Иргэдэд “Эрдэнэс Тавантолгой” компанийн 1072 ширхэг хувьцааны ногдол ашиг өгөхөөр судалж байгаа талаар албаныхан мэдээлж байсан.
Гэхдээ нэг хүнд 10-15 мянган төгрөгийн ногдол ашиг олгохоор байна гэдгийг ЗГХЭГ-ын дарга Д.Амарбаясгалан хэлсэн. Тэгвэл “Эрдэнэс Тавантолгой” компанийн ногдол ашгийг энэ онд багтаан олгох, эсэх талаар Уул уурхай хүнд үйлдвэрийн сайд Ж.Ганбаатараас тодруулахад “Салбарын сайдын хувьд би зарим асуултад хариулт өгөх ёстой байх. Гэхдээ иргэдэд ногдол ашиг тараах эсэх дээр “Эрдэнэс Тавантолгой” компани ямар ашигтай ажиллаж байгааг компаниас нь асуух хэрэгтэй болно. Энэ компанийг яам удирддаггүй. Хувьцаат компани учраас Төлөөлөн удирдах зөвлөл нь шийдвэрээ гаргадаг. Компани тодорхой хэмжээний ашигтай ажиллаж байгаа юм билээ. Нэлээд өндөр ашигтай. Гэхдээ нөгөө талдаа их өртэй байгаа. Маш их хэмжээний өртэй. Ямар ч байсан энэ сарын 15-нд компанийн тайлан нь гарч дуусна. Тайлангийн дараа аудит орно. Аудит зөвлөмж өгнө. Үүний дараа ТУЗ шийдвэрээ гаргах ёстой. Түүнээс өмнөх шиг энэ мөнгийг ийшээ өг, тэр мөнгийг тийшээ өг гэдэг асуудал хэзээ ч байж болохгүй. Энэ асуудлыг компанийн ТУЗ юм уу, захирлаас нь асуух ёстой. Сайд хариулж хэзээ ч болохгүй. Энэ бол улс төрийн мэдрэмжээр шийддэг асуудал биш. Хувьцаат компанийн мөнгийг халамж хэлбэрээр шийдвэрлэж хэзээ ч болохгүй" гэсэн юм.
Дашрамд дурдахад, “Эрдэнэс Тавантолгой” компани 2022 оны хавар 603 сая ам.доллар урьдчилж авсан байжээ. 603 сая ам.доллар гэдэг нь 2 их наядын орлого урьдчилж аваад төлбөрт нь нүүрс нийлүүлэх нөхцөлтэй гэсэн үг юм. Үүнээс өнгөрсөн онд 180 орчим сая ам.долларын өрийг барагдуулсан бол одоо 420 орчим сая ам.долларын өр байгаа аж. Мөн түүнчлэн компани дотооддоо арилжааны банкуудаас авсан бондын 769 тэрбум төгрөгийн өртэй. Үүнээс 420 орчим тэрбумын бондын төлбөрийг ирэх дөрөвдүгээр сард төлөх ёстой. “Эрдэнэс Тавантолгой” компани нийт 2.4-2.5 их наядын өртэй байгааг Засгийн газраас томилогдсон бүрэн эрхт төлөөлөгч Ж.Ганбат мэдээлсэн билээ.
