Гадаад харилцааны сайд Батмөнхийн Батцэцэгийн үс, зүс, дээл, пи ар, татаас бүгд гоё. Дээр татаастай. Сурталчилагддаг пи ар нь авъяастай хүний шийдэл байдаг. Юм ойлгосон хүний уран өнгөлөн далдлалт байдаг. Бичиг номд эрхэм хүний үйлдэл харагддаг. Хэрэг дээрээ, бодит дээрээ Б.Батцэцэг хатагтай хэрхэн ажиллаж байна вэ.

Гадаад худалдаа гэж асар том, амин чухал асуудал байна. Энэ хатагтайн яам дээр байдаг чиг өгөгдөлтэй санагдах. Гадаад худалдаа Монголд ямар байна вэ. Ойлгомжтой шүү дээ. Долларын үнээс ойлгогдоно. Хөрөнгө оруулалт танагдаж, монголчуудын эдийн засгийн цангалт гарилдаж гүйцлээ. Б.Батцэцэг сайдын хамгийн их ажиллаж байх ёстой үйлс энэ. Эдийн засгийн хөгжлийн яамны Ч.Хүрэлбаатартайгаа сугадалцаад энэ дэлхийгээс мөнгө л олж байх гарц суваг, яриа хэлэлцээн, дипломат ойлголцлыг энэ хатагтай хийж байх учиртай.

Хөрөнгө оруулалт Монголд өнөөдөр ямар байгааг Алтанцөгц суманд суугаа Бахитгүл эмээ ч мэдэж байгаа, юу ч алга байна шүү дээ гээд. Эрчим хүчний ганц станци барьчихгүй гансарч байгаа шүү дээ, энэ улс.

Хамтарсан хөрөнгө оруулалттай компанид чухал асуудлууд байдаг. Санамж, ойлголцол, итгэлцлийн бичгүүд эл яамаар дамжих, албажих гарцаагүй болдог. Монголд хөрөнгө оруулахад манай засаг, улс чадамжгүй байгаагаас асуудал их. Баталгааг нь тоохгүй, зээлжих зэрэглэл олон улсаас нэн тааруу. Ийм байхад гуймхай атлаа голомхой ч юм уу, их зансах явдал Гадаад яамныханд огт хэрэггүй.

Хөрөнгө оруулалт урих боломжтой алив бичиг хэргийн асуудалд онцгойлон анхаарч ажилламаар. Бизнесийн бүхий л хэлцэл дээр үнэмлэхүй тусалж байх учиртай юм. Гэтэл ийм ивээст хандлага байдал Б.Батцэцэг сайдын яам дээр огтоос алга, нэг л их хамар шантайсан, асуусан, ямар учиртайг лавлаж “өнгийсөн”, лазагнаж хашигнасан, гуйлгамтгай, дээр өнгөнөөс дуугарч ядсан улс байх юм аа гэж бизнес эрхлэгчид, хөрөнгө оруулалт горилогсод хэлж байна.

Б.Батцэцэг сайдын дээл, үс зүсэндээ үзүүлж буй мэдрэмж ширхэг онцгой харагддаг. Яг энэ өнцгөөсөө асуудалд хандаасай, ажил хэрэгч байгаасай гэж бодогдох.

Нэг, хоёр, гурав л биш бол өндийхөөргүй сэтгэлгээгээр бүү ханд аа. Хүмүүс яриад л байна шүү дээ.

Хөрөнгө оруулагч урьж байгаа, улсдаа юм хийе, хөгжие гэж байгаа хүмүүсийг гарыг Японы эзэн хааны гарыг түшсэн шигээ түшээ, цэмцгэрхэн хатагтай, сайд аа.

Таны нэг ажил их сайн явдаг бололтой байдаг. Тэр бол “Мөнхийн үсэг” хэвлэлийн компани бараа үйлчилгээ авч, хийж хэрэгжүүлж байгаа явдал. Ихэнхдээ төрийн байгууллагуудаас. Эрдэнэс таван толгой, Сонгуулийн ерөнхий хороо гээд дурдвал асар их жагсаалт гарна. Байсхийгээд л хэвлэлээр гардаг. “Мөнхийн үсэг” тэгж тендер авчээ гэдэг мэдээ мөнхжиж. Хувийн компани тань ийм шаргуу мэтгэлээр ажиллаад байна.

Та, улсдаа ийм агуулгаар, гадаад харилцаандаа ийм мэтгэлээр зүтгэ ээ. Яам дээрээ сорил тест хий. Үе дамжсан дипломатуудын, Их хурал, Засгийн газрын, намын ямбатнуудын хүүхдүүд, үе залгамжтнуудаар наад яам чинь хуяглаж шивээлсэн.

Ардын хүүхдийг цухуйлгана аа гонж. Нооль мянганы нэг оноогоор дутаагаад ажилд авахгүй. Зорьсон үе залгамжнуудаа л авна. Нөгөөдүүл нь их зан, гоё гонжоом, угсаа, хүнд суртал, амин хувиа хичээхээр төгөлдөржиж, гар цахим, гар утас, үнэтэй бэлгээр нэгэндээ бэлэг бариад л, аль гоё улс орон руу явах вэ гэдэг дипломат томилгоогоор дотроо “алалцаад” сууж байдаг. Үнэн байдал энэ.

Ийм яамыг Батмөнхийн Батцэцэг удирдаж байгаа. Сайд гадагш их явж байгаа. Ажил нь юм, аргагүй ээ. Гэвч хоёр хөршийнхөө учрыг олигтой олж байгаа юм уу даа.

Хэн ч дүн тавьчихаар байгаа биз дээ. Эрээн өнөөдөр эл хульхан л байгаа биз дээ. Энгийн илэрхийлэл шүү дээ, харилцаа ямар байгаагийн.

Б.Батцэцэг сайд минь таны өөрийн чинь хээнцэр пи ар цөмөрсөөн. Одоо ажилдаа бодит бай. Үнэн бай. Яамныхаа их зантуудаар ажлыг нь хийлгэ. Өөрөө оройлон чиглүүл. Элэгсэг мэндэлж зөрүү харж, элдэв хэрэгт хэрэггүй бичгээр нэгнээ бүү хуур, гадаад яамныхаан.

Монголын нэр хүнд Б.Батцэцэгийн яамнаас хамаарч байгаа. Нэр хүнд гэдэг бол яг үнэндээ хөрөнгө оруулалт татахын баталгаа. Чигч тодорхой бодлого.

Үзэсгэлэнт Б.Батцэцэг сайд, үлгэрлэхүйц үйл ажиллагаа явуулж, хичээж, улсаа чимэгтүн.

З.БАЯРАА

Amlalt.mn