Даан ч дээ гэмээр үгийг Чойжоо хэвлэлд хэлэх юм. Салхи бага байна. Салхи сайн байвал утаа арилна гэх. Түлш, Эрчим хүчний сайдаа ингэж болохгүй шүү дээ. Бид салхины аяаар амьдрах болж байна уу. Утгаа алдлаа. Эрчим хүчний сайд ингэж хэлнээ гэдэг чинь эх орноосоо урваснаас нэг их ялгаа үгүй байна шүү дээ. Ингэж болохгүй ээ, Чойжоо. Тэгсэнээ иргэдээ дааруулахгүй гэх юм. Дааруулахгүйн тулд салхинд найдаж болохгүй. Бас станциудаа баринаа гэх. Итгэлгүй. Маш сул хэлж байна лээ. Манай сайт Эрдэнэбүрэнээ, Тэлмэнээ, Багануураа бариа гээд бичээд л байгаа шүү дээ.
Өчигдөр тэр Сангийн Б.Жавхлан чинь хөрөнгө оруулагчдын Монголд итгэх итгэл урьд өмнө байгаагүйгээр сэргэлээ гээд Эдийн Засгийн сайд Хүрлээтэйгээ яриад сууж байна лээ. Бүлэг дээрээ мэдээлэл ч хийсэн. Өрийн зохицуулалтын асуудалд есөн санал ирсэн, сэргэлт ирж байна гээд. Мөнхөөгийн Оюунчимэг, Жигжидийн Батжаргал, Харилцааны холбооны яамны Н.Учралтайгаа сууж байгаад МАН нэрийн дор та нар ярьсан. /Энд дарж тэдний яриатай холбоотой мэдээллийг уншина уу/
Тэгвэл, тэр их сэргээд байгаа хөрөнгө оруулагчдынхаа итгэлийг станцидаа татаач ээ. Салхинд биш хөрөнгө оруулагчдад найдсан нь дээр. Хөрөнгө оруулагчдаас илүү өөрсдөдөө найдсан нь дээр. Эх орноосоо баян сайд нар байна, эх орныхоо төсвөөс хэдэн их наядаар илүү далд эдийн засагтай хөлбөрч байгаа улс шүү дээ, Монгол.
Уул уурхайн Ганбаа, Эдийн засгийн Хүрлээ, Эрчим хүчний Чойжоо та нар асар баян хүмүүс шүү дээ.
Бүгдээрээ нийлж консерциум болоод төр хувийн хэвшлийн түншлэлээрээ төгөлдөр үлгэр үзүүлээд нэг станц бариатах л даа. Америкийг босгосон эрхмүүд гээд иймэрхүү л ажил хийсэн улс байдаг юм билээ ш дээ.
Хотгор шанагаас эхлээд манай говь, манай оронд дүүрэн нүүрс байна. Станциудаа бариач ээ. Хэдэн их наядаар хулгайлаад байхад л энд тэндгүй асгарсан хар алт байж л байна. Даан ч дээ. Тэгэхэд Эрчим хүчний сайд нь салхинд утаагаа даатгаад, амьдралын үнэн номлох гэж. Ийм сайдууд байх хэрэг байна уу, Л.Оюун-Эрдэнэ Ерөнхий сайд аа.
Б.Жавхлан сайдаа, өчигдөр оройноос эхлээд энэ ард түмэн чинь хүүхдийн мөнгө хэдэн төгрөгөө авна гэтэл, хасагдаж танагдаж, солигдоод замаа алдаж. Бөөн гомдол, та нөгөө цалингийн шатлалт татварынхаа агуулгаар хандчисхан юм биш биз дээ.
Өнөөдөр гарч ирээд нэг мөр мэдээлэл өг. Яг өөрийнхөө банкыг бөөцийлдөг шиг ард түмнээ бөөцийлж мэдээлэл өг, Сангийн сайд Болдын Жавхлаан. Харилцаа холбооны Н.Учралыг байлцуулаад, Хөдөлмөрийн Т.Аюурсайханаа суулгаад.
Т.Аюурсайхан үнэхээр асуудалд хутгалдсан бол олон юм ярилгүй ажлаа өг. Н.Багабанди даргаа ажлаа өг гэж шахдаг хүн шүү дээ. Одоо өөрөө ажлаа өг. Наад Хөдөлмөрийн сайдын суудалд чинь хулгайн сэвтэй биш, буяны төрхтэй хүн сууж хүн ардаа тэтгэг.
Ерөнхий сайд нь, Хууль зүйн сайдтайгаа шударга бустай тэмцээд, улсад гэрэл гаргая гээд зүтгээд байдаг. Гэтэл урагшгүй албатууд нь үргэлж хойш нь улдан чангаах юм.
Чаддаггүй юм бол та нар тэр Бадамжунайгаа авчирч менежер хийлгэ. Тэр хүн чинь менежер хийхдээ хүрвэл юуг ч хийж чаддаг хүн гэсэн. Бүгд л үүдэнд нь Жу ах гээд хүлээгээд сууж байсан улс биз дээ, та нар. Одоо тэгтэл хар овоохой болгоныг түүн рүү нүүлгэх. Түнжингийн Бадамжунай чинь Атрын гуравдугаар аяныг босгож, Засгийн газар, УИХ-ын гишүүн хийж явахдаа өмнөх ажлаа өнөөдрийн та нараас төө, тохой илүү хийж байсныг түүх гэрчилж байна. Нэг л их баатарлаг улс, нидэр дээрээ юу ч чадахгүй сайдууд.
Расул Гамзатов эр хүнийг хэн болохыг уулын замаас асуу гэсэн. Эх орон өнөөдрийн сайдуудыг уулын замаас бус, утаа, түлш, эрчим хүч, хөрөнгө оруулалт, хүүхдийн мөнгөнөөс асууж байна.
Ажлаа хий л дээ, та нар. Арчаагүй царайлаад, өөрийн хөрөнгөө овоолохоос өөр шид үнэндээ та нарт алга байна шүү дээ!
З.БАЯРАА
Amlalt.mn
