Оюу толгойн далд уурхай өнөөдөр ашиглалтад орно. Түүхэн өдөр. Монголын эдийн засаг хоёроос гурав дахин тэлнэ.
Дэлхийн энэ шидээвэр, Монголын уурхай ингэж ашиглалтад орсноор валютын орлого үнэмлэхүй өснө, хамгийн гол нь хөрөнгө оруулагчдын итгэл даган сэргэнэ. Дархлааг бий болгох шинэ эхлэл болно. Юу үнэн, энэ үнэн.
Үе үеийн Засгийн газар, Ерөнхий сайдуудын ажлын залгамжийн үр дүн. Тэртээ 14 жилийн өмнө Оюу толгойн төслийн гэрээг Дамдины Дэмбэрэлийн парламент баталсан, гэрээг биежүүлэн оруулж ирсэн Засгийн газрын Ерөнхий сайд нь Санжийн Баяр.
Эхлэх бол хийхийн тал гэдэг үгтэй. Энэ утгаараа С.Баяр гэдэг хүн өнөөдрийн энэ уурхайн шанг татаж, өнөөдрийн бидний баярлах шалтгааны эх суурийг тавьсан нь хөдөлбөргүй үнэн юм. Хашир Д. Дэмбэрэл парламентаараа батлуулсан бас үнэн юм. Энэ үүднээс өнөөдөр эдгээр хүмүүст эл төслийг эхлүүлсэний төлөө талархахад буруутахгүй.
Чимэдийн Сайханбилэг үргэлжлүүлэн ажиллаж, өнөөдрийн энэ уурхай нээхэд өөрийн тодорхой үүргийг гүйцэтгэсэн ч эх орондоо ирж чадахгүй байгаа.
С.Баяр гэхэд эл л төслийн асуудлаар шоронд суугаад гарч ирсэн. Элдвийг ярьж гоншигнохгүй Санзай хавьд хааяа халмаг аж төрж л байх шиг байна. Тэгэх эрхтэй хүн, энэ хэл амтай ажлыг эхлүүлж, эцсийн үр дүндээ эх орон ард түмнийхээ төлөө зүтгэж явжээ гэж одоо хэлэгдэхэд буруудахааргүй байх шиг байна.
Оюу толгой төслийн үрээр олон улс төрчид тодорсон. Амьдарсан. Нэг хэсэг нь гэрээг сайжируулах нэрээр поп улс төрөө хийсэн. Чадсан.
Гэхдээ үүнийг эхлүүлсэн, үргэлжлэх шангт татсан хүмүүс бол С.Баяр, С.Баярцогт, Б.Ариунсан, Б.Бямбасайхан, Л.Гансүх, Д. Зоригт нар юм.
Энэ ажлыг хийж, зовлон жаргал дунд нь явсаныхаа төлөө бүгд хар гэрт ял эдэлсэн үнэнтэй. Сайд байсан нөхөд гэрээнд гарын үсэг зурсан, Б.Ариунсан, Б.Бямбасайхан хоёр гэхэд Засгийн газрынхаа үүрэг чиглэл болгосныг л баримталсан биз дээ.
Ингээд харахаар эдгээр нэр дурьдагдаад байгаа бүх хүмүүст өнөөдөр Оюу толгой төслийн далд уурхай нээгдсэн өдөр баяр хүргэх нь шударгад нийцэх явдал.
Ерөнхий сайд Л. Оюун-Эрдэнэ, өлсгөлөн зарлан тэмцэж асан С.Ганбаатар нар ч Монголын талын хувьд ноогдох өрийн бичилтийг үгүй болгож, арилгуулсан гавьяа бас бий. Энэ учир өнөөдөр эл уурхай нээгдэж, үйл ажиллагаандаа орж байгаа юм.
Өнөөдрөөс эхлэн Монголын валют илтэд нэмэгдэж, монгол төгрөгийн ханш өлчиржинэ. Энэ л бидний маш том эрх ашиг.
Дэлхийд өгч байгаа мессэж нь монголчууд чадаж байна, монголчууд сийрэг юм, монголчууд сэргэх нь гэдэг агуулга. Үүн шиг сайн зүйл үгүй шүү дээ. Хөрөнгө оруулалт өегшинө. Оюу толгойн хэмжээний өөр ч хэд хэдэн уурхай ашиглалтад оруулах боломжтой эрдэнийн үүц сав бидэнд бий шүү дээ. Үүнийг дөчин их наядын нүүрсний хулгайгаас илэрхий харж болно.
Оюу толгой төслийн ТУЗ-ийн даргаар Элчин сайд Галсангийн Батсүх ажиллаж ирлээ. Далдхан байдаг энэ хүний тогтвортой ажиллагаа, дипломат ур чадвар, хэлэлцэн зөвших , ойлголцлыг хадгалах чанар мөн л энэ уурхайн хувь заяанд бодит үүрэг гүйцэтгэснийг тэмдэглэх нь шударга ёсонд нийцнэ.
Монгол орон уудам. Монгол хүн бүр уул толгойн эзэн. Ямартаа Ерөнхий сайд Л.Оюун-Эрдэнэ Хөдөөгийн сэргэлтийг ярихдаа дэд бүтэц, хөгжлийн загварчлал бүрдчихвэл монгол хүн бүр нэг уултай байж болох тухай хэлсэн бололтой. Үнэн шүү дээ. Тийм л нөөц боломжтой юм чинь.
Тэгсэн, бүгд л Хасаг Жаргалант минийх, Бурханбуудай минийх, Зайсан толгой минийх болцгоод л дэргэчихлээ.
Оюу толгой бол харин гурван сая таван зуун монголчуудынх. Оюу толгой шиг эдийн засгийн олон Оюу толгойг бид бүтээх учиртай. Үүний тул хуулийн засаглал, зөв улс төр жишигжиж, зөв хүмүүс төр удирдах ёстой. Юутай ч бид дэлхийд дөрөвдүгээрт орох, энэ зууны топ бүтээн байгуулалт, төгс технологи бүхий уурхайгаа нээж чадлаа.
Монгол ингэж ялж байх учиртай. Энэ утгаараа л Санжийн Баярт талархах хэрэгтэй болоод байгаа юм. Эхлүүлсэний нь төлөө, биежүүлж удирдсаны нь төлөө. Санжийн Баяр өнөөдөр сайн морь сарлагийг (коньяк) сайн татах өдөр мөөн.
Тэр тийм эрхтэй. Том гавьяатай.
З.БАЯРАА
Amlalt.mn
