УИХ-ын гишүүн, ХНХ-ийн сайд Т.Аюурсайхан нүүрсний гэх тодотголтой хэрэгт яллагдагчаар татагдсан тул гишүүн болон сайдынхаа суудлаас чөлөөлөгдөх хүсэлтээ гаргасан. УИХ-ын гишүүнээс чөлөөлөх эсэх нь УИХ-ын бүрэн эрх бол сайдаас чөлөөлөх нь Ерөнхий сайдын бүрэн эрхийн асуудал юм. Т.Аюурсайхан нь 20-оод хоногийн өмнө хүсэлтээ гаргасан ч Ерөнхий сайд хараахан чөлөөлөөгүй байна. Учир нь, хүсэлтийг хаврын чуулган эхлэхэд УИХ-ын чуулганд танилцуулснаар чөлөөлөх аж.

Энэ талаар ЗГХЭГ-ын дарга Д.Амарбаясгалан "Гуравдугаар сарын 15-нд хаврын ээлжит чуулган эхэлнэ. Энэ үеэр сайдаас болон гишүүнээс чөлөөлөх асуудал хөндөгдөнө. 2019 оны ҮХНӨ-өөр сайдыг чөлөөлөх, томилохдоо Ерөнхий сайд Ерөнхийлөгч, УИХ-д танилцуулах ёстой. УИХ-ын чуулган эхлэхэд танилцуулах бичиг очсон байх болно. Албан ёсоор танилцуулга хийгээд чөлөөлнө. Тэгээд тухайн үед дараагийн сайдын асуудлыг ярина. Харин яллагдагчаар татагдсан УИХ-ын гишүүд нэг сарын дотор түдгэлзэх хүсэлтээ өгөх ёстой. Өгөөгүй тохиолдолд намын Хяналтын ерөнхий хороо хуралдаж, шийдвэрээ гаргана" гэлээ.