УИХ дах МАН-ын бүлэг дэх хоёр хуваагдаж, нэг нэгнээ буруутгаж явсан гишүүд зэрэгцэж зогсоод олон нийтэд хандан мэдээлэл өгөв. Тэдний нэг УИХ-ын гишүүн З.Мэндсайхан “Зарчим дээрээ хоёр талд явсан, өнөөдрөөс эхлээд энэ талцал хуваагдал арилах ёстой гэж МАН-ын гишүүд үзэж байна” гэж хэлэв.
Тэгэхээр, энэ юу гэсэн үг үү, эрх мэдэл албан тушаалаа урвуулан ашиглаж, нүүрсний хулгай, төсвийн мөнгийг шамшигдуулсан, улс орон, нийгэмд хор хохирол учруулахуйц гэрээ байгуулсан, дундаас нь хувьдаа мөнгө завшсан байж болзошгүй гэх асуудлууд тэдний ярьж байгаагаар зүгээр л зарчмын зөрүүтэй байр суурь байсан төдий юм уу, нэгнийгээ буулгаж авах арга төдий байсан юм уу?
УИХ дах МАН-ын бүлгийн гишүүд, та бүхэн Монголын ард түмнээр тоглоод байна уу, тавлаад байна уу?
Эсвэл үнэхээр МАН-д элдэв хулгай худал байхгүй юм уу, нүүрсний хулгай хийсэн, нууцын дардастай гэрээгээр халхавчлан татвар төлөгчдийн мөнгийг зориулалтын бус зарцуулсан асуудал худал байсан юм уу?
Энэ хүмүүс хариуцлага хүлээхгүй, харин ч МАН-ын Их хурлын өмнө гар бариад, цаашид албан тушаалууд дээрээ тохироод, хөтлөлцөөд “хулгайгаа” хийх юмуу?
Танай намын даргын суудал Монголын ард түмнийг хохироосон, байгалийн баялагаас хулгайлж хувьдаа завшсан, эрх мэдэл албан тушаалаа урвуулан ашигласан, өөртөө болон өөрийн хамаарал бүхий этгээдүүдэд давуу байдал олгосон байж болзошгүй нэр бүхий УИХ-ын гишүүд, төрийн өндөр албан тушаалтнуудын гэмт үйлдлээс илүү үнэ цэнэтэй юу?
Дээр мэдээлэл хийсэн УИХ-ын гишүүд үргэлжлүүлэн хэлэхдээ “Монгол орны өнцөг болон бүрээс, МАН-ын анхан шатны нэгж болох үүр, хороодоос ирж байгаа 2250 төлөөлөгчийн өмнө бид эв нэгдэлтэй байх нь чухал” гэжээ.
МАН-ын Их хурлын эдгээр төлөөлөгчид тань Монголын ард түмний төлөөлөл биш юм уу, тэдэнд намаа “эв нэгдэл”-тэй болж харагдуулах ямар хэрэг байдаг юм бол?. Түүний оронд үнэнээ хэлэх хэрэгтэй.
Тэд намд, төрд шургасан хулгайаас, эрх мэдлээ хувийн ашиг сонирхолдоо урвуулан ашигласан намын удирдах албан тушаалтнуудаасаа салах сонирхолтой байгаа байх.
Харин та нар тэдэнд ийм боломж олгохын оронд, намын Их хурлаараа “эвлэрэл, эв нэгдэл” нэрийн дор хулгай худлаа хаацайлаад үлдэх гэж байна.
Монгол Улсын хөгжих, монгол түмний сайн сайхан амьдрах олон боломжийг хулгайлсан байж болзошгүй албан тушаалтнууд МАН-ын Их хурлын дараа эргээд МАН-ын намд, Монголын төрд ажил албан тушаалтайгаа үлдэж, дахин албан тушаалд томилогдох уу?
Хууль, шүүхийн байгууллагаар шалган тогтоох, мөрдөн байцаах үйл ажиллагаа ингээд та бүхний “хүсэлт”-ээр зогсож байгаа юм байна гэж ойлгож болох уу?
Ерөнхий сайд Г.Занданшатар, ХЗДХ-ийн сайд Б.Энхбаяр нар худал, худалтай хэзээ ч эвлэрэхгүй гэсэн. Тэгвэл энэ бүхэн хоосон попролт байсан юмуу, эсвэл та хоёрын эсрэг танай намынхан санал нэгдээд хулгай худалтайгаа эвлэрчихсэн юм уу?
Сэтгүүлчид та бүхэн энэ асуудлыг УИХ дах МАН-ын гишүүдээс, Ерөнхий сайд Г.Занданшатараас, ХЗДХ-ийн сайд Б.Энхбаяр нараас асуух хэрэгтэй.
Эдгээр асуултыг Монголын ард түмэн МАН-ын удирдлагуудад хандан тавьж байна. Хэрэв энэ бүхэнд үнэн бодитой хариулж чадахгүй бол Монголын ард түмэн МАН-д итгэх итгэл алдарахад хүрнэ.
А.Галт
Amlalt.mn
