Өдгөө Монголын улс төрийн тавцан ихээхэн савлагаатай байна. Нийгмийн байдал ч төдийлөн тогтвортой бус, ард түмэн улс төрчдийн булхай но-г зах зухаас нь мэдэж, эсэргүүцэж, хариуцлага нэхэн, шаардлага хүргүүлсээр л...
ҮХНӨ оруулж, УИХ-ын сонгуулийн тухай хууль болоод Улстөрийн намуудын тухай хуулийг шинэчлэх гэсэн эрх баригчдын хүслийг улс нийтээрээ хэдэн талаас нь “ээрч”, үгүйсгэл, зөвтгөлөөр “нүдэлцсээр” байтал л наадамтай золголоо. Том өөрчлөлтүүд хийгдэхээр болов. Үүний тусаар төрд бугшиж, ужгирсан авлига хээл, хахуулийн олон асуудал шийдэгдэх байх гэсэн итгэл байна. Хэрхэхийг цаг хугацаа л харуулах биз ээ...
Хамгийн гол нь бид өөрчлөлт ярьж, мэтгэсээр, хэмлэлдсээр, маргалдсаар байгаад өмнөх асуудлуудыг мартах шахав. Ер нь мартав. Өвлийн хүйтэнд олноороо тэмцэж, үр дүнд хүрлээ хэмээн “итгэл зангидсан” нүүрсний хулгайн асуудал замхрах дөхөв. Зарим нөхөд ч далим үсэргэж замхруулахаар шамдав. Гэсэн хэдий ч ард түмэн хэрсүү байна аа. Асуудлыг эргэн сөхөж, олны анхааралд дахин оруулж чадлаа. Энд Засгийн нөлөө ч бас их багын зэргээр байсан нь дамжиггүй юм.
Ямартай ч ард түмний, засгийн шахалтаар нэрээс цаашгүй болоод байсан Нүүрсний хэргийн сонсголыг яаралтай зохион байгуулахаар болж, ажлын хэсгийг шинэчлэн байгууллаа. Х.Нямбаатар сайдаар ахлуулсан тус ажлын хэсгийнхэн долоодугаар сарын 1-ний дотор сонсгол хийх ажлыг жин тан болгож, үр дүнг эргэн тайлагнахаар үүрэг авав.
Нүүрсний хэргийн нээлттэй сонсголыг хийх нь маш чухал. Түүний ачаар бид Хөгжлийн банкны булхайг олноороо дэнсэлсэн шигээ, нүүрсний гэх их хулгайн үнэн мөнд гүнээ нэвтрэх боломжтой болно. Тос, усыг нь утгаар нь ялгах үндэс бүрдэнэ.
Мөнхүү бас Нүүрсний хэргийн сонсгол явагдах болсонтой зэрэгцээд Ерөнхий сайд урд хөршид айлчлах гэж байна. Түүний айлчлал ихээхэн зүйлийг шийднэ хэмээн учир мэдэх хүмүүс хэлээд л байгаа. Улс оронд том өөрчлөлт авч ирж мэдэх эерэг хэлцлүүд хийгдэх сурагтай. Бид хоёр том гүрний дунд аж төрдөг. Тийм ч учраас тэдэнтэйгээ аль болох сайн харилцаатай байхыг эрмэлздэг. Эрмэлзсээр ч ирсэн. Яг одоогийн нөхцөл байдлаар бол ОХУ дайн дажинтай, эдийн засгийн хувьд тогтворгүй байдалд байна.
Дэлхий тэдний эсрэг зогсож байна. Энэ нь ч бидэнд тодорхой байдлаар нөлөөлж байгааг үгүйсгэшгүй. Тиймээс энэ эрсдэлт нөхцөлд бид урд хөрштэйгөө аль болох олон талаар харилцаагаа сайжруулах шаардлага эрхгүй “ундарч” буй юм. Үүнийг ч манай Засгийн газар бат, нот мэдэж, ухамсарлаж байгаа нь гарцаагүй биз.
Ерөнхий сайд Хятадад айлчлах үеэрээ төмөр замын холболтын цэгийн асуудлыг шийдвэрлэж, нүүрсний экспортыг нэмэгдүүлэх тал дээр тодорхой гэрээ, хэлцлүүдийг байгуулна гэсэн урьдчилсан таамаг байна. Ямартай ч хэд хэдэн эерэг шийдлүүд зураглагдах байх гэж найдаж байна. Тэгэх аваас урд хөршийг зорьсон Ерөнхий сайдын энэ удаагийн айлчлал туйлын өндөр ач холбогдолтой ажил болж, улс орны хэтийн хөгжилд мэдэгдэхүйцээр үр шимээ өгнө.
Г.Дамдин
Amlalt.mn
