Зам тээврийн сайд Сандагийн Бямбацогт ажиллаад л байх шиг байна. Хамгийн сүүлд Дохад агаарын тээврийн нислэг үйлдэхээр болж баримт бичигт гарын үсэг зурж харагдав.
Энэ салбар энэ сайдын өнгөн дээр солонгорч л байгаа харагдана. Америк руу ч шууд ниснэ гэсэн. Зүүн Ази руу бол нэвт нисэж байна. Ахиц шүү. Ийм л баймаар. Сайны хажуугаар саар үргэлж дагалддаг.
Нөхөр С.Бямбацогтын салбар авлигын эрсдэл асар ихтэй. Төмөр зам гэж айдас хүрэм газар байгаа. Х.Хэрлэн гэдэг хүний удирдах өнгөн дээр түүний ажилчнаас тэрэг мөнгө хураасан, З.Дашдаваа дарга.
Авто тээврийн газар гэж айдас хүрэм газар бас бий. Өнөөдөр гэхэд сонинд арван нэгэн мянган тээврийн хэрэгсэл хил нэвтэрсний мэдээллийг устгасан нөхцөл тогтоогдлоо гээд АТГ-ын Х.Буянтүмэн нар мэдээлжээ. Авто тээврийн газрын ажилчид авлига авчээ гэдэг мэдээ дархлаажсан даа. Маш их гардаг.
С.Бямбацогт сайд тээвэр ложистикийн хэргийн дараа ажлын хэсэг гаргаад л байсан. Тэр ажлын хэсгийн дүгнэлт хэрхэн яаж гарсан, нээлттэй, ил тод мэдээлээд, урхаг, шийдвэрлэх арга замыг тод ярих нь ононо.
Төмөр замын Х.Хэрлэн дарга чинь их ажил хийж байгаа, цахимжуулж байгаа гээд пи ар хийсэн харагдана билээ. С.Батдөлийн хэрэг мандсан ч ажил хэрэг огт сайжраагүй ээ гээд тээвэр хийгчид яриад л байна. Ажлын гурван хоногт шийднээ гэдэг үгийн халхавч дор алхайж оддог, хэцүү боллоо гээд тээвэр хийдэг бизнесийнхэн хэлээд л байна.
Салбарын сайд та үүнд анхаар аа. Та бол мэдээлэлд ойр, эрх мэдэлд ойрын давууг их мэдэх хүн. Мэдээллээ илүү лавшруулаад, эрх мэдлийнхээ зохион байгуулалтаар тээвэр ложистик, төмөр замын асуудлыг гэрэлттэл шийдээч ээ. Дарханы замын тууз хайчилсан, хил тулгасан төмөр замыг нээсэн. Үнэн. Терминаль баримаар байна. Дарханы замын тал нь одоо хүлээгдэж байна. Барих ажил, хийх ажил асар их байна.
Дэд сайд тань авлигын асуудалтай яваад байх. Тэр сайдын чинь өмнөх сайд яллагдагчаар татагдсан. Хууль зүйн сайд явсан С.Бямбацогт эдгээр хүмүүс юун дээр алдаад, яагаад ингэв гэдгийг мэдээж судалж, эрсдлийг тооцож байгаа нь маргаангүй биз. Нислэг олширч байгаа нь сайн. Харин тасалбар нь харин лоосуутай байж тун мэдэхээр байна.
Ирэх сард өмнөд хөршийн далайн хот Ганжоу хотод болох олон улсын үзэсгэлэн яармагт монголчууд олноор оролцдог. Жижиг дунд аж ахуй эрхлэгчид, бизнесмэнүүд тэнд очиж шинэ технологи судалж, тоног төхөөрөмж худалдан авдаг. Тэгэх ч шаардлагатай.
Гэвч тийш очих онгоцны тийз одоо дууссан байна гэх. МИАТ компани, тасалбар зуучийн компаниудтай хамжаад, үгсэн хуйвалддаг, зохиомол эрэлт үүсгэдэг, үнийг нь нэмдэг, ашиг олдог шударга бус яваад байгааг хүмүүс ярьж хэлсээр л байна. Ийш чиглэх нислэгийн тоог нэмж, тасалбар зуучийн хуйвалдааныг илрүүлж, зогсоож, тийш зорих иргэдийг бага зардлаар очих боломжийг бий олгож өгвөл бизнес эрхлэгч олон хүнд та тус болох болно.
Ковидын өмнө МИАТ-ын тасалбар хоёр талдаа ийм үнэтэй байв.
МИАТ-ын одооны нислэгийн тариф
Аялалын зууч компаниудын зар
Тээвэр зууч компанийн нислэгийн тийзны дамласан шагийн үнэ 2,8 сая төгрөг /МИАТ-ын үнэ 1,9/
Үүнийг С.Бямбацогт сайд оройлон анхаарах хэрэгтэй байна. Эс бөгөөс МИАТ-ын тасалбарыг урьдчилан бөөндөөд авчихсан тээвэр зуучийнхан 2-3 дахин өндөр үнээр тийз борлуулж, иргэдийг хохироож, өөрсдөө их ашиг хүртэхээр байна. Энэ асуудалд МИАТ ч холбоотой байж мэдэх тул дотоод хяналт болон АТГ-аас шалгалт оруулах нь зүйтэй.
МИАТ гэснээс, энэ компаний чинь онгоцны шатахуун чөлөөт өрсөлдөөнд орсон уу даа. Ц.Анандбазар нь хоолойгоороо шахсаар сууна уу. Ерөнхий сайд тань монополийг болио гээд байх шиг байсан. Зөв л дөө. Гарцаагүй.
Зам тээврийн сайд зам тээврийнхээ мундрааг мэдээж бодож байгаа байлгүй. Монголын бүх бензин Оросоос хамааралтай. Ананд, Баагаан хүү хоёр зөөдөг. Тэд л таргалдаг. Үүнийг болиулаач ээ.
Газар тариалан, уул уурхайд дизель идэгч машинууд үлэмж ажилладаг. Тийм баялаг бүтээгч техникүүдийнхээ түлшийг хийе гээд, Ш.Адьшаа түүхий эдийг нь татваргүй болгоё гэж хууль санаачлаад боорлуулаад байх шиг.
Ш.Адьшаадаа, салбарынхандаа тусал аа, С.Бямбацогт оо. Би л болж байвал гэж суух ёс зүй өөрт тань байдаггүй байх. Өглөө эрт босож сурсан хүн харагддаг. Өндөр өөд алхах дуртай нь уул хадаар яваад мэдэгддэг.
Анх гишүүн болоод өглөө эрт цэвэрлэгчтэй зэрэгцээд ордонд ирж ажлаа хийж эхэлдэг сэн гээд С.Баярцогт та хоёрыг одоо ч яриад байна гэнэ билээ. Дөрөв сонгогдчихлоо. Улам эрт босдог болоо байлгүй дээ. Ажлаа сайжруулмаар байна, Зам тээврийн сайд аа. Ажил тань толгойтой үснээс чинь их байх шиг байна.
Авлигад өөрөө дургүй чинь сайн хэрэг, авлига дүүрэн адармаатай салбарыг удирдаж байна шүү дээ та.
Том том төслүүд тойрч ярайгаад байна. Гэхдээ хил тулгаад терминальгүй амрах төмөр зам шиг юм л хиймээргүй байгаа юм даа.
З.БАЯРАА
Амлалт.мн
