Комисс Монгол Улсын Үндсэн хууль, олон улсын хүний эрхийн гэрээ конвенцоор баталгаажуулсан хүний эрхийн хэрэгжилтийг хэмжих Хүний эрхийн үндэсний индекс боловсруулах ажлыг Үндэсний статистикийн хороотой хамтран хийж байна.
Хүний эрхийн үндэсний индексийн аргачлалын төслийг 2025.11.13-ны өдөр Дундговь аймгийн Сайнцагаан сумын төрийн байгууллагын 45 албан хаагчид танилцуулж хэлэлцүүллээ. Хэлэлцүүлгийг ХЭҮК-ын гишүүн Ж.Хунан, Аймгийн Засаг дарга С.Мөнхчулуун нар нээж, Зөвлөх Б.Хишигсайхан “Хүний эрхийн үндэсний индекс тооцох аргачлал”-ын төслийг танилцуулав.
Мөн хэлэлцүүлгийн үер ХЭҮК-ын аймаг дахь референт Т.Баярцэцэг орон нутгийн хүний эрхийн нөхцөл байдлыг танилцуулав. Хэлэлцүүлэгт оролцогчид хүний эрхийн хэрэгжилтийг хэмжих хэмжээсний талаар асуулт асууж, санал тусгуулах байдлаар оролцлоо.
Тухайлбал:
-Хүний эрхийн үндэсний индексийг тооцохдоо орон нутгийн хүний эрхийн индексийг тооцож гаргах; -Технологийн хэрэглээтэй холбоотой хүний эрхийн асуудлыг холбогдох хэмжээсээр илэрхийлэх;
-Нийгмийн хамгаалал хүртэх эрхийн хүрээнд гэр бүлийн хөгжлийг дэмжих бодлогыг хэрэгжүүлэх нийт төсвийн хэмжээг тооцохоор тусгах зэрэг саналыг гаргав.
Ажлын хэсэг Дундговь аймгийн Хүүхэд, гэр бүлийн хөгжил хамгааллын газар болон Тэнгэрийн тэмдэг хүүхдийн театрын үйл ажиллагаатай танилцаж, тус газруудын хуулиар хүлээсэн хүүхдийн эрхийг хангах, хамгаалах чиг үүргийн хэрэгжилтэд хяналт шалгалт хийлээ.
Мөн тус аймгийн Цагдаагийн газрын насанд хүрээгүй хүнээс мэдүүлэг авах өрөө болон эрүүлжүүлэх байрны нөхцөл байдал, алба хаагчдын ажиллаж буй орчин нөхцөл, хуулиар хүлээсэн чиг үүргээ хэрэгжүүлэхэд тулгамдаж байгаа асуудлыг тасгийн дарга болон албан хаагчидтай ярилцаж санал солилцлоо. Цагдаагийн газрын эрүүлжүүлэх байр нь зориулалтын бус байр 1981 онд Авто баазын зориулалттай 150 машин багтах гражийг Цагдаагийн байгууллагад 2001 онд шилжүүлж, засаж янзалсан байр нь стандартын шаардлага хангахгүй байранд үйл ажиллагаа явуулж байна.
Хяналт шалгалтын үр дүн болон үйл ажиллагаа явуулахад тулгамдаж байгаа асуудлуудыг үндэслэн хүний эрхийн зөрчлөөс урьдчилан сэргийлэх зорилгоор Комиссын гишүүний Зөвлөмжийг, хүний эрхийн зөрчлийг арилгуулах, таслан зогсоох зорилгоор Комиссын гишүүний Шаардлагыг холбогдох эрх бүхий байгууллага, албан тушаалтанд хүргүүлэхээр болно.
