Ганцаардаад байгаа бололтой юм. Ганцдуулж байгаа бололтой юм. Зарчмын төлөө ганцаардах бол гоё шүү дээ. Гэхдээ бас яг ганцаараа биш бололтой юм. Дэргэд нь Намбарын Энхбаяр байж байна. Дэргэд байсан улсууд, дэд сайд болгохоос эхлээд дэмжсэн улсууд яаж алсдаа ёвордог, ёлтойлгодгийг хэлээд өгч байгаа шиг байна. Зөв.
Үнэнийг хэлээд өгөх хэрэгтэй. Гадаад хэргийн дэд сайд битгий битгий хэл дотоод хэргийн сайд болгосон улсууд дэргэдээс нь яаж, дэлүү элэг рүү нь нудардгийг хэлээд өгч байгаа шиг байна. Тэр битгий хэл Таван толгойг хүртэл хэдүүлээ авчихъя, хуваачихъя гээд, одоо энэ нүүрсний хулгайг бүүр язгуураас нь, яг эхэлсэнээс нь гардалцсан хүмүүсийн тухай ярьж өгөөд байгаа бололтой юм. Тийм учраас түүнийг ганцаардуулаад, хулгайд хам болохгүй болохоор нь хуулийн дагуу огцруулна гэж айлгаад байгаа бололтой юм.
Л.Оюун-Эрдэнэ ийм үнэнтэй нүүр тулж байна, эгц өөдөөс нь хараад сууж байна. Алсын хараагаа зөв тодорхойлсон бол айгаад хэрэггүй ээ. Зарчмаа бариад үзэх л хэрэгтэй, тэмцэх л хэрэгтэй. Арван жилийн өмнө нэг хүн гэртээ телевизгүй болохоор шөнө юу болсоныг мэдсэнгүй гээд сууж байсан. Тэр нь дөрөвдүгээр сарын 12 бай л уу даа. Бас нэг Ерөнхий сайд би мэдээгүй, юу болчихов доо гээд сууж байсан.
Тэд нарын дохиогүйгээр тийм юм болдоггүй ээ гээд тэгэхэд баригдсан Н.Энхбаяр яриад өгч байгаа шиг байна. Тиймэрхүү улсууд манай намд байгаа гээд хэлээд байгаа шиг байна. Тэр улсууд чинь л чиний үзээд тэмцээд байгаа нүүрсний авторууд шүү дээ гээд хэлээд өгч байгаа шиг байна. Тэгсэн, нэг айлын гэрт хулгай орлоо гэнэ.
Телевизгүй болохоор унтаад хулгайг мэдээгүй шиг байна. Илрэхгүй байна гэж цагдаагийнхан хэлээд байх шиг. Тэгтэл тэр ч сонин хулгай байна даа гэж Энхбаярт энэ Таван толгойг авъя л даа хэдүүлээ гэж байсан хүн тэвдэнгүй, манайд бас арай хулгай орох юм биш байгаа гээд санааширч байгаа гэлцэх юм. Тийм улсуудаас нүүрсний хулгайг эр ээ, нүд чиг нь тэнд байгаа гэж хэлээд байгаа шиг байна.
Ардын намынхан нэгэндээ итгэхгүй байх шиг байна. Аргагүй шүү дээ, тэгэж Энхбаярын хэлээд байгаа хүмүүс Удирдах зөвлөлөөр нь дүүрэн сууж байхад яаж нэгэндээ итгэхэв дээ. Яс хавталзана биз дээ, энэ чинь. Нүүрсний хулгайд нэрлэгдсэн хэсэг хүмүүс хууль санаалчихлаа.
Тавантолгойгоо ард түмэндээ өгье, нэг хүн тус бүрт хоёр саяыг өгье ээ гээд. Энийг хэн санаачлав нэгмөсөн бүгдээрээ л нүүрсээ амтлая гэсэн улсууд л санаачлана биз дээ. Ингэж л сөрөг улс төр хийгээд байна. Нөгөө туучий ч санаачлалцсан шиг байна, цаагуураа. Судлаач Ганаа туучий л гээд байдаг.
Туучий нь ч туучий шиг байна аа, гэхдээ яаж ингэж их баяжсанаа, яагаад эх оронч байж чаддаггүйг нь л яриулмаар байна гээд нэг хэсэг нь удахгүй хоргоох бололтой юм. Тэд нь тэгээд тэр хүнийг тэртээ арван хоёр онд яагаад Энхбаярыг оймстой нь гозолзуулсан бэ гэж бас асуух бололтой юм. Тэр хүн тэгээд хариултаа бэлдэх хэрэгтэй болж байгаа юм шиг байна. Тэгсэн мань хүн ойрын үед том улс төрд хүүгээ бэлдэж, дүүргийн намын ивээс хийж байгаа сурагтай.
Ардын нам эв найртай л байж үзээсэй гэж ярилцацгаах юм. Эвлэдэггүй эд гэдэг чинь улс төрийн өш хонзон байдаг юм шиг байна аа. Ард түмэн бид ч юугаа мэдэхэв дээ. Алсдаа сайхан амьдаръя л гэж бодох.
З. БАЯРАА
Амлалт.мн
