ИЗНН-ын Нийслэлийн Намын хорооноос ИЗНН-ын дарга, УИХ-ын гишүүн, БОУАӨ-ийн сайд Б.Батбаатар болон ИЗНН-ын ЕНБД Ч.Мөнхжаргал нарт хандан шаардлага хүргүүлжээ. Тус шаардлагад ИЗНН-ын дарга Б.Батбаатар нь Намын Их хурлаа хуралдуулсан ч хурлаа хаагаагүй, Намын дүрмээ шинэчлэн баталж, Улсын дээд шүүхэд бүртгүүлэх ажлыг хэрэгжүүлээгүй, төрөөс ИЗНН-д олгосон 455 сая төгрөгийн зардлыг тайлагнаагүй, БОУАӨ-ийн сайд Б.Батбаатарын албан томилолттой холбоотой асуудал зэрэгт тайлбар ирүүлэхийг шаарджээ.
Шаардлагыг бүрэн эхээр нь хүргэе.
ИРГЭНИЙ ЗОРИГ НОГООН НАМЫН ДАРГА Б.БАТБААТАР, ЕРӨНХИЙ НАРИЙН БИЧГИЙН ДАРГА Ч.МӨНХЖАРГАЛ НАРТ
Шаардлага хүргүүлэх тухай
Иргэний Зориг Ногоон намын дотоод асуудал болон өнөөгийн тулгамдаж буй нөхцөл байдлууд мөн намын дарга Б.Батбаатарын хууль бус байж болзошгүй үйлдлүүдтэй холбоотой мэдээллүүд олон нийтийн хэвлэл мэдээллийн хэрэгслэлүүдээр гарч байна.
Иймд Нийслэлийн намын хороо дараахь шаардлагуудыг хүргүүлж байна.
- Улсын дээд шүүхэд бүртгүүлэхээр өргөн барьсан намын дүрэм нь эрх мэдлийг намын даргад хэт төвлөрүүлсэн, дарангуйллын шинжтэй, тэгш бус, анхан, дунд шатны гишүүдийн оролцоог хангаагүй үндэслэлээр 3 дахь удаагаа бүртгэхээс татгалзан буцаасан байна.
Энэ нь намыг татан буулгах, намыг үйл ажиллагааг идэвхигүй болгох, төрөөс олгож буй санхүүжилтийг зогсоох гэх мэтчилэн хуулийн бодит үр дагавар бүхий нөхцөл байдал үүсээд байна.
Иймд намын их хурлыг хууль болон дүрэмд нийцүүлэн анхан болон дунд шатны гишүүдийн оролцоог бүрэн хангаж, 2025 оны 12 дугаар сарын 20-ны дотор зарлан хуралдуулж, намын дүрмийг хуульд нийцүүлэн дахин Улсын дээд шүүхэд бүртгүүлэхээр хүргүүлэхийг;
- Улс төрийн намын тухай хуулинд заасны дагуу Улсын Их Хурлын сонгуульд авсан суудлын тоо, сонгогчийн саналд үндэслэн төрөөс олгосон санхүүжилт болох 455.419.800 төгрөгийг хэрхэн зарцуулсан тухай тайлан, хандив, намын гишүүдийн төлсөн татварын мэдээллийг намын нийт гишүүд болон олон нийтэд нээлттэй ил тод болгохыг;
- Олон нийт хэвлэл мэдээллийн хэрэгслэлээр явж буй Байгаль Орчин, уур амьсгалын өөрчлөлтийн сайд Б.Батбаатарын гадаад томилолт болон бусад асуудлаар намын нийт гишүүд, олон нийтэд хандаж нэн яаралтай мэдээлэл өгөхийг тус тус шаардаж байна.
Дээрхи шаардлагуудад нэн даруй албан бичгээр хариу өгөхийг хүсье. Дарга М.Амартунгалаг гэжээ.
Amlalt.mn
