Амартунгалагаас зарим асуудлыг тодрууллаа.
- ИЗНН-ын Нийслэлийн намын хорооны ээлжит хурал болж байна. Хурлаар ямар асуудлыг хэлэлцэж байна вэ?
- Өнөөдрийн ИЗНН-ын Нийслэлийн Намын хорооны ээлжит хуралдаанаар гишүүдээ батламжлах, мөн тэргүүлэгчдээ шинээр сонгох асуудлуудыг шийдвэрлэхээр хуралдаж байна. ИЗНН-ын үндсэн дүрмийг Монгол Улсын Дээд шүүхээс гурав дах удаагаа улс төрийн намын тухай хуульд нийцээгүй байна гэх шалтгаанаар буцаасан шийдвэр гаргасан.
Тийм учраас Нийслэлийн намын хороо энэ асуудалд манлайлал үзүүлэн, намынхаа дүрмийг Улс төрийн намын тухай хуулийн шинэчилсэн найруулгад нийцүүлэн дүрмээ боловсруулах ёстой гэдэг байр суурийг илэрхийлээд үүнд чиглэсэн Ажлын хэсэг байгуулах асуудлаар хэлэлцлээ.
- ИЗНН-ын дүрмийг Улсын дээд шүүхээс удаа дараа бүртгэж авахгүй байгаа шалтгаан юу вэ?
- Монгол Улсын Дээд шүүхээс буцааж байгаа үндэслэл бол өмнө гарсан зөрчлийг арилгаагүй байна гэх үндэслэлээр л буцаагаад байгаа юм билээ. Энэ хүрээнд өмнө нь ямар зөрчил дутагдал байгаад намын дүрмийг бүртгэхгүй байна вэ гэхээр Улс төрийн намын тухай хууль дээр маш тодорхой заасан заалтууд юм. Улс төрийн нам гэдэг маань өөрөө олон нийтийн байгууллага, ТББ-тай адил боловч, нэг онцлог нь тусдаа улс төрийн намын тухай хуулиар эрх зүйн харилцааг нь зохицуулдаг.
Хуульд зааснаар бол Улс төрийн нам гэдэг бол хүсэл зориг, итгэл үнэмшил нь нэгдсэн хүмүүсийн нэгдлийг хэлж байгаа юм. Тийм учраас улс төрийн намыг хэн нэгэн хувийн компани шиг удирдах, өөрийн ноёрхлоо тогтоох, дарангуйллыг бий болгох бол боломжгүй. Өөрөөр хэлбэл улс төрийн нам бол сайн дураараа, үзэл бодол, итгэл үнэмшлээрээ нэгдсэн хүмүүсийн нэгдэл шүү дээ. Тийм учраас асуудлыг хамтдаа хэлэлцдэг байх ёстой. Монгол ардын нэг сайхан үг байдаг шүү дээ. “Бүгдээрээ хэлэлцвэл буруугүй, бүлээн усаар угаавал хиргүй”.
Тэгэхээр аливаа шийдвэр гаргахдаа улс төрийн намын гишүүдийнхээ дунд хэлэлцүүлэг өрнүүлж, зөвшилцдөг, ярилцдаг байх ёстой. Улсын дээд шүүхээс ИЗНН-ын даргад эрх мэдэл хэтэрхий төвлөрсөн, нэг хүний оролцоо өндөр байгааг анхаарах ёстой гэх үндэслэлээр бүртгэлгүй буцаасан юм билээ. Тийм учраас өнөөдөр ИЗНН-ын Нийслэлийн намын хороо хуралдан, манлайлал үзүүлж, намынхаа гишүүд, тэргүүлэгч хуульч өмгөөлөгч нараас бүрдсэн Ажлын хэсэг гаргаж, дүрмийн шинэчлэлдээ намын нийт гишүүдийн эрх ашгийг хамгаалах, намын бодлоготойгоо уялдуулах, тодотгох байдлаар ажиллахаар төлөвлөж байна.
Тиймээс бид зөвшилцлийн энэ хувилбарыг сонгох ёстой гэсэн байр суурьтай байгаа юм.
-Мэдээлэл өгсөнд баярлалаа.
Amlalt.mn
