Гэр бүл, Хөдөлмөр, нийгмийн хамгааллын яам болон Нэгдсэн Үндэстний Байгууллагын Хүн амын сан хамтран “Хүн төвтэй хөгжил - Говийн бүсийн хүн амын тогтвортой бодлого” сэдэвт хэлэлцүүлгийг цахимаар зохион байгууллаа.
Говийн бүсийн дөрвөн аймагт улсын нийт хүн амын 6 орчим хувь оршин суудаг бөгөөд хүн амын нягтаршил бага, шилжилт хөдөлгөөн өндөр бүсийн хэмжээнд өсвөр насны охидын жирэмслэлт, гэр бүл салалт, нялхас болон хүүхдийн эндэгдэл, ялангуяа эрэгтэй хүүхдийн эндэгдэл улсын дунджаас өндөр байна.
Эдийн засгийн хувьд уул уурхайн салбараас хэт хамааралтай байдал нь орлогын тэгш бус байдлыг нэмэгдүүлж, залуучуудын, тэр дундаа залуу эмэгтэйчүүдийн шилжилт хөдөлгөөнийг эрчимжүүлж байгаа юм.
Мөн хүн амын насжилт улсын дунджаас хурдтай явагдаж, Говийн бүсийн насжилтын индекс 17.1-д хүрчээ. Үүнтэй зэрэгцэн уур амьсгалын өөрчлөлтөөс үүдэлтэй цөлжилт, усны хомсдол нь мал аж ахуйд суурилсан уламжлалт амьжиргаанд сөргөөр нөлөөлж байна.
Иймд “Говийн бүсийн хүн амын цогц бодлого”-ын төслийг бүс нутгийн өвөрмөц нөхцөл, сорилтыг харгалзан боловсруулж, үндэсний хэмжээнд хэрэгжиж буй хүн амын хөгжлийн зорилтуудад бодит хувь нэмэр оруулах зорилгоор Гэр бүл, хөдөлмөр, нийгмийн хамгааллын яам болон НҮБ-ын Хүн амын сан хамтран хэлэлцүүлэг зохион байгуулав.
Хэлэлцүүлэгт Говийн бүсийн аймгуудын Засаг дарга, аймгийн Иргэдийн Төлөөлөгчдийн Хурлын дарга нар, бүсээс сонгогдсон УИХ-ын гишүүд, мөн Эдийн засгийн хөгжлийн яам, Сангийн яам, Боловсролын яам, Эрүүл мэндийн яам, Жендэрийн үндэсний хороо, Статистикийн үндэсний хороо болон НҮБ-ын харьяа агентлагуудын төлөөлөл оролцлоо.
