Зайсангийн гацаа арилсаан. Япон мэргэжилтэн онош тодруулаад нэг урсгалтай болгосон юм билээ. Бөөн хар бухимдал арилж, цаг хугацааны хэмнэл, юутай аятай вэ. Мөргөмөөр. Гэтэл энэ олон жил, Зайсан гээд тусдаа дүүрэг шахуу орон зай үүсчихсэн байхад, ийм төдий онош тавиад гацаа бөглөрлийг шийдчихгүй байсан гэхээр, хотын удирдлагууд, эрх баригчдыг зүхмээр болдог гэж олон хүн ярьж үглэх.
Харин ч энэ Л.Оюун-Эрдэнэ чинь Түгжрэлийг бууруулах сайд гаргасан нь их онолоо. Одоо, түгжрэлийнхэн Алтай хотхон хавьд юм уу даа, түгжрэлийг бууруулъя, Зайсан шиг болгоё гэж. Мөнөөх япончууд хийж байгаа бололтой. Япончууд ч хөөрхий их буянтай улс даа, Монголд. Зөв л дөө. Тэгсэн, мөнөөх хороо орчмынхон, “Алтай”-хан эсэргүүцэх маягтай байгаа бололтойг дэвшилтэт сэтгүүлчид бичиж гаргах нь үзэгдэх.
За, чухам энэ чинь л монголчуудын маань жинхэнэ түгжрэл байгаа юм аа, Түгжрэлийн сайд Жамьянхорлоогийн Сүхбаатар аа. Ухаандаа, нэг орцны, тодруулбал захын орцны айлд түүгээр нэг урсгалын олон машин явах зохисгүй, өөрсдөө бол шууд төв зам дээрээ гарчихаж байгаа байх л даа. Эдгээр чинь л, энэ ойр зуурхан эрх ашиг л их түгжрэлийн эх болж байгаа байх. Ингэхээр чинь л, нийтийн оюун санааны дэвшил, хотын амьдралын зарчимтай болох, нэг нь нийтийн төлөөх зарчмыг баримтлуулмаар, сургамаар, соён гэгээрүүлмээр болж байгаа юм.
Энэ соён гэгээрлийг мань Ж.Сүхбаатар орхигдуулжээ. Тийм тул “Алтай” хотхоны ард түмний зарим нь эсэргүүцээд байгаа байж тун мэдэх. Ж.Сүхбаатар аа, ард түмнийхээ өмнө ажиллана гээд албан тушаалыг сонгосон бол ард түмэндээ нийцэж ажилла аа.
Соён гэгээрлийн ажлаа хий, түгжрэлийнхээ учиг шалтгааны ярь. Яг нөгөөх “Улаан бал”-ын урдуураа улаан хөлтөн өнгөрүүлдэггүй товаришийн урдуур зүтгэлж, Ерөнхий сайд ажилла гэсэн, бодоод, хийхээс аргагүй юм байна аа гэж зүтгэсэн гэж ярьсан шигээ, ярьж хэлж, ухуулж, таниулж энэ ажлаа хийсэн шиг хий. Энэ бол Ц.Нямдорж та хоёрын боолцоод, заамдалцаад байдгаас огт өөр соёл, огт өөр асуудал шүү. Цараатай хар, Нямдоржийн харж байснаас цаагуур хар.
Тэгж байж л энэ түгжрэлийг шийднэ шүү. Шийднэ гэдгийг ташлуулахад, Ж.Сүхбаатар сайд ирэх онд түгжрэлийг тавин хувь бууруулна, дүүжин тээврийн эхний шугамыг ашиглалтад оруулна гээд аваад хаясан шүү. Ээ дээ, яадаг бол доо, Түгжрэлийн сайд аа.
Өмнөх дарга нар баахан гоё юм ярьсан, нэг нь ч биелээгүй шүү дээ. Ардын нам маань ард түнийхээ чихэн дээр цэцэг ургуулахыг төгс хийдэг, биелээгүй амлалтын ярайсан жагсаалтаас төгөлдөр харагдах.
Ж.Сүхбаатар сайд аа, энэ амлалт чинь одоо заавал хэрэгжих хэрэгтэй. Эс тэгвэл ирэх сонгуульд Ардын нам ойчно оо. Энэ гарцаагүй. Худлаа яриад байгаа юм чинь, үргэлж, он онд, сонгуулиас сонгуульд. Тэгэхээр та энхрий намаа ялагдуулахгүйн тулд эл амласан амлалтаа биелүүлээрэй, цаг яваад эхэлсэн, хэлсэн цаг тийш чинь сануулга эхэлсэн.
Ард түмэн шахаж шаардана, хэвлэл мэдээлэл амлалтыг тань нэхнэ. Энэ амлалт тань уурандаа Ардын намаас гараад Хувьсгалт намд орох, хувьсгалт намаас гараад Ардын намдаа ирэх шиг чинь “золбин” үйл биш шүү. Таныг буян Жагаа тагнуул аятай байж мэдэх зүйл хэлсэн байна лээ.
Буян Жагаад хариулт өгөх замаар, буяны нь ам нээгдсэн түгжрэлийн асуудлаа байн байн яриад мэдээлээд байгаарай даа. Та огцом ууртай, догшиндуу хилэнтэй шүү, энэ хилэнгээ иргэддээ, эх орондоо түгжрэлийг ялах замаар л илүү яруу тунхаглаарай.
Энд нэмэж сануулахад, та харьцангуй шударга хүн. Намаар тань дүүрсэн нүүрсний хулгай, дөчин их наядын луйврыг та хэрхэн үзэж байна. Нэг яриач, нам гүм л байх юм, Б.Энхбаяр шиг ээ.
Гочоогийн Ганболд удахгүй сонсгол хийнэ гэсэн. Тэнд нь орж, Хөгжлийн банкыг ярьсан шигээ яриарай, та хоёр.
Та нар нүүрсэнд арай гар дүрээгүй биз дээ, Сүхээгийн зарчмаар бол Сүхээ яав ч үүнтэй холбогдохгүй л дээ. Тийм бол Ерөнхий сайддаа нэмэр болж, шударга үнэний төлөөх, шударга бусыг халахын төлөөх тэмцэлд нь ивээс бологтун. Гэвч тэгэж харагдахгүй л байгаа шүү.
З.БАЯРАА
Amlalt.mn
