Комисс Монгол Улсын Үндсэн хууль, олон улсын хүний эрхийн гэрээ конвенцоор баталгаажуулсан хүний эрхийн хэрэгжилтийг хэмжих хүний эрхийн үндэсний индекс боловсруулах ажлыг Үндэсний статистикийн хороотой хамтран хийж байна.

Энэ хүрээнд Хүний эрхийн Үндэсний Комиссын гишүүн Ж.Хунангаар ахлуулсан ажлын хэсэг Төв аймагт 2025 оны 11 дүгээр сарын 12-ны өдөр төрийн байгууллагын дарга, төрийн захиргааны албан хаагчдад "Хүний эрхийн үндэсний индекс тооцох аргачлал"-ыг танилцуулж, санал солилцов.

Хүний эрхийн индекстэй болсноор Монгол Улс дахь хүний эрх, эрх чөлөөний хэрэгжилтийг бодитоор үнэлэх, хүний эрхийн чиглэлээр гаргаж буй ахиц дэвшлийг тодорхойлох, төрийн бодлого, шийдвэр хүний эрхэд суурилах нөхцөл бүрдэх юм.

Хэлэлцүүлэгт аймгийн удирдах албан тушаалтан, төрийн алба хаагчдын төлөөлөл болох нийт 65 хүн оролцож, хүний эрхийн индексийн шалгуурыг сумдын иргэдийн хүний эрхийн нөхцөл байдал, онцлогт нийцүүлэн нарийвчлан батлах талаар санал гаргав.

Түүнчлэн, ажлын хэсэг Төв аймгийн Хүүхэд гэр бүл хөгжил хамгааллын газрын үйл ажиллагаатай танилцаж, тус газрын хуулиар хүлээсэн хүүхдийн эрхийг хангах, хамгаалах чиг үүргийн хэрэгжилтэд хяналт шалгалт хийж, аймгийн Цагдаагийн газрын насанд хүрээгүй хүнээс мэдүүлэг авах өрөөний нөхцөл байдал, Шүүхийн шинжилгээний албаны алба хаагчдын ажиллаж буй орчин нөхцөл, хуулиар хүлээсэн чиг үүргээ хэрэгжүүлэхэд тулгамдаж байгаа асуудлыг албаны дарга болон албан хаагчидтай ярилцаж санал солилцлоо.

Тус хяналт шалгалтын үр дүн болон Шүүхийн шинжилгээний албаны үйл ажиллагаа явуулахад тулгамдаж байгаа асуудлуудыг үндэслэн хүний эрхийн зөрчлөөс урьдчилан сэргийлэх зорилгоор Комиссын гишүүний Зөвлөмжийг, хүний эрхийн зөрчлийг арилгуулах, таслан зогсоох зорилгоор Комиссын гишүүний Шаардлагыг холбогдох эрх бүхий байгууллага, албан тушаалтанд хүргүүлэхээр болно.