-Эс чадах нь иргэдийнхээ дунд орон чадахаа хийж, сонгох эрхээ эдлэн, нийтийн баялагийг бүтээлцэх учиртай-
Монголын Үндэсний телевизийн сэтгүүлчээс ажил амьдралын гараагаа эхэлсэн энэ хүн хоёронтоо Чингэлтэй дүүргийн иргэд сонгогчдын итгэлийг хүлээж УИХ-ын гишүүнээр сонгогдсон. Ингэж сонгогдохдоо олонд танигдсан байдал, мэдлэг туршлага гэхээсээ илүүтэй МАН-ын дэмжлэг, эмэгтэйчүүдийн квотод багтан сонгогдсон гэж хэлж болох.
Өнгөрсөн долоон жил хууль батлах дээд байгууллагад ажиллахдаа олны нүдэнд харагдаж, гарт баригдах тодорхой ажил хийсэн эсэхийг иргэд сонгогчид та бүхэн хэлнэ байх.
Хоёр дараалан сонгогдсон парламентын гишүүний хувьд хийх ажил, хэлэх үг нь цэгцэрчихсэн баймаар. Гэвч мань гишүүний хувьд УИХ-ын Байнгын хорооны хуралдаан дээр “боов идсэн, төрсөн хүүгээ төрийн өндөр албанд томилуулсан, Ерөнхийлөгчийг өмөөрч хэвлэлийн тогооруугаа нулимсан” гэх тодотголууд үргэлж түүнийг дагалдана.
М.Оюунчимэг гишүүн 2016-2020 онд УИХ-ын Өргөдлийн байнгын хорооны дарга байхдаа Туул гол орчмын газар олголт хууль бус байгаа талаар асуудлыг хөндөж, пиарын ажлаа болгохыг зорьсон ч тэгэсгээд чимээ алдарсан.
Иргэд сонгогчидод өөрийгөө байгааг “тунхаглаж”, “даацтай” улс төрч болж харагдах гэж ярьсан буруу зөрүү үг нь олны хэл амны бай, сошлын сэдэв болчихдог талтай.
Мань гишүүн "Коронавирусийн халдвараар өвчлөөгүй 2.7 сая хариуцлагатай иргэнд талархлаа илэрхийлж, нэг удаагийн урамшуулал олгох нь зүйтэй”, “Утаа Зайсанд хүртэл үнэртээд эхэлсэн байна, БЗХӨ-өөр өвчилсөн хоёр хүн тутмын нэг нь гэрлэсэн хүн байна”, “Хоёр хүн тутмын нэг нь ядуу байна” гэх зэргээр иргэд сонгогчидоо доромж үгээр хэлээд сууж байх юм.
Сайдын суудал гарах бүрд сайд болох марафонд нэр нь “гүйж” явдаг гишүүдийн нэг Мөнхөөгийн Оюунчимэг. Энэ удаад ХНХ-ийн сайд Т.Аюурсайхан үүрэгт ажлаасаа чөлөөлөгдөх хүсэлтээ Ерөнхий сайдад гаргасан. Хэрэв Т.Аюурсайханыг Ерөнхий сайд чөлөөлвөл түүний суудалд хэнийг томилох нь Ерөнхий сайдын бүрэн эрхийн асуудал. ХНХ-ын сайдын сулрах суудалд мөнөөх л М.Оюунчимэг гишүүн “суухаар” Ерөнхий сайдын өрөөний үүдийг сахиж суугаа сурагтай.
Дашрамд дурьдахад Хөдөлмөр нийгмийн хамгааллын яам гэж яачихсан сайдын “нүнжиггүй” газар вэ. Сайдаар ажиллаж байсан Н.Номтойбаяр “аавын хаалга татсан”, Д.Сарангэрэл сайд “улныхан” гэж нэрлэсэнд улсаараа түүнийг буруутгаж чөлөөлүүлсэн, араас нь Т.Аюурсайхан шалгуулаад, яллагдагчаар татагдчихлаа.
“Сахил хүртээд шал дордов” гэгчийн үлгэрээр М.Оюунчимэг гишүүнд ХНХ-ын сайдын албан тушаал өгчихвөл Ерөнхий сайдад нэмэр болохоос нэрмээс болох бий дээ.
Хэлсэн ярьсан үг нь хэл ам бай болсоор ирсэн М.Оюунчимэг гишүүнээ дахин сонгох эсэх дээрээ Чингэлтэйчүүд ухаалаг шийдвэр гаргана бизээ.
А.Галт
Amlalt.mn
