Ерөнхий прокурор асан Магванноровын Энх-Амгалан гэж хүн байдаг. Тэр хүний алдартай үг байдаг л даа. ЖДҮ-гийн хэргээр УИХ-ын гишүүнд хариуцлага тооцохоор ахуй үед, хэлсэн нь үл мартагдах.
Тэрбээр, Энэ танхимаас чинь, энэ УИХ-ын индэр дотроос чинь шударга ёс эхлэх ёстой юм, хаана байна тэр шударга ёс чинь гэж.
Төгс хэлсэн л дээ. Мөнхүү үед УИХ мөнөөх ЖДҮ-гийн хулгайчаа аваад л үлдсэн. Аваад үлдсэн хүн эдүгээ улс төрийн тавцангаас нэгмөсөн ангижирчээ. Одоогийн, энэхүү спикер Гомбожавын Занданшатарын толгойлсон парламент мөн ч ээдрээтэй харагдах.
ЖДҮ-гийн хулгайтай зүйрлэмгүй, дөчин их наядын хулгайтай гишүүдийг чөлөөлөх, явуулах асуудлыг хэлэлцэх гээд чухам “алаан” болж байна. Ардчилсан нам эмхэндээ ордоггүй, намын дарга нь ч ардчилал, шударга ёсноос шууд татгалзаж байгаагаа өчигдөр УИХ дахь бүлгийн гишүүдийнхээ амаар илэрхийллээ.
Лувсаннямын Гантөмөр гэдэг хүн Ардчилсан намын дарга гэгдэх ч тамга үгүй, гэрчилгээ үгүй сууж байгаа. Уг нь мань хүн намын дарга болох шавдан нь орших үед шударга ёсны төлөө зүтгэнэ гэж уянгалуулсан.
Эрх баригчдын үнэн хэсэгтэй нэгдэнэ гээд дарга болох виз рүү дөхсөн шиг байгаа юм. Эдүгээ түүнээсээ буцжээ. Түүнийг дагаар орлоо гээд бичиж байна. Шударга бус хэсэг рүү. Худалгүй шиг. М.Энхболдын толгойг бага тухай ярьж байсан хүн лдээ, Энхболдын толгой илүү том байсан нь, УИХ-ын дарга, Ерөнхий сайд байснаас, эдүгээ дөчин наядын хулгайтайгаа ноцолдоод чадахгүй байгаа хүмүүсийг харж Эрдэнэ сум хавьд яваагаас илүү бодьтой харагдана л даа.
Л.Гантөмөр тийм байж. Эрх баригчид, тэр тусмаа үнэмлэхүй олонхитой спикер Г.Занданшатар, бүлгийн дарга Д.Тогтохсүрэн нар хэрхэн шударга болох нь одоо жинхэнээсээ харагдана даа. Сонгуулийн хуульд жендерийн талаар амласнаасаа олиггүй байр суурьтай, мэлзэх урлагтай спикер, бүлгийн дарга хоёр одоо нүүрсний хулгайчдыг явуулах уу, эс явуулах уу гэдгээрээ УИХ-ын байх байхгүйг шийднэ.
Энэ нь дөчин найман цагийн дараа дэнслэгдэнэ. Эрх баригч намын дарга нүүрсний хулгайг шүгэлдэж, нийгмээр жигшин зэвүүцэж, эдүгээ эхний хэсгийг дэнслэх болоход , хулгайчдаа эрх мэдлээс нь буулгахгүй байх тохироог парламентын дотор хийгдсэн байж мэдэхээр байгааг хэвлэл мэдээлэл, олон нийт дээр дооргүй ярьж байна. Хэрвээ энэ л нүүрсний хулгайн асуудлаар ял зэмтэн тодрохгүй байна гэдэг чинь парламент өөрөө хулгайчийг торниулдаг, өсгөдөг, хамгаалдаг дархлааны эх болсоноо нотолно.
Парламентын зарим шударга гишүүд энэ огцруулах саналыг эс дэмжвэл өөрсдөө адилхан нүүрсний хулгайч, мөргөцөг хусагчаас хувь хүртэгч болохоо тодотгоно. Ингэвэл парламент орших үндэс ер үгүй. Шалавхан тарж, ээлжит бус сонгуулийг явуулах нь дамжиггүй. Ямар сайндаа л нууц санал хураалтыг задалдаг тухай хуулийн төсөл санаачлах ажил яригдаж байх вэ дээ. Арга нь барагдаж дуусч байна даа.
Ийм учраас Г.Занданшатарын парламентынхан, тангарагтаа үнэнч үү, эс үнэнч үү гэдэг мөдхөн тодорно. Тэд тангарагтаа хэлсэн шүү дээ. УИХ-ын тухай хуулийн 7.2-т заасанчлан “...Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрт ёс, түүх, соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж, авлига, ашиг сонирхлын зөрчлөөс ангид байж, гишүүний үүргээ чин шударгаар биелүүлэхээ тангараглая. Миний бие энэ тангаргаасаа няцвал хуулийн хариуцлага хүлээнэ" гэж орчлонгоор тунхагласаан.
Энэ тунхаглалаа одоо хэрхэн биелүүлэхийг Монголын ард түмнээрээ, гурван сая таван зуугаараа, долоон сая нүдээрээ харъя.
Гомбожавын Занданшатар хоёр дахиа парламент толгойлсоны үнэ цэн Монголын ард түний хувь заяа, боломжийг хулгайлагсдын эрх ашгийг хамгаалах нь уу, халайж зөв дэнслэх нь үү гэдгийг харах үлджээ.
З.Баяраа
Амлалт.мн
