ХҮН-ын дарга попорч, АН-ын дарга намынхантайгаа ноцолдож, эрх баригч МАН-ын дарга шударга ёсны төлөө зүтгэж байх шиг...
ХҮН парламентэд нэг суудалтай. Энэ суудлын эзэн, тус намын дарга Т.Доржханд.
Нүүрсний хэрэгт орооцолдогсдын ихэнх нь эрх баригч намынх. Намынхнаа чадахгүй байгаа бол, надад хэлчих, би арьсыг нь хуулаад өгье гэж Т.Доржханд Б.Энхбаярт хэлсэн юм билээ.
Ногоон автобусны асуудлыг бол яах аргагүй Т.Доржханд болоод түүний намынхан гаргаж тавьсан. Гэхдээ энэ нь цаанаа захиалгатай байсан, тодорхой хүмүүст хамааруулж Х.Нямбаатараас хэлээд л байгаа л даа.
Д.Сумъяабазар, Ж.Сүхбаатар нарын лоосууг илэрхийлж, годройтуулах ажилд Т.Доржханд МАН-ы зарим том даргатай гар нийлсэн нь бодитой л харагдаад байгаа.
Нүүрсчдийн арьсыг хуулаад өгнө гэж хэлсэнээсээ хойш Т.Доржханд нам жим л байх шиг байна. Намаа ирэх сонгуульд ихээхэн "өсгөж", парламентэд бүлэгтэй болох минь тодорхой гэж их дээгүүр сэвж, ил тод ярьж явдаг болсон тэрбээр “их том” л байгаа. Сонгууль дүгнээд өгнө биз ээ.
Сөрөг хүчин Ардчилсан нам эвээ олохгүй байсаар л. Л.Гантөмөрөө авч хаяна, Н.Алтанхуягийг болгосон ч яахав гэж нэг хэсэг нь үзэж байгаа бололтой юм.
С.Баярцогтыг тэргүүн дэд дарга болгосноос эхлээд, сэтгэл төвлөж өгөхгүй яваа Х.Баттулга эдүгээ ч хямармал байгаа шиг байна.
Тэрбээр толгойлдог Монголын ардчилсан холбооны Их хурлаа ирэх сарын хоринд хийхээр зарлаж. Ер нь бол, Ардчилсан намтайгаа цааш явах юм уу, шинэ нэгэн нам мэндлүүлж, хөх туг өргөх нь үү гэдэг тэр огноогоор эцэслэгдэх төлөв ажиглагдах.
Өнөө маргааш Нийслэлийн Ардчилсан намын дарга тодрох нь. Энд Х.Баттулгын Т.Батцогт хэрхэн уралдахаас цаашдын нүүдлүүдийн багцаа илэрхийлэгдэхээр байгааг хэвлэлүүд онцолж байна. Нэг үгээр хэлбэл, Ардчилсан нам өөртэйгөө л ноцолдож байна. Сөрөг хүчний хувьд паг болоод маш удаж байна. Юун нүүрсний сонсгол шахуу байгаа биз дээ. Энэ намынхны ярьдаг юм л дотоод өрсөлдөөн, үхрийн эвэр чихсэн уутны үлгэртэй байж байгаа.
Эрх баригч намын дарга Л.Оюун-Эрдэнэ Хууль зүйн сайд Б.Энхбаярт нүүрсний хэргийг шийдвэрлэх Түр хорооны сонсголыг л чухам онцгой хийхийг анхааруулж үүрэг болгосон байна билээ.
Б.Энхбаяр нь ч үүнийг нь давтан хэлээд, маш их анхаарч байгаагаа хэлээд байгаа. Гэхдээ энэ ажилд нь ихээхэн нажид түвэг учраад байгаа шиг байна.
Түр хорооны гишүүд нь хуралдаа ирэхгүй байгаа, санаатай санаагүй энэ сонсголыг сулруулах гэсэн олон нөхцөл байдал харагдаад л байна. Б.Энхбаяр оромдоод өнгөрөх нь гэж бичсэн хүртэл харагдана билээ.
Аа, Л. Оюун-Эрдэнэ бол иймэрхүү сулруулах чиг байгааг бодитой мэдсэний учир л, эрэг боолтоо улам чангаруулж, өнгөрсөн хаврын Хөгжлийн банкны сонсгол шиг уудлан харуулж, нүүрсний хулгайчдыг илрүүлэн харагдуулахыг хичээж байгаа нь маш тодорхой байгаа.
Эрүүгийн хуулийн өөрчлөлтөд авлига албан тушаалын хэрэгтэнг магадлан болон өршөөлөөр суллах заалт оруулж болохгүйг сануулан хатуурхаад байгаа нь ч тийм учиртай.
Амаргүй байна, ард түмэнтэйгээ хамт тэмцэнэ гэдэг Л.Оюун-Эрдэнийн үг бол Монголын төрд үүрлэсэн хүний өөрийн намын авлигачидтай тэмцэхэд хүнд байгаагаа, хүчин мөхөсдөнгө байгаагаа л илэрхийлээд байгаа хэрэг шүү дээ. Ерөнхий сайд одоо бол хэн хэн нүүрсний хулгайч, хэн хэн ард түмний тусын тулд байна вэ гэдгийг нэгэнт ойлгочихсон.
Эрхбиш, сайн нь муугаасаа илүү байдаг хойно, шударга зөв арай олон буй байлгүй дээ. Нүүрсний хэргийн шалгах Түр хорооны сонсгол ирэх сарын эхээр явагдана. Түүнийг иргэд олон нийт чих тавин хүлээж, үр дүнг нь харахыг хүсэж байгаа.
Үүний наана хэн хэн нүүрсний хэргийн сонсголыг цалгардуулах санаархал гаргах нь гэдгийг нийгэм ихээхэн анхаарах хэрэгтэй.
Одоо ч гэсэн албан тушаал, эрх мэдэлтэйгээ байгаа олон улс төрч нүүрсний хулгайд холбоотой учраас тэд ямар нэг аргаар Нүүрсний сонсголыг хийлгэхгүй байхыг хичээж байна уу гэсэн хардлага улам бүр лавширч байна.
Б.БАЯР
