Улсын Их Хурал энэ пүрэв, баасанд Үндсэн хуулийн өөрчлөлтийг хийх үндсэн чиг гарсан шиг байна. Зуун хорин зургаан гишүүн дээрээ батлах төлөвтэй. Сонгуулийн холимог тогтолцоо ч хуульчлагдана. Залгуулаад Сонгуулийн тухай хууль, Улс төрийн намуудын тухай хууль хэлэлцэгдэн батлагдана.

Ерөнхийлөгч У. Хүрэлсүх улс төрийн намыг шилэн байлгах хууль өргөн барьсан. Энэ хууль агуулгаараа батлагдах байх. Эрх баригч намын дарга Л. Оюун-Эрдэнийн үзэл санаа ч энэ хуульд шингээмэл байгаагаар ойлгогдож байгаа. Нийгэмд шударга ёс тогтоохын төлөөх түүний тэмцэл Хөгжлийн банк, сангуудын мэдээллийг ил болгож байгаа зэргээс нэн тодорхой харагдаж байгаа юм.

Усны эх цэвэр аваас адаг нь цэвэр байдаг жамтай. Улс төрийн намын санхүүжилт цэвэр байх нь яг үүнтэй ижил юм. Улс төрийн намын санхүүжилт цүнхтэй мөнгө, эрх ашгийн, элдэв башрын бохир мөнгөөр цэнэглэгдээд байхаар л энэ нийгэм ийм арчаагүй, шударга бус, мэдээлэлд ойр, эрх мэдэлд ойрыг худалдаж авах замаар идээ бээр, буглаа нь гаарч байгаа юм.

Бохир их мөнгө намд тушаагсад л илүү эрх мэдэлд ойр, илүү мэдээлэлд ойр талбарт очдог. Ингээд мөнөөх гаргасан, хударгагүй санхүүжилт хийснийхээ шархыг нөхөх аянд нийгмийн шударга бусыг, цөлмөн тонох ажиллагааг үүтгэн буруугийн замыг тэлэн хөгжлийн чөдөр тушааг гогцооруулж, эрүүл нийгмийн зөв явах замыг хавдаршуулдаг.

Энэ бодит үнэнийг Ерөнхийлөгч У. Хүрэлсүх, түүний институци тодорхойлон оношлоод, улс төрийн намыг шилэн байлгах хуулийн төслийг өргөн барьсныг эдүгээ тунгалаг бусад олноор түрсэн Их хурлын гишүүд батлан буян хийх нь хаа хаана ононо.

Л. Оюун-Эрдэнэ дарга ч эл бодлого агуулгаар засаглалыг удирдан, идээ бээрийг шахах, ус тосыг ялгах ажлыг шууд болон шууд бусаар түрэн хийж байгаа нь нийгэмд тов тод ойлгогдож байгаа билээ.

Намын ариун, эрүүл , ёс зүйт санхүү л улс орны ариун, эрүүл, ёс зүйт хандлага төлөвшлийг олгоно. Энэ төлөвшил , энэ агуулга бэхжин дархлаажиж байж, зөв хүмүүс төрд гарч, зөв улс төр, зөв хөгжил өрнөнө. Юун үнэн чухам энэ үнэн билээ.

Сонгуулийн хууль дээр гэхэд жендерийн чигээр, тухайлбал, эмэгтэйчүүдийг пропорциональ хэсэгт нэг эрэгтэй, нэг эмэгтэй буюу салаавчлан дэвшүүлэхээс эхлээд , нийгмийн давхаргын бүхий л төлөөллийг УИХ-д дэвшүүлэн оруулах боломжоор хангах зэргээсээ эрх баригчид, улс төрийн намууд ухрахгүй байх нь лавтайяа байх аа.

Тэр л цагт төрийг энэ олон жил зайдагнаж, үр хүүхдээрээ, үе удмаараа төрөөр хооллож, төрийг шимж, төрийг хоослогчид нийгэм, ард түмний эрүүл шахалт, түрлэгийн дор улс төрөөс зайлуулагдах нь гарцаагүй. Энэ агуулгаар нийгэм, олон нийт өнөөдрийн Их хурал, түүний удирдлага, гишүүдийг “шилбүүрдэн” ажиллуулах нь манай ард түмний өнөөдрийн онцгой эрх ашиг байна.

З.БАЯРАА

Amlalt.mn